[retour à un affichage normal]

MADRIGAL
sur le mesme sujet.

  Pourquoy semble-t'il tant estrange,
Que fille comme vous estant,
Toutefois je vous ayme tant ?
  Si l'Amant en l'aimé se change,
Ne puis-je pas mieux me changer,
Estant Bergere, en vous Bergere,
Qu'estant Bergere en un Berger ?

  Apres nous, chacun selon son rang, chanta quelques vers, & mesme Filandre qui avoit la voix tres-bonne, quand ce vint à son tour, dit avec une façon fort bonne ceux-cy.

STANCES
DE FILANDRE SUR LA
naissance de son affection.

  Que ses desirs soient grands & ses attentes vaines,
Ses Amours pleins de feux, & plus encor de peines,
Qu'il ayme, & que jamais il ne puisse estre aimé,
Ou bien s'il est aimé qu'on ne puisse luy plaire,
Et que d'un faux espoir, toutefois qu'il espere,
Mais seulement afin qu'il soit plus enflamé.

  Ainsi sur mon berceau de la parque ordonnée,
Neuf fois se prononça la dure destinée,
Qui devoit infaillible accompagner mes jours,
A main droite le Ciel tonna plein de nuages,
Et depuis j'ay tousjours recognu ces presages,
En mes plus grands desirs & plus vives amours.

  Ne vous estonnez donc, suivant ceste ordonnance,
Si voyant vos beautez mon amitié commance,
Que si je suis puny du dessein proposé,
Le grand alegement, qu'on en juge coulpable
Les Loix de mon destin, & ma faute loüable,
En disant qu'un cœur bas ne l'eust oncques osé.

  Ainsi quand le Soulcy durant la canicule,
Se plaisant au Soleil à ses rayons se brusle
Il dit tournant vers luy, brusle, ô mon beau Soleil,
Brusle, aussi bien faut-il que toute chose meure :
Il est vray qu'à ma mort ce plaisir me demeure,
Qu'autre feu ne pouvoit me brusler que ton œil.

  Quand l'unique Phœnix d'un artifice rare,
Instruit par la nature, ensemble se prepare
Au naistre & au mourir la tombe & le berceau,
Amoureux de ce feu qu'à son dam il allume,
Glorieux de sa mort, il dit quand il consume,
D'un tel feu consumer, est-il rien de plus beau ?.

  Il en dit bien encores quelques autres, mais je les ay oubliez, tant y a que fust ce que m'en avoit dit Daphnis, ou que veritablement ses ses yeux me parlassent plus clairement que sa bouche, il me sembla que c'estoit à moy à qui ces paroles s'adressoient. Mais si ces vers m'en donnerent cognoissance sa discretion me le tesmoigna bien mieux peu apres, car "c'est un des effets de la vraye affection que de servir discrettement, & de ne donner cognoissance de son mal, que par sa mort, ou pour le moins par les effets sur lesquels on n'a point de puissance". Ce jeune Berger recognut l'humeur d'Amidor, & dautant que "l'Amour rend tousjours curieux", s'estant enquis que c'estoit que de Filidas, il jugea que le meilleur artifice pour leur clore les yeux à tous deux, estoit de faire amitié bien estroite avec eux, sans donner aucune cognoissance de celle qu'il me portoit, & eut tant de pouvoir sur soy-mesme, que suivant son dessein, il ne deceut pas seulement Amidor, mais presque mes yeux aussi, parce que d'ordinaire il nous laissoit pour aller vers luy, & ne venoit jamais où nous estions, que luy tenant compagnie, mais la malicieuse Daphnis le jugea presque d'abort, parce disoit-elle, qu'Amidor n'estoit pas tant aymable qu'il pûst convier un si honneste Berger que Filandre, à user de si soigneuse recherche, de sorte qu'il falloit que ce fust pour quelque plus digne sujet. Elle fut cause que je commençay de m'en prendre garde, & faut que j'advouë qu'alors sa discretion me plut, & si j'eusse pû souffrir d'estre aymée c'eust esté de luy, mais l'heu re n'estoit pas encore venuë, que je pouvois estre blessée de ce costé là : Toutefois je ne laissois de me plaire à ses actions, & d'approuver son dessein en quelque sorte. Pour prendre congé de nous, il nous vint accompagner fort loing, & au partir je n'oüis jamais tant d'assurance d'amitié qu'il en dit à Amidor, ny tant d'offres de services pour Filidas, & ceste fole de Daphnis me disoit à l'aureille, figurez vous que c'est à vous qu'il parle, & si vous ne luy respondez, vous luy faittes trop de tort, & lors qu'Amidor usoit de remerciement, elle me disoit, ô qu'il est sot, de croire que ces offrandes s'addressent à son autel ! Mais il sceut si bien dissimuler, qu'il s'acquit du tout Amidor, & gaigna tant sur sa bonne volonté, qu'estant de retour & redisant ce que Filandre l'avoit prié de dire de sa part à Filidas, il adjousta tant d'avantageuses loüanges, que ceste fille prit envie de le voir, & quelques jours apres sans m'en rien dire (parce que quand je parlois de luy, c'estoit avec une certaine nonchalance, qu'il sembloit que ce fust par mespris) ils l'envoyerent prier de les venir voir, Dieu sçait s'il s'en fit solliciter plus d'une fois, car c'estoit tout ce qu'il desiroit le plus, luy semblant qu'il estoit impossible que son dessein eust meilleur commencement : Et de fortune le jour qu'il devoit arriver, Daphnis & moy nous promenions sous quelques arbres, qui sont de l'autre costé de ce pré, le plus pres d'icy : Et ne sçachant presque à quoy nous entretenir, cependant que nos trouppeaux paissoient, allions incertaines où nos pas sans élection nous guidoient, lors que nous entr'ouysmes une voix d'assez loing : & qui d'abord nous sembla estrangere. Le desir de la cognoistre nous fit tourner droit au le lieu où la voix nous conduisoit, & par ce que Daphnis alloit la premiere, elle recognut Filandre avant que moy, & me fit signe d'aller doucement, & quand je fus pres d'elle s'approchant de mon aureille, elle me nomma Filandre, qui du dos appuyé contre un arbre, entretenoit ses pensées, lassé (comme il y avoit apparance) de la longueur du chemin, & par hazard quand nous arrivasmes, il recommença de cette sorte.

MADRIGAL.

  D'un cœur outrecuidé,
Je mesprisois Amour, ses ruzes ? & ses charmes :
Lors que changeant ses armes,
Des vostres contre moy, le trompeur s'est aidé :
Et toutefois avant que de m'en faire outrage ?
Il me tint ce langage.
  Un Dieu contre mes loix arrogant devenu,
Pour avoir obtenu
D'un Serpent la victoire,
Voulut nier ma gloire :
  Mais quoy d'une Daphné ? ne le rendis-je Amant
Pour luy montrer ma force ?
  Que si j'ay ses desirs, mis sous sa froide escorce,
Juge quel chastiment ?
Sera le tien Filandre.
  Car le feu qui brusla ce Dieu si glorieux,
Ne vint que des beaux yeux,
D'une Nymphe qu'encor toute insensible il aime :
Mais je veux que le tien
Bien plus grand que le sien,
Vienne non d'une Nymphe : ains de Diane mesme.

  Quand je m'ouys nommer, belles Bergeres, je tressaillis, comme si sans y penser j'eusse mis le pied sur un serpent, & sans vouloir attendre davantage, je m'en allay le plus doucement que je pûs pour n'estre pas veuë, quoy que Daphnis ? pour m'y faire retourner, me laissast aller assez loing toute seule. En fin voyant que je continuois mon chemin, elle s'esloigna peu à peu de luy pour n'estre point ouye : & puis vint à toute course me ratteindre, & avant presque qu'elle eust repris haleine, elle m'alloit criant mille reproches interrompuë. Et quand elle pût parler, sans mentir, me dit-elle, si le Ciel ne vous punit, je croiray qu'il est aussi injuste que vous, & quelle cruauté est la vostre, de ne vouloir seulement escouter celuy qui se plaint ? Et à quoy me pouvoit servir, luy dis-je, de demeurer là plus longuement ? Pour ouyr, me dit-elle, le mal que vous luy faites. Moy ? respondis-je, vous estes une mocqueuse de dire que je fasse du mal à une personne en qui mesme je ne pense pas. C'est en quoy, me repliqua-elle, vous le travaillez plus : car si vous pensiez souvent en luy, il seroit impossible que vous n'en eussiez pitié. Je rougis, à ce mot, & le changement de couleur fit bien cognoistre à Daphnis que ces paroles m'offensoient. Cela fut cause qu'en se sousriant, elle me dit : Je me mocque, Diane c'est pour passe-temps ce que j'en dis, & ne croy pas qu'il y pense, & quant à ce qu'il chantoit ? où il a nommé vostre nom, c'est pour certain pour quelqu4autre qui a un mesme nom, ou que pour se desennuyer, il va chantant ces vers, qu'il a appris de quelqu'autre. Nous allasmes discourant de ceste sorte, & si longuement, qu'ennuyées du promenoir nous revinsmes par un autre chemin, au mesme lieu où estoit Filandre. Quant à moy ce fut par mesgarde, il peut bien estre que Daphnis le fit à dessein, & nous trouvant si pres de luy, je fus contrainte de le considerer : auparavant il estoit assis, & appuyé contre un arbre : mais à ce coup nous le trouvasmes couché de son long en terre un bras sous la teste, & sembloit qu'il veillast, car il avoit devant luy une lettre, toute moüillée des pleurs qui luy couloient le long du visage ; mais en effect il dormoit : y ayant apparance, que lisant ce papier le travail du chemin avec ses profonds pensers l'eust peu à peu assoupy : & en fusmes encores plus cer taines, quand Daphnis plus assurée que moy, se baissant lentement, m'apporta la lettre toute moüillée des larmes qui trouvoient passage sous sa paupiere mal close, cette veuë me toucha de pitié, mais beaucoup plus sa lettre qui estoit telle.

LETTRE DE FILANDRE
A DIANE.

  Ceux qui ont l'honneur de vous voir courent une dangereuse fortune. S'ils vous aiment ils sont outrecuidez, & s'ils ne vous aiment point ils sont sans jugement, vos perfections estant telles, qu'avec raison elles ne peuvent, ny estre aimées ny n'estre point aimées, & moy estant contraint de tomber en l'une de ces deux erreurs, j'ay choisi celle qui a plus esté selon mon humeur, & dont aussi bien il m'estoit impossible de me retirer. Ne trouvez donc mauvais, belle Bergere, puis qu'on ne vous peut voir sans vous aimer, que vous ayant veuë je vous aime. Que si cette temerité merite chastiement, ressouvenez-vous que j'aime mieux vous aimer en mourant, que vivre sans vous aimer. Mais, que dis-je, j'aime mieux ? il n'est plus en mon choix, car il faut que par necessité je sois tant que je vivray, aussi veritablement vostre serviteur, que vous ne sçauriez estre telle que vous estes, sans estre la plus belle Bergere qui vive.

  A peine pûs-je achever cette lettre que je m'en retournay toute tremblante, & Daphnis la remit si doucement où elle l'avoit prise, qu'il ne s'en esveilla point, & s'en revenant à moy qui l'attendois assez pres de là, Me permettez vous de parler ? me dit-elle. Nostre amitié, luy respondis-je, vous en donne toute puissance. En verité, continua-elle, je plains Filandre, car il est tout vray qu'il vous aime, & m'asseure, qu'en vostre ame vous n'en doutez nullement. Daphnis, luy dis-je, qui aura failly en fera la penitence. Si cela estoit, me repliqua-elle, Filandre n'en feroit point, car je n'advouëray jamais que ce soit faute de vous aimer, & croirois que ce seroit plutost offenser, que de ne le faire pas, puis que les choses belles n'ont esté faites que pour estre aimées & cheries. Je me remets à vostre jugement, luy dis-je, si mon visage doit estre mis entre les choses qui sont nommées belles. Mais je vous conjure seulement par nostre amitié de ne luy jamais faire sçavoir que j'aye quelque cognoissance de son intention, & si vous l'aimez, conseillez luy de ne m'en point parler, car vous estimant, & Callirée comme je faits, je serois marrie qu'il me fallust le bannir de nostre com pagnie, & vous sçavez bien que j'y serois contrainte, s'il prenoit la hardiesse de m'en parler : Et comment voulez-vous donc qu'il vive ? me dit-elle. Comme il vivoit, luy dis-je, avant qu'il m'eust veuë. Mais, me repliqua-elle, cela ne se peut plus, puis qu'alors il n'avoit point encor esté attaint de ce feu qui le brusle. Qu'il en cherche, luy dis-je, luy-mesme les moyens, sans m'offenser, qu'il esteigne ce feu. "Le feu, dit-elle, qui se peut esteindre n'est pas grand, & le vostre est extréme. Le feu, adjoustay-je, pour grand qu'il soit ne brusle si on ne s'en approche : encor, me dit-elle, que celuy qui s'est bruslé fuye ce feu, il ne laisse d'avoir la bruslure, & en fuyant d'en emporter la cuisseur". Pour conclusion, luy dis-je, si cela est j'aime mieux estre le feu que le bruslé. Avec semblables discours nous revinsmes vers nos trouppeaux, & sur le soir les ramenasmes en nos hameaux, où nous trouvasmes Filandre, auquel Filidas faisoit tant de bonne chere, & Amidor aussi ; que Daphnis croyoit qu'il les eust ensorcellez, n'estant pas leur humeur de traitter ainsi avec les autres. Il demeura quelques jours avec nous, durant lesquels il ne fit jamais semblant de moy, vivant avec une si grande discretion, que n'eust esté ce que Daphnis & moy en avions veu, nous n'eussions jamais soupçonné son intention. En fin il fut contraint de partir, & ne sçachant à quoy se resoudre, s'en alla chez sa sœur, parce qu'il l'aimoit & se fioit en elle comme en soy-mes me. Cette Bergere, comme je vous ay dit, avoit esté mariée par authorité, & n'avoit autre contentement que celuy que l'amitié qu'elle portoit à ce frere, luy pouvoit donner : soudain qu'elle le vid, elle fut curieuse, apres les premieres salutations, de sçavoir quel avoit esté son voyage, & luy ayant respondu qu'il venoit de chez Filidas, elle luy demanda des nouvelles de Daphnis & de moy ; à quoy ayant satisfait, & l'oyant parler avec tant de loüange de moy, elle luy dit à l'aureille. J'ay peur, mon frere, que vous l'aimiez mieux que moy. Je l'aime, respondit-il, comme son merite m'y oblige. Si cela est, repliqua-elle, j'ay bien deviné, car il n'y a Bergere au monde qui ait plus de merite, & il faut que j'advouë que si j'estois homme, voulust elle ou non, je serois son serviteur. Je croy ma sœur, luy respondit-il, que vous le dittes à bon esciant. Je le vous jure, dit-elle, sur ce que j'ay de plus cher. Je pense, repliqua-il, que si cela estoit, vous ne seriez pas sans affaire : car à ce que j'ay pû juger, elle est d'une humeur qui ne seroit pas aisée à fleschir, outre que Filidas en meurt de jalousie, & Amidor la veille de sorte, que jamais elle n'est sans l'un des deux. O mon frere, s'écria-elle, tu és pris, puis que tu as remarqué ces particularitez, ne me le celes plus, & sans mentir si c'est faute que d'aimer, celle-là est fort pardonnable, & sans le laisser, le pressa de sorte, qu'apres mille protestations & autant de supplications, de n'en faire jamais semblant, il le luy advoüa, & avec des paroles si affectionnées, qu'elle eust bien esté incredule, si elle en eust douté : & lors qu'elle luy demanda comment j'avois receu ceste declaration. O Dieux ! luy dit-il, si vous sçaviez quelle est son humeur, vous diriez que jamais persone n'entreprit un dessein plus difficile. Tout ce que j'ay pû faire jusques icy, a esté de tromper Filidas & Amidor, leur faisant croire qu'il n'y a rien au monde qui soit plus à eux que moy, & j'y suis si bien parvenu, qu'ils m'envoyerent prier de les voir, & lors luy fit tout le discours de ce qui s'estoit passé entre eux. Mais, dit-il, continuant son discours, quoy que j'y fusse allé en dessein de descouvrir à Diane combien je suis à elle, si n'ay-je jamais osé, tant son respect a eu de force sur moy, qui me fait desesperer de le pouvoir jamais, si ce n'est qu'une longue pratique m'en donne la hardiesse, mais cela ne peut estre, sans que Filidas & Amidor s'en prennent garde : Si bien, ma sœur, que pour vous dire l'estat où je suis, c'est presque en un desespoir. Callirée qui aimoit ce frere plus que tout autre chose, ressentit sa peine si vivement, qu'apres y avoir quelque temps pensé, elle luy dit. Voulez-vous, mon frere, qu'en ceste occasion je vous rende une preuve de ma bonne volonté. Ma sœur, luy respondit-il, quoy que je n'en sois point en doute, si est-ce que ny en cet accident, ny en tout autre, je n'en refuseray jamais de vous, car "les tesmoignages de ce que nous desirons ne laissent de nous estre agreables, encor que d'ailleurs nous en soyons assurez". Or bien mon frere, luy dit-elle, puis que vous le voulez je vous rendray donc cestuy-cy, qui ne sera pas petit, pour le hazard en quoy je me mettray : Et puis elle continua, vous sçavez la ressemblance de nos visages, de nostre hauteur, & de nostre parole, & que si ce n'estoit l'habit, ceux mesmes qui sont d'ordinaire avec nous, nous prendroient l'un pour l'autre : Puis que vous croyez que le seul moyen de parvenir à vostre dessein, est de pouvoir demeurer sans soupçon aupres de Diane, en pouvons nous trouver un plus aisé ny plus secret, que de changer d'habits vous & moy, car vous estant pris pour fille, Filidas n'entrera jamais en mauvaise opinion, quel sejour que vous fassiez pres de Diane, & moy revenant vers Gerestan avec vos habits, luy feray entendre que Daphnis & Diane vous auront retenuë par force : Et ne faut qu'inventer quelque bonne excuse pour avoir congé de mon mary pour les aller voir, mais je ne sçay quelle elle sera, puis que comme vous sçavez il en est assez difficile. Vrayement ma sœur, respondit Filandre, je n'ay jamais douté de vostre bon naturel, mais à ceste heure il faut que j'advoüe, qu'il n'y eust jamais une meilleure sœur, & puis qu'il vous plaist de prendre ceste peine, je vous supplie si je la reçois, d'accuser mon Amour qui m'y force, & de croire que c'est le seul moyen de conserver la vie à ce frere que vous aimez, & lors il l'embrassa avec tant de recognoissance de l'obligation qu'il luy avoit, qu'elle devint plus desireuse de l'y servir, qu'elle n'estoit pas auparavant. En fin, elle luy dit, Mon frere laissons toutes ces paroles pour d'autres qui s'aiment moins, & voyons seulement de mettre la main à l'œuvre. Pour le congé, dit-il, nous l'obtiendrons aisément, faignant que toute la bonne chere qui m'a esté faite chez Filidas, n'a esté que pour l'intention qu'Amidor a de rechercher la niepce de vostre mary ; & parce que ceste charge luy ennuye, je m'assure qu'il sera bien aise que vous y alliez, luy faisant entendre que vous & Daphnis ensemble pourriez aisément traitter ce mariage. Mais quel ordre mettrons-nous en nos cheveux, car les vostres trop longs, & les miens trop courts, nous rapporteront bien de l'incommodité ? Ne vous souciez de cela, luy dit-elle, pour peu que vous laissiez croistre les vostres ils seront assez grands pour vous coiffer comme moy, & quant aux miens, je les coupperay comme les vostres. Mais luy dit-il, ma sœur ne plaindrez-vous point vostre poil ? Mon frere, luy repliqua-elle, ne croyez point que j'aye rien de plus cher que vostre contentement, outre que j'eviteray tant d'importunitez, cependant que vous porterez mes habits, ne couchant point aupres de Gerestan, que s'il falloit avec mon poil, ma peau, encores je ne ferois point de difficulté de la coupper. A ce mot il l'embrassa, luy disant, que Dieu quelquefois la delivreroit de ce tourment, & dés lors se resolurent d'effectuer leur dessein, & Filandre pour ne perdre temps, à la premiere occasion qui luy sembla à propos, en parla à Gerestan, luy representant ceste alliance si faisable & si avantageuse, que Gerestan s'y laissa porter fort aisément. Et parce que Filandre vouloit donner loisir à ses cheveux de croistre, il faignit d'aller donner quelque ordre à ses affaires, & qu'il seroit bien tost de retour. Mais Filidas ne sceut plutost Filandre de retour que elle ne l'allast visiter, accompagnée seulement d'Amidor, & n'en voulut partir sans le ramener vers nous, où il demeura sept ou huit jours sans avoir plus de hardiesse de se declarer à moy que la premiere fois.

  Durant ce temps, pour monstrer combien il est malaisé de forcer longuement le naturel, quoy que Filidas contrefist l'homme tant queelle pouvoit, si fust-elle contrainte de ressentir les passions de femme, car les recherches & les merites de Filandre firent l'effait en elle, qu'il desiroit qu'elles fissent en moy : Mais "Amour qui se plaist à rendre les actions des plus advisez toutes contraires à leurs desseins", luy fit faire coup sur ce qu'il visoit le moins. Ainsi voila la pauvre Filidas tant hors d'elle mesme, qu'elle ne pouvoit vivre sans Filandre, & luy faisoit des recherches si apparantes, qu'il en demeuroit tout estonné, & n'eust esté le desir qu'il avoit de pouvoir demeurer pres de moy, il n'eust jamais souffert ceste façon de vivre. En fin quand il jugea que ses cheveux estoient assez longs pour se coiffer, il retourna chez Gerestan, & luy raconta qu'il avoit donné un bon commencement à leur affaire, mais que Daphnis avoit jugé à propos avant qu'elle en parlast, qu'Amidor vist sa niepce en quelque lieu, afin de sçavoir, si elle luy seroit agreable, & que le meilleur moyen estoit que Callirée l'y conduist, qu'aussi bien ce seroit un commencement d'amitié qui ne pouvoit que leur profiter. Gerestan qui ne desiroit rien avec tant de passion que d'estre deschargé de ceste niepce, trouva ceste proposition fort bonne, & le commanda fort absolument à sa femme, qui pour luy en donner plus de volonté fit semblant de ne le pas approuver beaucoup, pour le commencement, mettant quelque difficulté à son voyage, & monstrant de partir d'aupres de luy à regret, disant qu'elle sçavoit bien que telles affaires ne se manient pas comme l'on veut, ny si promptement que l'on se le propose, & que cependant leurs affaires domestiques n'en iroient pas mieux. Mais Gerestan, qui ne vouloit qu'elle eust autre volonté que la sienne, s'y affectionna de sorte, que trois jours apres il la fit partir avec son frere & sa niepce. La premiere journée elle alla coucher chez Filandre, où le matin ils changerent d'habits, qui estoient si bien faits l'un pour l'autre, que ceux mesme qui les accompagnoient n'y recognurent rien : & faut que j'advoüe, que j'y fus deceuë comme les autres, n'y ayant entr'eux difference quelconque que je pusse remarquer : Mais j'y pouvois estre bien aisément trompée, puis que Filidas le fut, quoy qu'elle ne vist que par les yeux de l'Amour, qu'on dit avoir plus penetrants qu'un linx, car soudain qu'ils furent arrivez, elle nous laissa la fainte Callirée, je veux dire Filandre, & emmena la vraye dans une autre chambre pour se reposer, le long du chemin son frere l'avoit instruite de tout ce qu'elle avoit à luy respondre, & mesme l'avoit advertie des recherches qu'elle luy faisoit, qui ressembloient, disoit-il, à celles que les personnes qui aiment ont accoustumé. Dequoy & l'un & l'autre estoit fort scandalizé, & quoy que Callirée fust fort resoluë de supporter toutes ses importunitez pour le contentement de son frere, si est-ce qu'elle qui croyoit Filidas estre homme, en avoit tant d'horreur que ce n'estoit pas une foible contrainte que celle qu'elle se faisoit de luy parler. Quant à nous, lors que nous fusmes retirées seules, Daphnis & moy fismes à Filandre toutes les caresses, qu'entre femmes on a de coustume, je veux dire entre celles où il y a de l'amitié & de la privauté, que ce Berger recevoit & rendoit avec tant de transport, qu'il m'a depuis juré, qu'il estoit hors de soy-mesme : si je n'eusse esté bien enfant peut-estre que ses actions me l'eussent fait recognoistre : & toutefois Daph nis ne s'en douta point, tant il se sçavoit bien contrefaire. Et parce qu'il estoit des-ja tard apres le soupper, nous nous retirasmes à part ce pendant que Callirée & Filidas se promenoient le long de la chambre : Je ne sçay quant à moy quels furent leurs discours, mais les nostres c'estoient tant d'assurances d'amitié, que Filandre me faisoit d'une si entiere affection, qu'il estoit aisé à juger que si plutost & en autre habit il ne m'en avoit rien dit, il ne le falloit point blasmer de deffaut de volonté, mais de hardiesse seulement. Pour moy j'essayois de luy en faire paroistre de mesme, car le croyant fille, je pensois y estre obligée par sa bonne volonté, par son merite, & par la proximité d'elle & de Daphnis. Dés lors Amidor, qui auparavant m'avoit voulu du bien, commença à changer ceste amitié, & à aimer la fainte Callirée, parce que Filandre qui craignoit que sa demeure ne despleust à ce jeune homme, faisoit tout ce qu'il pouvoit pour luy complaire. La volage humeur d'Amidor, ne luy pût permettre de recevoir ces faveurs sans devenir amoureux. Et cela je ne trouvay pas estrange, dautant que la beauté, le jugement, & la courtoisie du Berger, qui ne démantoit en rien les perfections d'une fille, ne luy en donnoient que trop de sujet. Voyez combien Amour est folastre, & à quoy il passe son temps ! à Filidas qui est fille, il fait aimer une fille, & à Amidor un homme, & avec tant de passion, qu'estant en par ticulier, ce seul sujet estoit assez suffisant de nous entretenir. Dieu sçait si Filandre sçavoit faire la fille, & si Callirée contrefaisoit bien son frere, & s'ils avoient faute de prudence à conduire bien chacun son nouvel Amant. La froideur dont Callirée usoit envers moy estoit cause que Filidas n'en avoit point de soupçon, outre que son Amour l'en empeschoit assez : & faut que je confesse que la voyant si fort se retirer à Filidas, Daphnis & moy eusmes opinion que Filandre eust changé de volonté. Dont je recevois un contentement extréme, pour l'amitié que je portois à sa sœur, sept ou huit jours s'escoulerent de cette sorte, sans que personne en trouvast le temps trop long, parce que chacun avoit un dessein particulier. Mais Callirée qui eut peur que son mary ne s'ennuyast de ce sejour, sollicitoit son frere de me faire sçavoir son dessein, qu'il n'y avoit pas apparance que la familiarité qui estoit des-ja entre luy & moy, me pûst permettre de refuser son service, mais luy qui m'alloit tastant de tous costez, n'eust jamais la hardiesse de se declarer, & pour abuser Gerestan, il la pria d'aller vers son mary en l'habit où elle estoit, & que sans doute, il n'y recognoistroit rien, & qu'elle luy fist entendre que par l'advis de Daphnis, elle avoit laissé Callirée chez moy, afin de traitter avec plus de loisir le mariage d'Amidor & de sa niepce. Au commencement sa sœur s'estonna, car son mary estoit assez fascheux. En fin vou lant en tout contenter son frere, elle s'y resolut, & pour rendre ceste excuse plus vray-semblable, ils parlerent à Daphnis du mariage d'Amidor, qu'elle rejetta assez loing pour plusieurs considerations qu'elle leur mit en avant, mais sçachant qu'ils avoient pris ce sujet pour avoir congé de Gerestan, qu'autrement ils n'eussent pû avoir, elle qui se plaisoit en leur compagnie me le communiqua, & fusmes d'advis qu'il estoit à propos de faire semblant que ceste alliance fust faisable, & sur cette resolution elle en escrivit à Gerestan, luy conseillant de laisser sa femme pour quelque temps avec nous, afin que nostre amitié fust cause que l'alliance s'en fist avec moins de difficulté, & qu'elle croyoit que toutes choses y fussent bien disposées.

  Avec ceste resolution Callirée ainsi revestuë, alla trouver son mary, qui déceu de l'habit la prit pour son frere, & receut les excuses du sejour de sa femme, estant bien aise qu'elle y fust demeurée pour ce sujet. Jugez, belles Bergeres, si je n'y pouvois pas bien estre trompée, puis que son mary ne la pût recognoistre. Ce fut en ce temps que la bonne volonté qu'il me portoit augmenta de sorte qu'il n'y eut plus moyen de la celer, quelle force qu'il fist à soy mesme, "la pratique ayant cela de propre qu'elle rend ce qui est aimé plus aimé, & plus hay ce que l'on trouve mauvais" : Et recognoissant son impuissance, il s'advisa de me persuader, qu'encor qu'il fust fille, il ne laissoit d'estre amoureux de moy, avec autant de passion & plus encores que s'il eust esté homme, & le disoit si naïvement, que Daphnis qui m'aimoit bien fort, disoit que jusques à ceste heure elle ne l'avoit jamais recognu, mais qu'il estoit vray qu'elle aussi en estoit amoureuse, & ne le falloit pas trouver estrange, puis que Filidas qui estoit homme, aimoit de sorte Filandre, que ce n'estoit rien moins qu'Amour, & la dissimulée Callirée juroit qu'une des plus fortes occasions qui avoient contraint son frere à s'en aller, estoit la recherche qu'il luy faisoit : Et me sceurent dire tant de raisons, que je me laissay aysément persuader que cela estoit, me semblant mesme qu'il n'y avoit rien qui me pûst importer. Ayant donc receu ceste fainte, elle ne faisoit plus de difficulté de me parler librement de sa passion, mais toutefois comme femme, & parce qu'elle me juroit que les mesmes ressentiments, & les mesmes passions que les hommes ont pour l'Amour, estoient en elle, & que de les dire, luy estoit soulagement, bien souvent estant seules, & n'ayant point cet entretien desagreable, elle se mettoit à genoux devant moy, & me representoit ses veritables affections, & Daphnis mesme qui s'y plaisoit, quelquefois l'y convioit.

  Douze ou quinze jours s'escoulerent ainsi, avec tant de plaisir pour Filandre qu'il m'a juré n'avoir jamais passé des jours plus heureux, quoy que ses desirs luy donnassent de conti nuels mouvements, & cela fut cause que augmentant de jour à autre en son affection, & se plaisant en ses pensers, bien souvent il se retiroit seul pour les entretenir en son à-part, & parce que le jour il ne vouloit nous esloigner, quelquefois la nuit, quand il pensoit que chacun dormoit, il sortoit de sa chambre, & s'en alloit dans un jardin, où sous quelques arbres il passoit une partie du temps en ses considerations, & parce que plusieurs fois il sortit de ceste sorte, Daphnis s'en prit garde, qui couchoit en mesme chambre, & comme ordinairement on soupçonne plutost le mal que le bien, elle eut opinion de luy & d'Amidor, pour la recherche que ce jeune Berger luy faisoit : & pour s'en asseurer, elle veilla de sorte faignant de dormir, que voyant sortir la fainte Callirée du lict, elle la suivit de si pres, qu'elle fut presque aussi tost que ce jeune Berger, dans la basse court, n'ayant mis sur elle qu'une robe à la haste, & le suivant pas à pas à la lueur de la Lune, elle le vid sortir de la maison, par une porte mal fermée, & entrer dans un jardin, qui estoit sous les fenestres de ma chambre, & passant jusques au milieu, le vid asseoir sous quelques arbres, & ayant les yeux contre le ciel, ouït qu'il disoit fort haut.

Ainsi ma Diane surpasse,
En beauté les autres beautez,
Comme de nuit la Lune efface,
De clarté les autres clartez.

  Quoy que Filandre eust dit ces paroles assez haut, si est-ce que Daphnis n'en entre-ouït que quelques mots, pour estre trop esloignée, mais prenant le tour un peu plus long, elle s'approcha de luy sans estre veuë, le plus doucement qu'elle pût, quoy qu'il fust si attentif à son imagination, que quand elle eust esté devant luy, il ne l'eust pas apperceuë, à ce que depuis il m'a juré. A peine s'estoit elle mise en terre pres de luy, qu'elle l'ouït souspirer fort haut, & puis peu apres d'une voix assez abatuë dire. Et pourquoy ne veut ma fortune que je sois aussi capable de la servir, qu'elle est digne d'estre servie ? & qu'elle ne reçoive aussi bien les affections de ceux qui l'aiment, qu'elle leur donne d'extresmes passions ? Ah Callirée, que vostre ruse a esté pernicieuse pour mon repos, & que ma hardiesse est punie d'un tres-juste supplice, Daphnis escoutoit fort attentivement Filandre, & quoy qu'il parlast assez clairement, si ne pouvoit-elle comprendre ce qu'il vouloit dire, abusée de l'oppinion qu'il fust Callirée : cela fut cause que luy prestant l'aureille, encores plus curieuse, elle ouit que peu apres rehaussant la voix, il dit. Mais outrecuidé Filandre, qui pourra jamais excuser ta faute, ou quel assez grand chastiment esgalera ton erreur ? Tu aymes ceste Bergere, & ne voy tu pas qu'autant que sa beauté te le commande, autant te le deffend son honnesteté ? combien de fois t'en ay-je adverty ? & si tu ne m'as voulu croire, n'accuse de ton mal que ton imprudence. A ce mot sa langue se teut, mais ses yeux & ses souspirs en son lieu commencerent à rendre tesmoignage quelle estoit la passion, dont il n'avoit pû descouvrir que si peu, & pour se divertir de ses pensers, ou plus tost pour les continuer plus doucement, il se leva de ce lieu, pour se promener comme de coustume, & si promptement, qu'il apperceut Daphnis, quoy que pour se cacher elle se mist à la fuitte, mais luy qui l'avoit veuë, pour la recognoistre, la poursuivit jusques à l'entrée d'un bois de coudriers, où il l'atteignit, & pensant qu'elle eust descouvert tout ce qu'il avoit tenu si caché, demy en colere, il luy dit. Et quelle curiosité, Daphnis, est celle-cy de me venir espier de nuit en ce lieu ? C'est, respondit Daphnis en sousriant, pour apprendre de vous par finesse, ce que je n'eusse sceu autrement, (& en cela elle pensoit parler à Callirée, n'ayant pas encore descouvert qu'il fust Filandre). Et bien (reprit Filandre, pensant estre descouvert) quelle si grande nouveauté y avez vous apprise ? Toute celle dit Daphnis que j'en voulois sçavoir. Vous voyla donc, dit Filandre, bien satisfaite de vostre curiosité ? Aussi bien, respondit-elle, que vous l'estes & le serez mal de vostre ruse car tout ce sejour pres de Diane, & toute ceste grande affection que vous luy facites paroistre, ne vous rapporteront enfin que de l'ennuy, & du desplaisir. O Dieux, dit Filandre est-il possible que je sois descouvert ! Ah discrette Daphnis, puis que vous sçavez ainsi le sujet de mon sejour, vous avez bien entre vos mains, & ma vie & ma mort, mais si vous vous ressouvenez de ce que je vous suis, & quels offices d'amitié vous avez receu de moy, quand l'occasion s'en est presentée, je veux croire que vous aymerez mieux mon bien & mon contentement, que non pas mon desespoir ny ma ruine. Daphnis pensoit encores parler à Callirée, & avoit opinion que toute ceste crainte fust à cause de Gerestan, qui eust trouvé mauvais (s'il en eust esté adverty) qu'elle fist cette office à son frere ; & pour l'en assurer luy dit, tant s'en faut que vous ayez à redouter ce que je sçay de vos affaires, que si vous m'en eussiez advertie, j'y eusse contribué, & tout le conseil, & toute l'assistance que vous eussiez pû desirer de moy, mais racontes moy d'un bout à l'autre tout ce dessein, afin que vostre franchise m'oblige plus à vous y servir, que la meffiance que vous avez euë de moy ne me peut avoir offensée. Je le veux, dit-il, ô Daphnis, pourveu que vous me promettiez de n'en rien dire à Diane, que je n'y consente. C'est un discours, respondit la Bergere, qu'il ne luy faut pas faire mal à propos, son humeur estant peut-estre plus estrange que vous ne croiriez pas en cela. C'est là mon grief dit Filandre, ayant dés le commencement assez recognu que j'entreprenois un dessein presque impossible : Car d'abort que ma sœur, & moy resolusmes de changer d'habit, elle prenant le mien, & moy le sien, je prevy bien que tout ce qui m'en reüssiroit de plus advantageux, seroit de pouvoir vivre plus librement quelques jours aupres d'elle, ainsi dissimulé que si elle me recognoissoit pour Filandre. Comment, interrompit Daphnis toute surprise, comment pour Filandre ? N'estes-vous pas Callirée ? Le Berger qui pensoit qu'elle l'eust auparavant recognu, fut bien marry de s'estre descouvert si legerement, toutefois voyant que la faute estoit faitte, & qu'il ne pouvoit plus retirer la parole qu'il avoit proferée, pensa estre à propos de s'en prevaloir, & luy dit : Voyez Daphnis, si vous avez occasion de vous douloir de moy, & de dire que je ne me fie pas en vous, puis que si librement je vous descouvre le secret de ma vie : car ce que je viens de vous dire m'est de telle importance, qu'aussi tost qu'autre que vous le sçaura, il n'y a plus d'esperance de salut en moy : mais je veux bien m'y fier, & me remettre tellement en vos mains, que je ne puisse vivre que par vous : sçachez donc Bergere, que vous voyez devant vous Filandre sous les habits de sa sœur, & qu'Amour en moy, & la compassion en elle, nous a ainsi desguisez  ; & apres luy alla racontant son extresme affection, la recherche qu'il avoit faitte d'Amidor, & de Filidas, l'invention de Callirée à changer d'habits, la resolution d'aller trouver son mary vestuë en homme, bref tout ce qui s'estoit passé en cet affaire, avec tant de demonstration d'Amour, qu'encores qu'au commencement Daphnis se fust estonnée de la hardiesse de luy & de sa sœur, si est- ce qu'elle en perdist l'estonnement, quand elle recognut la grandeur de son affection, jugeant bien qu'elle les pouvoit porter à de plus grandes folies. Et encore que si elle eust esté appellée à leur conseil, lors qu'ils firent ceste entreprise, elle n'en eust jamais esté d'advis : toutefois voyant comme l'effet en avoit bien reüssi, elle resolut de luy ayder en tout ce qui luy seroit possible, & n'y espargner ny peine ny soing, ny artifice qu'elle jugeast despendre d'elle, & le luy ayant promis avec plusieurs asseurances d'amitié, elle luy donna le meilleur advis qu'elle pût, qui estoit de m'engager peu à peu en son amitié. Car disoit-elle, "l'Amour envers les femmes, est un de ces outrages, dont la parole offense plus que le coup. C'est un ouvrage que nul n'a honte de faire, pourveu que le nom luy en soit caché". De sorte que j'estime ceux-là bien advisez, qui se font aymer à leurs Bergeres avant que de leur parler d'Amour. Dautant qu'"Amour est un animal qui n'a rien de rude que le nom, estant d'ailleurs tant agreable, qu'il n'y a personne qui s'en deplaise". Et par ainsi pour estre receu de Diane, il faut que ce soit sans le luy nommer, ny mesme sans qu'elle le voye, & user d'une telle prudence qu'elle vous ayme, aussi tost qu'elle pourra sçavoir que vous l'aimez d'Amour, car y estant embarquée, elle ne pourra par apres se retirer au port, encore qu'elle voye quelque apparence de tourmente autour d'elle. Il me semble que jus ques icy vous vous y estes conduit avec une assez grande prudence, mais il faut continuer. La fainte que vous avez faitte d'estre amoureuse d'elle, encores que fille, est tres à propos, estant tres-certain que "toute Amour qui est soufferte, en fin en conçoit une reciproque". Mais il faut passer plus outre. "Nous faisons aisément plusieurs choses qui nous sembleroient fort difficiles, si la coustume ne nous les rendoit aysées. C'est pourquoy ceux qui n'ont pas accoustumé une viande, la treuvent au commencement d'un goust fascheux, qui peu à peu se rend agreable par l'usage". Il faut que de là vous appreniez à rendre à Diane les discours amoureux plus aisez, & que par la coustume, ce qui luy est si inaccoustumé, luy soit ordinaire, & pour mieux y parvenir, il faut trouver quelque invention pour luy rendre agreable vostre recherche, & que vous luy puissiez parler, encores que fille, aux mesmes termes que les Bergers : Car "tout ainsi que l'aureille qui a accoustumé d'oüir la Musique, est capable d'y plier mesme la voix, & la hosser, & baisser aux tons qui sont concordans, encor que d'ailleurs on ne sçache rien en cet art. De mesme la Bergere qui oyt souvent les discours d'un Amant, y plie les puissances de son ame, & encor qu'elle ne sçache point aymer, ne laisse à se porter insensiblement aux ressentiments de l'amour" : Je veux dire qu'elle ayme la compagnie de ceste personne, en ressent l'esloignement, a pitié de son mal, & bref aime en effet sans y penser. Voyez vous, Filandre, ne faictes pas vostre profit de ces instructions ailleurs, & ne croyez pas que si je ne vous aymois, & n'avois pitié de vous, je vous descouvrisse ces secrets de l'escole, mais recevez ce que je vous dis pour arrhes de ce que je desire faire pour vous. Avec semblables paroles voiant que le jour approchoit, ils se retirerent dans le logis, non pas sans se mocquer de l'Amour d'Amidor, qui le prenoit pour fille, & de raporter une partie de ses discours pour en rire. Et s'estant sur le matin endormis en ceste resolution, ils demeurerent bien tard au lict, pour se recompenser de la perte de la nuit, ce qui donna commodité au jeune Amidor de les y surprendre, & n'eust esté que presque en mesme temps j'entray dans leur chambre, je croy qu'il eust peut-estre recognu la tromperie, car s'estant adressé au lict de la fainte Callirée, quoy qu'elle joüast bien son personnage, luy parlant avec toute la modestie qu'il luy estoit possible, & luy montrant un visage severe pour luy oster la hardiesse de ne se point hazarder, si est-ce que son affection l'eust peut-estre licentié, & que ses mains indiscrettes eussent descouvert son sein. Mais à mon abort Daphnis me pria de l'en empescher, & de les séparer, ce que je fis avec beaucoup de contentement de Filandre, qui faignant de m'en remercier, me baisa la main avec tant d'affection, que si je l'eusse tant soit peu soupçonné, j'eusse bien recognu, que veritablement il y avoit de l'Amour. Apres leur ayant donné le bon jour, je ramenay Amidor avec moy, afin qu'ils eussent le loisir de s'abiller.

  Et parce qu'ils avoient dessein de parachever ce qu'ils avoient proposé, incontinent apres disner que nous estions retirez comme de coustume soubs quelques arbres, pour jouïr du fraiz, encore qu'Amidor y fust, Daphnis jugea que l'occasion estoit bonne, estant bien aise que ce fust mesme en sa presence, pour luy en oster tout soupçon, & que si à l'advenir il l'oyoit par mesgarde parler quelquefois en homme, il ne le trouvast point estrange, faisant donc signe à Filandre, afin qu'il aydast à son dessein, elle luy dit, Et qu'est-ce Callirée, qui vous peut rendre muette en la presence de Diane. C'est respondit-il que j'allois en moy-mesme faisant plusieurs souhaits, pour la volonté que j'ay de faire service à ma maistresse, & entre autres un, que je n'eusse jamais pensé devoir desirer. Et quel est-il ? interrompit Amidor. C'est continua Filandre, que je voudrois estre homme pour rendre plus de service à Diane. Et comment, adjousta Daphnis, estes vous amoureuse d'elle ? Plus respondit Filandre, que ne le sçauroit estre tout le reste de l'univers. J'aime donc mieux, dit Amidor, que vous soyez fille, tant pour mon advantage, que pour celuy de Filidas. La consideration de l'un, ny de l'autre, repliqua Filandre, ne me fera pas changer de desir. Et quoy ? adjousta Daphnis, auriezvous opinion que Dia ne vous aymast davantage. Je le devrois ainsi esperer dit Filandre par les loix de Nature, si ce n'est que comme en sa beauté elle en outrepasse les forces, qu'en son humeur elle en desdaigne les ordonnances. Vous me croirez telle qu'il vous plaira (luy dis-je), si vous fais-je serment veritable, qu'il n'y a homme au monde que j'ayme plus que vous. Aussi (me repliqua-il) n'y a-il personne qui vous ayt tant voüé de service, mais ce bon heur ne me durera que jusques à ce que vous aurez recognu mon peu de merite, ou que quelque meilleur sujet se presente. Me croyez-vous (luy repliquay-je), si volage que vous me faictes. Ce n'est pas (me respondit-il), que je croye en vous les imperfections de l'inconstance, mais je sçay bien que j'en ay les causes pour les deffauts qui sont en moy. Le deffaut, luy dis-je, est plustost de mon costé, & à ce mot je l'embrassay, & le baisay d'une aussi sincere affection que s'il eust esté ma sœur. Dequoy Daphnis sousrioit en soy-mesme, me voyant si bien abusée, surquoy Amidor nous interrompant, jaloux (comme je croy) de tous deux. Je pense, dit-il, que c'est à bon escient, & que Callirée ne se mocque point. Comment, dit-il, me moquer ? que le ciel me punisse plus rigoureusement qu'il ne chastia jamais parjure, s'il y eust oncques Amour plus violente, ny plus passionnée que celle que je porte à Diane. Et si vous estiez homme, adjousta Daphnis, sçauriez-vous bien user des paroles d'homme, pour declarer vostre passion. Encores, respondit-il, que j'aye peu d'esprit, si est-ce que mon extresme affection ne me lairroit jamais muette en semblable occasion. Et voyons, dit Amidor, si ce ne vous est peine, comme, belle Bergere, vous vous démesleriez d'une telle entreprise. Si ma maistresse, dit Filandre, me le permet, je le feray, avec promesse toutefois qu'elle m'accordera trois supplications que je luy feray. La premiere, qu'elle me respondra à ce que je luy diray ; l'autre, qu'elle ne croira point estre fainte, ce que soubs autre personne que de Callirée, je luy representeray, mais les recevra comme tres-veritables, encores qu'impuissantes passions, & pour la fin, qu'elle ne permettra que jamais autre que moi la serve en ceste qualité. Moy qui voyois que chacun y prenoit plaisir, & aussi que veritablement j'aymois Filandre, sous les habits de sa sœur, luy respondis, que pour la seconde & derniere demande elles luy estoient accordées, tout ainsi qu'elle les sçauroit desirer, que pour la premiere, j'estois si peu accoustumée à faire telles responses, que je m'assurois qu'elle y auroit peu de plaisir. Toutefois que pour ne la desdire en rien, j'essayerois de m'en acquitter le mieux qu'il me seroit possible. A ce mot, se relevant sur un genoux, parce que nous estions assis en rond, & me prenant une main, il commença de cette sorte.

  Je n'eusse jamais creu, belle maistresse, considerant en vous tant de perfections, qu'il pûst estre permis à un mortel de vous aymer, si je n'eusse esprouvé en moy-mesme, qu'il est impossible de vous voir & ne vous aimer point. Mais sçachant bien que le Ciel est trop juste pour nous commander une chose impossible, j'ay tenu pour certain qu'il vouloit que vous fussiez aymée, puis qu'il permettoit que vous fussiez veuë, & sur ceste creance j'ay fortifié de raisons la hardiesse que j'avois euë de vous voir, & beny en mon cœur l'impuissance, qui m'a aussi tost sousmis à vous, que mes yeux se sont tournez vers vous. Que si les loix ordonnent, que l'on rende à chacun ce qui est sien, ne trouvez mauvais, belle Bergere, que je vous rende mon cœur, puis qu'il vous est tellement acquis, que si vous le refusez, je le desadvoüe pour estre mien. A ce mot il se teut, pour ouyr ce que je luy respondrois, mais avec une façon, que s'il n'eust point eu l'habit qu'il portoit, mal-aisément eust-on pû douter qu'il ne le dit à bon escient, & pour ne contrevenir à ce que je luy avois promis, je luy fis telle response. Berger, si les loüanges que vous me donnez estoient veritables, je croirois peut-estre ce que vous me dittes de vostre affection, mais sçachant bien que ce sont flatteries, je ne puis croire que le reste ne soit dissimulation. C'est trop blesser vostre jugement, me dit-il, que de douter de la grandeur de vostre merite, mais c'est avec semblables excuses que vous avez accoustumé de refuser les choses que vous ne voulez pas, si puis-je avec verité jurer par nostre Dieu Pan, & vous sçavez bien que je ne me parjure pas, que vous ne refuserez jamais rien qui vous soit donné de meilleure, ny plus entiere volonté. Je sçay bien, luy respondis-je, que les Bergers de ceste contrée, ont accoustumé d'user de plus de paroles, où il y a moins de verité, & qu'ils tiennent entre eux pour chose tres-averée, que les Dieux n'escoutent, ny ne punissent jamais les faux serments des Amoureux. Si c'est un vice particulier de vos Bergers, dit-il, je m'en remets à vostre cognoissance : mais moy qui suis estranger ne dois participer à leur honte, puis que je ne fais pas à leur faute, & toutefois par vos paroles mesmes plus cruelles, il faut que je retire quelque satisfaction pour moy, car encor que les Dieux ne punissent les serments des Amoureux, si je ne le suis pas, comme il semble que vous doutiez, les Dieux ne lairront pas de m'envoyer le chastiment de parjure, & s'ils ne le font, vous serez contrainte d'advoüer, que n'estant point chastié, je ne suis donc point menteur, & que si je suis menteur, & ne suis point chastié, il faut que vous confessiez que je suis Amant. Et par ainsi, de quelque costé que vostre bel esprit se veuille tourner, il ne sçauroit des-avouër, qu'il n'y a point de beauté en la terre, ou Diane est belle, & que jamais beauté n'a esté aymée, ou la vostre l'est de ce Berger, qui est à vos genoux, & qui en cet estat implore le secours de toutes les graces pour en retirer une de vous, qu'il croit meriter, si une parfaitte Amour a jamais eu du merite. Si je suis belle, repliquay-je, je m'en remets aux yeux qui me voyent sainement : mais que vous ne soyez parjure & dissimulée, & il faut Callirée, que je die que l'assurance dont vous me parlez en homme, me fait resoudre à ne croire jamais aux paroles, puis qu'estant fille, vous les sçavez si bien déguiser. Et pourquoy Diane, dit-il lors en sousriant, interrompez-vous si tost les discours de vostre serviteur ? vous estonnez vous qu'estant Callirée, je vous parle avec tant d'affection ? ressouvenez-vous qu'il n'y a impuissance de condition qui m'en fasse jamais diminuer, tant s'en faut, ce sera plutost ceste occasion qui la conservera, & plus violente, & eternelle, puis qu'il n'y a rien qui diminuë tant l'ardeur du desir, que la jouïssance de ce qu'on desire, & cela ne pouvant estre entre nous, vous serez jusques à mon cercueil tousjours aymée, & moy tousjours Amante. Et toutefois si Tiresias, apres avoir esté fille, devint homme, pourquoy ne puis-je esperer que les Dieux me pourroient bien autant favoriser, si vous l'aviez agreable ? Croyez-moy, belle Diane, puis que les Dieux ne font jamais rien en vain, qu'il n'y a pas apparance qu'ils ayent conceu en moy une si parfaitte affection, pour m'en laisser vainement travailler, & que si la nature m'a fait naître fille, que mon Amour extresme me peut bien rendre telle, que ce ne soit point inutilement. Daphnis qui voyoit que ce discours s'alloit fort esgarant, & qu'il estoit dangereux, que cet Amant se laissast transporter à dire chose qui le fist descouvrir par Amidor, l'interrompit, en luy disant, C'est sans doute Callirée, que vostre Amour ne sera point esprise inutilement tant que vous servirez ceste belle Bergere, non plus que le flambeau ne se consume pas en vain, qui esclaire à ceux qui sont dans la maison, car tout le reste du monde n'estant que pour servir ceste belle, vous aurez fort bien employé vos jours, quand vous les aurez passez en son service. Mais changeons de discours, dit Amidor, car voicy venir Filidas, qui ne prendroit nullement plaisir à les ouïr, encore que vous soyez fille, & presque à mesme temps Filidas arriva, qui nous fit toutes lever pour le salüer. Mais Amidor qui aimoit passionnément la fainte Callirée, lors que sa cousine arriva, prit le temps si à propos, que s'esloignant avec Filandre un peu de la trouppe, & la prenant sous les bras, & voyant que personne ne les pouvoit ouyr, commença de luy parler ainsi. Est-il possible, belle Bergere, que les paroles que vous venez de tenir à Diane soient veritables, ou bien si vous les avez dittes seulement pour monstrer la beauté de vostre esprit ? Croyez Amidor, luy respondit-il, que je ne suis point mensongere, & que jamais je ne dis rien plus veritablement, que l'assurance que je luy ay faite de mon affection, que si en quelque chose j'ay manqué à la verité, ç'a esté pour en avoir dit le moins que j'en ressens : mais en cela je dois estre excusée, puis qu'il n'y a point d'assez bonnes paroles pour le pouvoir dire comme je le conçois : A quoy il respondit avec un grand souspir. Puis que cela est, belle Callirée, malaisément puis-je croire que vous ne recognoissiez beaucoup mieux l'affection que l'on vous porte, puis que vous ressentez les mesmes coups dont vous blessez, que non point celles qui en sont du tout ignorantes, & cela sera cause que je n'iray point recherchant d'autres paroles pour vous declarer ce que je souffre pour vous, ny d'autres raisons pour excuser ma hardiesse, que celles dont vous avez usé parlant à Diane, & seulement j'adjousteray ceste consideration, afin que vous cognoissiez la grandeur de mon affection : Que si le coup qui ne se void, se doit juger selon la force du bras qui le donne ; la beauté de Diane, dont vous ressentez la blessure, estant beaucoup moindre que la vostre, doit bien avoir fait moindre effort en vous que la vostre en moy : Et toutefois si vous l'aimez avec tant de violence, considerez comment Amidor doit estre traitté de Callirée, & quelle doit estre son affection, car il ne sçauroit la vous declarer que par la comparaison de la vostre. Berger, luy respondit-il, si la cognoissance que vous avez euë de l'amitié que je porte à Diane, vous a donné la hardiesse de me parler de ceste sorte, il faut que je supporte le supplice que mon inconsideration merite, ayant parlé si ouvertement devant vous, mais aussi deviez-vous avoir esgard, qu'estant fille je ne pouvois luy tenant ces discours offenser son honnesteté, & si faites bien vous en me parlant ainsi, qui ay un mary qui ne supporteroit pas avec patience cet outrage s'il en estoit adverty. Mais outre cela, puis que vous parlez de Diane, à qui veritablement je me suis entierement donnée : encor faut-il que je vous die, que si vous voulez que je mesure vostre affection à la mienne, selon les causes que nous avons d'aimer, je ne croiray pas que vous en ayez beaucoup, puis que ce que vous nommez beauté en moy, n'est de nulle qualité sensible aupres de la sienne. Belle Bergere, luy dit Amidor, je n'ay jamais creu que l'on vous pûst offenser en vous aimant, mais puis que cela est, j'avoüe que je merite chastiment, & que je suis prest à le recevoir tout tel que vous me l'ordonnerez, il est vray que vous devez ensemble vous resoudre à joindre au mesme supplice, tout celuy que je pourray meriter, en vous aimant le reste de ma vie, car il est impossible que je vive sans vous aimer : Et ne croyez point que le mescontentement de Gerestan m'en puisse jamais divertir, celuy qui ne craint, ny les hazards, ny la mort mesme, ne redoutera jamais un homme : Mais quant à ce qui vous touche, j'advouë que j'ay failly en faisant quelque comparaison de vous à Diane, estant sans doute mal proportionnée de son costé, il est vray que ce n'a pas esté comme de chose esgale, mais comme du moindre au plus grand : & ayant eu opinion que ce que vous ressentiez vous donroit plus de cognoissance de ma peine, j'ay commis ceste erreur, en laquelle si vous me pardonnez, je proteste de ne retomber jamais. Filandre qui m'aimoit à bon escient, & qui avoit eu opinion qu'Amidor en fist de mesme, eust malaisément supporté d'ouyr parler de moy avec tant de mespris, s'il n'eust eu dessein de descouvrir ce qui en estoit, mais desirant de s'en esclaircir, & luy semblant d'en avoir rencontré une fort bonne occasion, il eut tant de puissance sur soy-mesme, que sans luy en faire semblant, il luy dit. Comment est-il possible, Amidor, que vostre bouche profere des paroles que vostre cœur desment si fort ? Pensez-vous que je ne sçache pas bien que vous dissimulez, & dés long temps vostre affection est toute pour Diane ? Mon affection ? repliqua-il comme surpris, que jamais personne ne me puisse aimer, si j'ayme autre Bergere que vous, je ne dis pas qu'autrefois je n'aye esté de ses amis, mais son humeur inégale tantost toute de feu, tantost toute de glace m'en a tellement retiré, qu'à cette heure elle m'est indifferente. Et comment, dit Filandre, m'osez vous parler ainsi, puis que je sçay qu'en verité elle vous a aimé & vous aime encores ? Je ne veux pas nier, dit Amidor, qu'elle ne m'ait aimé. Et continua-il en sous-riant, je ne jurerois pas qu'elle ne m'aime encores, mais si ferois bien qu'elle n'est point aimée de moy, & que je luy en laisse tout le soucy. Ce qu'Amidor disoit en cela estoit bien selon son humeur : car c'estoit sa vanité ordinaire, de vouloir qu'on creust qu'il eust plusieurs belles fortunes, & à ceste occasion avoit accoustumé de se rendre à dessein si familier de celles qu'il conversoit, que quand il s'en retiroit, il pouvoit presque par ses sousris & niant froidement, faire croire tout ce qu'il vouloit d'elles. A ce coup Filandre recognut bien son artifice, & n'eust esté qu'il craignoit de se descouvrir, il se sentit tellement touché de mon offense, que je crois qu'il l'eust repris de mensonge, si ne pût-il s'empescher de luy respondre assez aigrement. Vrayement Amidor, vous estes le plus indigne Berger, qui pratique parmy les bonnes compagnies. Vous avez le courage de parler de ceste sorte de Diane, à qui vous montrez tant d'amitié, & à qui vous avez tant d'obligation ? & que pouvons nous esperer, qui n'approchons en rien à ses merites : puis que ny ses perfections, ny son amitié, ny vostre alliance ne vous peuvent attacher la langue ? Quant à moy j'advoüe que vous estes la plus dangereuse personne qui vive, & qui voudra avoir du repos, doit tascher de vous esloigner comme une maladie tres contagieuse. A ce mot il le quitta, & nous vint retrouver, le visage tant enflammé de colere, que Daphnis cognut bien qu'il estoit offensé d'Amidor, qui estoit demeuré si estonné de cette separation, qu'il ne sçavoit ce qu'il avoit à faire. Depuis le soir Daphnis s'enquit de Filandre, de leurs discours, & parce qu'elle m'aimoit, & jugeoit que cela ne pouvoit que beaucoup accroistre l'amitié que je portois à la fainte Callirée, dés le matin elle me le raconta avec tant d'aspreté contre Amidor, & si avantageusement pour Filandre, qu'il faut advoüer que depuis je ne me pûs si aisément deffendre de l'aimer, lors que je le recognus, me semblant que sa bonne volonté m'y obligeoit. Mais Daphnis qui sçavoit bien que si je l'aimois alors c'estoit pour le croire Callirée, le conseilloit ordinairement de se descouvrir à moy, qu'elle croyoit bien qu'au commencement je le rejetterois, & m'en fascherois, mais qu'en fin toutes choses se remettroient, & que de son costé elle y travailleroit de sorte, qu'elle esperoit en venir à bout. Mais elle ne pût avoir d'assez fortes persuasions pour luy en donner le courage, qui fit resoudre Daphnis de le faire elle mesme sans qu'il le sçeust, prevoyant bien que Gerestan voudroit ravoir sa femme, & cette finesse auroit esté inutile.

  En ceste resolution un jour qu'elle me trouva seule, apres quelques discours assez ordinaires : Mais que sera-ce en fin, dit-elle, de ceste folle de Callirée, je croy en verité que vous luy ferez perdre l'entendement : car elle vous aime si passionnément, que je ne croy pas qu'elle puisse vivre. Si Filidas va un jour coucher hors de ceans, & que vous puissiez sortir une nuit de vostre chambre, il faut que vous la voyez en l'estat où je l'ay trouvée plusieurs fois, car presque toutes les nuits qui sont un peu claires, elle les passe dans le jardin, & se plaist de sorte en ses imaginations, que je ne la puis retirer qu'à force de ses resveries. Je voudrois bien, luy respondis-je, luy pouvoir rapporter du soulagement, mais que veut-elle de moy ? ne luy rends-je pas amitié pour amitié ? ne la luy fay-je pas paroistre par toutes mes actions ? manque-je à quelque sorte de courtoisie, ou de devoir envers elle ? Cela est vray, mais, me repliqua-elle, si vous aviez ouy ses discours, je ne croy pas qu'elle ne vous fist compassion, & vous supplie que sans qu'elle le sçache, vous la veniez escouter une nuict. Je le luy promis fort librement, & luy dis que ce seroit bien tost, car Filidas m'avoit dit le soir auparavant, qu'elle vouloit visiter Gerestan & faire amitié avec luy.

  Quelques jours apres Filidas selon son dessein emmenant Amidor avec luy, partit pour aller voir Gerestan, ayant resolu de ne revenir de sept ou huit jours, afin de lui faire paroistre plus d'amitié, & ce sejour nous vint fort à propos, car s'il eust esté en la maison, malaisement luy eussions nous pû cacher le trouble en quoy nous fusmes. Or le mesme jour du départ, Filandre suivant sa coustume, ne manqua pas de descendre au jardin à moytié desabillée,lors qu'elle creut que chacun estoit endormy. Au contraire Daphnis qui s'estoit couchée la premiere, aussi tost qu'elle le vid sortir, se depescha de me le venir dire, & me mettant hastivement une robe dessus, je la suivis assez viste, jusques à ce que nous fusmes dans le jardin : Mais lors qu'elle eut remarqué où il estoit, elle me fit signe d'aller au petit pas apres elle. Et quand nous nous fusmes approchées de sorte que nous le pouvions ouyr, nous nous assismes en terre, & incontinant apres j'ouys qu'il disoit. Mais à quoy toute ceste patience ? à quoy tous ces dilayemens ? ne faut-il pas que tu meures sans secours, ou que tu descouvres ta blessure au Chirurgien qui la peut guerir ? Et là s'arrestant pour quelque temps, il reprenoit ainsi avec un grand souspir : Ne dis-tu pas, ô facheuse crainte, qu'elle nous bannira de sa presence ? & qu'elle nous ordonnera une mort desesperée ? Et bien si nous mourons, ne nous sera-ce pas beaucoup de soulagement d'abreger une si miserable vie que la nostre, & mourant satisfaire à l'offense que nous aurons faite ? Et quant au bannissement s'il ne nous vient d'elle, le pouvons nous éviter de Gerestan, de qui l'impatience ne nous lairra guiere davantage icy ? Que si toutefois nous obtenons un plus long sejour de cet importun, & que la mort ne nous vienne du courroux de la belle Diane, helas ! la pourrons nous eviter de la violence de nostre affection ? Que faut-il donc que je fasse ? Que je luy die ? Ah ! je ne l'offenseray jamais s'il m'est possible. Le luy tairay-je ? Et pourquoy le taire, puis qu'aussi bien ma mort luy en donra une bien prompte cognoissance. Quoy donc je l'offenseray ? Ah ! l'outrage & l'amitié ne vont jamais ensemble. Mourons donc plutost : Mais si je consens à ma mort ne luy fais-je pas perdre le plus fidele serviteur qu'elle ait jamais eu ? & puis est-il possible qu'en adorant on puisse offenser ? Je le luy diray donc, & en mesme temps luy découvriray l'estomac, afin que le fer plus aisément punisse mon erreur, si elle le veut. Voila, luy diray-je, où demeure le cœur de cet infortuné Filandre, qui sous les habits de Callirée, au lieu d'acquerir vos bonnes graces, a rencontré vostre courroux, vengez-vous & le punissez, & soyez certaine que si la vengeance vous satisfait : le supplice luy en sera tres-agreable.

  Belles Bergeres, quand j'ouys parler Filandre de ceste sorte, je ne sçay ce que je devins, tant je fus surprise d'estonnement : Je sçay bien que je m'en voulus aller, afin de ne voir plus ce trompeur, tant pleine de despit que j'en tremblois toute : Mais Daphnis pour achever entierement sa trahison, me retint par force, & parce (comme je vous ay dit) que nous estions fort pres du Berger, au premier bruit que nous fismes il tourna la teste, & croyant que ce ne fust que Daphnis, il s'y en vint, mais quand il m'apperceut, & qu'il creut que je l'avois ouy. O Dieux ! dit-il, quel supplice effacera ma faute ? Ah ! Daphnis, je n'eusse jamais attendu cette trahison de vous. Et à ce mot s'en alla courant par le jardin comme une per sonne insensée, quoy qu'elle l'appellast deux ou trois fois par son nom : mais craignant d'estre ouye de quelqu'autre, & plus encore que le desespoir ne fst faire à Filandre quelque chose de mal à propos en sa personne, elle me laissa seule & se mit à le suivre, me disant toute en colere en partant. Vous verrez, Diane, que si vous traittez mal Filandre, peut-estre vous ruinerez vous de sorte, que vous en ressentirez le plus grand desplaisir. Si je fus estonnée de cet accident, jugez-le belles Bergeres, puis que je ne sçavois pas mesme m'en retourner. En fin apres avoir repris un peu mes esprits, je cherchay de tant de costez, que je revins en ma chambre, où m'estant remise au lit toute tremblante, je ne pûs clorre l'œil de toute la nuit.

  Quant à Daphnis elle chercha tant Filandre, qu'en fin elle le rencontra plus mort que vif, & apres l'avoir tancé de n'avoir sceu se prevaloir d'une si favorable occasion, & toutefois l'avoir assuré que je n'estois point si estonnée de cet accident que luy, elle le remit un peu, & le rassura en quelque sorte, non point toutefois tellement que le lendemain il eust la hardiesse de sortir de sa chambre. Moy d'autre costé infiniment offensée contre tous deux, je fus contrainte de tenir le lit, pour ne donner cognoissance de mon desplaisir à ceux qui estoient autour de nous, & particulierement à la niepce de Gerestan : Mais de bonne fortune elle n'estoit pas plus spirituelle que de raison, de sorte que nous luy cachasmes aisément ce mauvais mesnage, ce qui nous eust esté presque impossible, & mesme à Filandre, autour duquel elle demeuroit ordinairement. Daphnis ne se trouva pas peu empeschée en ceste occasion, car au commencement je ne pouvois la recevoir en ses excuses. En fin elle me tourna de tant de costez, & me sceut tellement déguiser ceste action, que je luy promis d'oublier le desplaisir qu'elle m'avoit fait, mais que pour Filandre je ne le verrois jamais. Et croy qu'il s'en fust allé sans me voir, ne me pouvant supporter courroucée, n'eust esté le danger où il craignoit que Callirée tombast, car elle avoit à faire à un mary, qui estoit assez fascheux. Ce fut ceste consideration qui le retint, mais toutefois sans bouger du lit, faignant d'estre malade, & cependant cinq ou six jours se passerent sans que je le voulusse voir, quelle raison que Daphnis me pûst alleguer pour luy ; & n'eust esté que je fus advertie que Filidas revenoit & Callirée aussi, je ne l'eusse veu de longtemps. Mais la crainte que j'eus que Filidas ne s'en prist garde, & que ce qui estoit si secret ne fust divulgué par toute la contrée, me fit resoudre à le voir, mais avec condition, qu'il ne me feroit point de semblant de ce qui s'estoit passé, n'ayant pas assez de force sur moy, pour m'empescher de ne donner quelque cognoissance de mon desplaisir. Il le promit & le tint, car à peine osoit-il tourner les yeux à moy, & quand il le faisoit, c'estoit avec une certaine soubmission, qui ne m'asseuroit pas peu de son extréme Amour. Et de fortune, incontinant apres que j'y fus entrée, Filidas, Amidor, & le dissimulé Filandre arriverent dans la chambre, de qui les fenestres fermées nous donnerent assez bonne commodité de cacher nos visages. Filandre avoit adverty sa sœur de tout ce qui luy estoit advenu, & cela avoit esté cause que le sejour de Filidas n'avoit pas esté si long qu'il en avoit fait dessein, car elle faignant que son frère estoit malade, les contraignit de retourner.

  Mais ce discours, par sa longueur seroit trop ennuyeux, si je n'abregeois toutes nos petites querelles. Tant y a que Callirée ayant sceu comme toutes choses estoient passées, quelquesfois les tournant en gausseries, d'autrefois cherchant des apparances de raison, sceut de sorte se servir de son bien dire, estant mesme aidée de Daphnis, qu'enfin je consentis au sejour de Filandre, jusqu'à ce que les cheveux fussent revenus à sa sœur, cognoissant bien que ce seroit la ruiner & moy aussi, si je precipitois davantage son retour. Et il advint (comme elle avoit fort bien preveu) que durant le temps que ce poil demeura à croistre, l'ordinaire conversation du Berger, qui en fin ne m'estoit point desagreable, & la cognoissance de la grandeur de son affection, commencerent à me flatter de sorte, que de moy-mesme j'excusois sa tromperie ; considerant de plus le respect & la prudence dont il s'y estoit conduit. Si bien qu'avant qu'il pûst partir, il obtint ceste declaration qu'il avoit tant desirée, à sçavoir que j'oubliois sa tromperie, & que ne sortant point des termes de son devoir, j'aimerois sa bonnne volonté, & la cherirois pour son merite ainsi que je devrois. La cognoissance qu'il me donna de son contentement, ayant ceste assurance de moy, me rendit bien aussi assurée de son affection, que peu auparavant son desplaisir m'en avoit fait certaine, car il fut tel qu'à peine le pouvoit-il dissimuler. Cependant que nous estions en ces termes, Filidas de qui l'Amour s'alloit tousjours augmentant, ne pût en couvrir davantage la grandeur, de sorte qu'elle resolut de tenter tout à fait le dissimulé Filandre. Avec ce dessein la trouvant à propos un jour qu'elles se promenoient ensemble dans une touffe d'arbres, qui fait l'un des quarrez du jardin, elle luy parla de ceste sorte, apres avoir esté longuement interditte. Et bien Filandre, sera-il vray que quelle amitié que je vous puisse faire paroistre, je ne sois point assez heureux pour estre aimé de vous ? Callirée luy respondit : Je ne sçay Filidas quelle plus grande amitié vous me demandez, ny comment je vous en puis rendre davantage, si vous mesmes ne m'en donnez les moyens, Ah ! dit-elle, si vostre volonté estoit telle que la mienne la desire, je le pourrois bien faire : Jusqu'à ce que vous m'ayez esprouvée, pourquoy voulez-vous douter de moy ? Ne sçavez-vous pas, dit Filidas, que l'extréme desir est tousjours suivy du doute ? jurez moy que vous ne me manquerez point d'amitié, & je vous declareray peut-estre chose dont vous serez bien estonné. Callirée fut un peu surprise ne sçachant ce qu'elle vouloit dire, toutefois pour en sçavoir la conclusion elle luy respondit : Je vous jure Filidas tout ainsi que vous me le demandez, & de plus que je ne pourray jamais vous rendre tesmoignage de bonne volonté que je ne le fasse. A ce mot pour remerciement, & presque par transport, Filidas la prenant par la teste, la baisa avec tant de vehemence, que Callirée en rougit, & le repoussant toute en colere, luy demanda quelle façon estoit celle-là. Je sçay, respondit alors Filidas, que ce baiser vous estonne, & que mes actions jusques icy vous auront peut-estre fait soupçonner quelque chose d'estrange de moy, mais si vous voulez avoir la patience de m'escouter, je m'assure que vous en aurez plutost pitié que mauvaise opinion. Et lors reprenant du commencement jusques au bout, elle luy fit entendre le procés qui avoit esté entre Phormion, & Celion nos peres, l'accord qui fut fait pour l'assoupir, & en fin l'artifice de son pere à le faire eslever comme un homme, encor qu'il fust fille. Bref, nostre mariage, & tout ce que je viens de vous raconter, & puis continua de ceste sorte. Or ce que je veux de vous pour satisfaction de vostre promesse, c'est que recognoissant l'extréme affection que je vous porte, vous me receviez pour vostre femme, & je feray espouser Diane à mon cousin Amidor, que mon pere avoit expressément eslevé dans sa maison pour ce sujet. Et là dessus elle adjousta tant de paroles pour la persuader, que Callirée estonnée plus que je ne vous sçaurois dire, eut le loisir de revenir à soy, & luy respondre, que sans mentir il luy avoit raconté de grandes choses, & telles que malaisément les pourroit-elle croire, si elle ne les assuroit d'autre façon que par paroles. Elle alors se déboutonnant se découvrit le sein : L'honnesteté, luy dit-elle, me deffend de vous en montrer davantage, mais cela, ce me semble vous doit suffire. Callirée alors pour avoir le loisir de se conseiller avec nous, fit semblant d'en estre fort aise, mais qu'elle avoit des parens desquels elle esperoit tout son avancement, & sans l'advis desquels, elle ne feroit jamais une resolution de telle importance, & sur tout, qu'elle la supplioit de tenir ceste affaire secrette, car la divulgant ce ne seroit que donner sujet à plusieurs de parler, & qu'elle l'assuroit dés lors, que quand il n'y resteroit que sa volonté, elle luy donroit cognoissance de sa bonne volonté. Avec semblables propos elles finirent leur promenoir, & revindrent au logis, où de tout le jour Callirée n'osa nous accoster, de peur que Filidas n'eust opinion qu'elle nous en parlast, mais le soir elle raconta à son frere tous ces discours, & puis tous deux allerent trouver Daphnis, à laquelle ils les firent entendre. Jugez si l'estonnement fut grand, mais quel qu'il pûst estre, le contentement de Filandre le surpassoit de beaucoup, luy semblant que le Ciel luy offroit un tres-grand acheminement à la conclusion de ses desirs. Le matin Daphnis me pria d'aller voir la fainte Callirée, & la vraye demeura aupres de Filidas, afin qu'elle ne s'en doutast. Dieu sçait quelle je devins quand je sceus tout ce discours : Je vous jure que j'estois si estonnée, que je ne sçavois si ce n'estoit point un songe. Mais ce fut le bon que Daphnis se plaignoit infiniment de moy, que je le luy eusse si longuement celé, & quel serment que je luy fisse, que je n'en avois rien sceu jusques à l'heure, elle ne me vouloit point croire si enfant, car j'avois des-ja quinze ou seize ans, & lors que je luy disois que je pensois que tous les hommes fussent comme Filidas, elle se tuoit de rire de mon ignorance. En fin nous resolusmes, de peur que Bellinde ne voulust disposer de moy à sa volonté, ou que Filidas ne me fist quelque surprise pour Amidor, qu'il ne falloit rien faire à la volée & sans y bien penser, car dés lors par la sollicitation de Daphnis & de Callirée, je promis à Filandre de l'épouser. Et cela fut cause que reprenant ses habits, apres avoir assuré Filidas, qu'il alloit pour en parler à ses parens, il se retira avec sa sœur vers Gerestan, qui ne prit jamais garde à ceste ruze. Depuis ce temps il fut permis à Filandre de m'écrire, car envoyant d'ordinaire de ses nouvelles à Filidas, j'avois tousjours de ses lettres, & si finement, que ny elle, ny Amidor ne s'en apperceurent jamais.

  Or, belles Bergeres, jusques icy ceste recherche ne m'avoit guiere rapporté d'amertume, mais, helas ! c'est ce qui s'en ensuivit qui m'a tant fait avaler d'absinthe, que jusqu'au cercueil il ne faut pas que j'espere de gouster quelque douceur. Il avint pour mon malheur, qu'un estranger passant par ceste contrée me vid endormie à la fontaine des Sicomores, où la fraicheur de l'ombrage, & le doux gazoüillis de l'onde m'avoient sur le haut du jour assoupie. Luy, que la beauté du lieu avoit attiré pour passer l'ardeur du midy, n'eust plustost jetté l'œil sur moy, qu'il y remarqua quelque chose qui luy plust, Dieux quel homme, ou plustost quel monstre estoit-ce ! Il avoit le visage reluisant de noirceur, les cheveux racourcis & meslez comme la laine de nos moutons, quand il n'y a qu'un mois ou deux qu'on les a tondus. La barbe à petits bouquets clairement espanchée autour du menton, le nez aplaty entre les yeux & rehaussé & large par le bout, la bouche grosse, les lévres renversées, & presque fenduës soubs le nez, mais rien n'estoit si estrange que ses yeux, car en tout le visage il n'y paroissoit rien de blanc, que ce qu'il en descouvroit quand il les roüoit felons dans la teste. Ce bel Amant me fut destiné par le Ciel, pour m'oster à jamais toute volonté d'aimer : car estant ravy à me considerer, il ne pût s'empescher (transporté comme je croy de ce nouveau desir) de s'approcher de moy pour me baiser. Mais parce qu'il estoit armé, & à cheval, le bruit qu'il fit m'esveilla, & si à propos qu'ainsi qu'il estoit prest de se baisser pour satisfaire à sa volonté, j'ouvris les yeux, & voyant ce monstre si pres de moy, premierement je fis un grand cry, puis luy portant les mains au visage, le heurtay de toute ma force, lui qui estoit à moitié panché, n'attendant pas ceste deffense, fut si surpris, que le coup le fit balancer, & de peur qu'il eut comme je pense, de choir sur moy, il ayma mieux tomber de l'autre costé, si bien que j'eus loisir de me lever, je ne croy pas que s'il m'eust touchée je ne fusse morte de frayeur, car figurez vous, que tout ce qui est de plus horrible, ne sçauroit en rien approcher à l'horreur de son visage espouventable. J'estois des-ja bien esloignée, quand il se releva, & voyant qu'il ne me sçavoit attaindre, parce qu'il estoit armé assez pesamment, & que la peur m'attachoit des ayles aux pieds, il sauta promptement sur son cheval, & à toute course me suivoit, lors qu'estant presque hors d'haleine, la pauvre Filidas, qui assez pres de là entretenoit Filandre, qui nous estoit venu voir, & qui s'estoit endormy en luy parlant, ayant ouy ma voix, courut à moy, & voyant que ce cruel me poursuivoit avec l'espée nuë à la main, car la colere de sa cheutte luy avoit effacé toute Amour, elle s'opposa genereusement à sa furie, me faisant paroistre par ce dernier acte, qu'elle m'avoit autant aymée que son sexe le luy permettoit, & d'abort luy prit la bride du cheval ; dont ce barbare offensé, sans nul esgard de l'humanité, luy donna de l'espée sur le bras, de telle force qu'il le luy détacha du corps, & elle à mesme temps de douleur mourut, & tomba entre les pieds de son cheval, qui broncha si lourdement que son maistre eut assez d'affaire à s'en depestrer. Et parce que Filidas en mourant fit un grand cry, nommant fort haut Filandre : luy qui estoit aupres l'oüit, & la voyant en si piteux estat, en eut un extresme desplaisir : mais plus encores quand il vid ce barbare s'estant desmeslé de son cheval, me courre apres l'espée en la main ; & moy comme je vous disois, & de peur, & de la course que j'avois faite, tant hors d'haleine que je ne pouvois presque mettre un pied devant l'autre. Que devint ce pauvre Berger ! je ne croy pas que jamais tigre à qui les petits ont esté desrobez, lors qu'elle voit ceux qui les emportent s'eslançast plus legerement apres eux, que le courageux Filandre apres ce cruel. Et parce qu'il estoit chargé d'armes qui l'empeschoient de courre, il l'attaignit assez tost, & d'abort luy cria, cessez chevalier, cessez d'outrager davantage celle qui merite mieux d'estre adorée, & parce qu'il ne s'arrestoit point, ou fust que pour estre en furie il n'oyoit point sa voix, ou que pour estre estranger, il n'entendoit point son langage, Filandre mettant une pierre dans sa fronde, la luy jetta d'une si grande impetuosité, que le frappant à la teste, sans les armes qu'il y portoit, il n'y a point de doute qu'il l'eust tué de ce coup, qui fut tel, que l'estranger s'en aboucha, mais se relevant incon tinent, & oubliant la colere qu'il avoit contre moy, s'adressa tout en furie contre Filandre, qui se trouva si pres qu'il ne pût eviter le coup mal-heureux qu'il luy donna dans le corps, n'ayant à la main que sa houlette pour toute deffense. Toutefois se voyant le glaive de son ennemy si avant, sa naturelle generosité, luy donna tant de force, & de courage, qu'au lieu de reculer, il s'avança, & s'enfonçant le fer dans l'estomach jusques aux gardes, il luy planta le bout ferré de sa houlette entre les deux yeux, si avant qu'il ne l'en pûst plus retirer, qui fust cause que la luy laissant ainsi attachée, il le saisit à la gorge, & de mains & de dents paracheva de le tuer. Mais helas ce fut bien une victoire cherement acheptée, car ainsi que ce barbare tomba mort d'un costé, Filandre n'ayant plus de force, se laissa choir de l'autre, toutefois si à propos que tombant à la renverse l'espée qu'il avoit au travers du corps, heurta de la pointe contre une pierre, & la pesanteur du corps la fit ressortir de la playe. Moy qui de temps en temps tournois la teste pour voir si ce cruel m'atteignoit point encores, vis bien au commencement, que Filandre le couroit, & dés lors une extresme frayeur me saisit. Mais helas ! quand je le vis blessé si dangereusement, oubliant toute sorte de crainte, je m'arrestay, mais quand il tomba la frayeur de la mort ne me pût empescher de courre vers luy, & aussi morte presque que luy, me jettay en terre, l'appellant toute esplorée par son nom, il avoit des-ja perdu beau coup de sang, & en perdoit à toute heure davantage par les deux costez de sa playe, & voyez quelle force a une amitié, moy qui ne sçaurois voir du sang sans esvanouïr, j'eus bien alors le courage de luy mettre mon mouchoir a sa playe pour empescher le cours du sang, & rompant mon voile, luy en mettre autant de l'autre costé. Ce petit soulagement luy servit de quelque chose, car luy ayant mis la teste en mon giron, il ouvrit les yeux, & reprit la parole. Et me voyant toute couverte de larmes il s'efforça de me dire. Si jamais j'ay esperé une fin plus favorable que celle-cy, je prie le ciel, belle Bergere, qu'il n'ait point de pitié de moy. Je voyois bien que mon peu de merite, ne me pourroit jamais faire attaindre au bon heur desiré, & je craignois qu'en fin le desespoir ne me contraint à quelque furieuse resolution contre moy-mesme. Les Dieux qui sçavent mieux ce qui nous faut que nous ne le sçavons desirer, ont bien cognu que n'ayant vescu depuis si long temps que pour vous, qu'il falloit aussi que je mourusse pour vous. Et jugez quel est mon contentement, puis que je meurs non seulement pour vous, mais encores pour vous conserver la chose du monde que vous avez la plus chere, qui est vostre pudicité. Or ma maistresse, puis qu'il ne me reste plus rien pour mon contentement, qu'un seul point, par l'affection que vous avez recognuë en Filandre, je vous supplie de me le vouloir accorder, afin que ceste ame heureu se entierement, puisse vous aller attendre aux champs Elisiens, avec ceste satisfaction de vous. Il me dit ces paroles à mots interrompus & avec beaucoup de peine, & moy qui le voiois en cet estat, pour luy donner tout le contentement qu'il pouvoit desirer, luy respondis : Amy les Dieux n'ont point fait naistre en nous une si belle & honneste affection, pour l'esteindre si promptement, & pour ne nous en laisser que le regret : J'espere qu'ils vous donneront encores tant de vie, que je pourray vous faire cognoistre que je ne vous cede point en amitié, non plus que vous ne le faites à personne en merites. Et pour preuve de ce que je vous dy, demandez seulement tout ce que vous voudrez de moy, car il n'y a rien que je vous puisse ny veuille refuser. A ces derniers mots, il me prit la main, & se l'approchant de la bouche, je baise, dit-il, ceste main, pour remerciement de la grace que vous me faittes, & lors tournant les yeux au ciel, ô Dieux, dit-il, je ne vous requiers qu'autant de vie qu'il m'en faut pour l'accomplissement de la promesse que Diane me vient de faire. Et puis adressant sa parole à moy, avec tant de peine, qu'à peine pouvoit-il proferer les mots, il me dit ainsi : Or ma belle maistresse escoutez donc ce que je veux de vous ; puis que je ne ressens l'aigreur de la mort, que pour vous, je vous conjure par mon affection, & par vostre promesse, que j'emporte ce contentement hors de ce monde, que je puisse dire que je suis vostre mary, & croyez si je le reçois, que mon ame ira tres-contente en quel lieu qu'il luy falle aller, ayant un si grand tesmoignage de vostre bonne volonté. je vous jure, belles Bergeres, que ces paroles me toucherent si vivement, que je ne sçay comme j'eus assez de force à me soustenir, & croy quant à moy que ce fut la seule volonté que j'avois de luy complaire, qui m'en donna le courage, cela fut cause qu'il n'eust pas plutost finy sa demande, que luy retendant la main, je luy dits, Filandre, je vous accorde ce dont vous me requerez, & vous jure devant tous les Dieux, & particulierement devant les divinitez qui sont en ces lieux, que Diane se donne à vous, & qu'elle vous reçoit & de coeur & d'ame pour son mary, & en disant ces mots, je le baisay : Et moy, me dit-il, je vous reçoy, ma belle maistresse, & me donne à vous, pour jamais tres-heureux & content, d'emporter ce glorieux nom de mary de Diane. Helas ce mot Diane, fut le dernier qu'il profera, car m'ayant les bras au col, & me tirant à luy pour me baiser, il expira laissant ainsi son esprit sur mes levres : Quelle je devins, le voyant mort, jugez-le, belles Bergeres, puis que veritablement je l'aymois. Je tombe abouchée sur luy, sans poulx, & sans sentiment, & de telle sorte esvanoüie que je fus emportée chez moy, sans que je revinsse. O Dieux que j'ay ressenty vivement ceste perte, & recognu estre plus que veritable ce que tant de fois il m'avoit predit, que je l'aimerois davantage apres sa mort, que durant sa vie. Car j'ay depuis conservé si vive sa memoire en mon ame, qu'il me semble qu'à toute heure je l'ay devant mes yeux, & que sans cesse il me dit, que pour n'estre ingratte, il faut que je l'ayme. Aussi fais-je, ô belle ame, & avec la plus entiere affection qu'il se peut, & si où tu es, on a quelque cognoissance de ce qui se fait ça bas, reçoy, ô cher amy, ceste volonté, & ces larmes que je t'offre pour tesmoignage, que Diane aymera jusques au cercueil son cher Filandre.

LE
SEPTIESME
LIVRE D'ASTREE.

  Astrée pour interrompre les tristes paroles de Diane, mais belle Bergere, luy dit-elle, qui estoit ce miserable qui fut cause d'un si grand desastre ? Helas, dit-elle, que voulez-vous que je vous en die ? c'estoit un ennemy qui n'estoit au monde que pour estre cause de mes eternelles larmes. Mais encor, respondit Astrée, ne sçeut-on jamais quel homme c'estoit ? On nous dit, respondit-elle, quelque temps apres, qu'il venoit de certains païs barbares, outre un destroit (je ne sçay si je le sçauray bien nommer) qui s'appelle les coulonnes d'Hercule, & le sujet qui le fit venir de si loing pour mon mal-heur, estoit que devenu amoureux en ces contrées-là, sa dame luy avoit commandé de chercher toute l'Europe, pour sçavoir s'il y en avoit quelqu'autre aussi belle qu'elle, & s'il venoit à rencontrer quelque Amant qui voulust maintenir la beau té de sa maistresse, il estoit obligé de combattre contre luy, & luy en envoyer la teste, avec le portraict, & le nom de la Dame. Helas ! que plust aux Dieux que j'eusse esté moins prompte à m'en fuïr, lors qu'il me poursuivoit pour me tuer, afin que par ma mort j'eusse empesché celle du pauvre Filandre, à ces paroles elle se mit à pleurer avec une telle abondance de larmes, que Phillis pour la divertir, changea de propos, & se levant la premiere : Nous avons, dit-elle, demeuré trop longuement assises, il me semble qu'il seroit bon de se promener un peu. A ce mot elles se leverent toutes trois, & s'en allerent du costé de leurs hameaux, car aussi bien estoit-il tantost temps de disner. Leonide, qui estoit (comme je vous ay dit) aux escoutes, ne perdoit pas une seule parole de ces Bergeres, & plus elle oyoit de leurs nouvelles, & plus elle en estoit desireuse. Mais quand elle les vid partir sans avoir parlé de Celadon, elle en fust fort faschée, toutefois sous l'esperance qu'elle eut, que demeurant ce jour avec elles, elle en pourroit descouvrir quelque chose, & aussi que des-ja elle en avoit fait le dessein ; lors qu'elle les vid un peu esloignées, elle sortit de ce buisson ; & faisant un peu de tour, se mit à les suivre ; car elle ne vouloit pas qu'elles pensassent qu'elle les eust ouyes. De fortune Phillis se tournant du costé d'où elles venoient, l'apperceut assez loing & la monstrant à ses compagnes, elles s'arresterent toutes trois, & voyant qu'elle venoit à elles, pour luy rendre le devoir que sa condition meritoit, elles tournerent en arriere, & estant plus pres la saluerent, & Leonide toute pleine de courtoisie, apres leur avoir rendu leur salut, s'addressant à Diane luy dit : Sage Diane, je veux estre aujourd'huy vostre hostesse, pourveu qu'Astrée & Phillis soient de la compagnie, car je suis partie ce matin de chez Adamas mon oncle, en dessein de passer tout ce jour avec vous, pour cognoistre si ce que l'on m'a dit de vostre vertu Diane, de vostre beauté Astrée, & de vostre merite Phillis, respond à la renommée qui est divulguée de vous. Diane voyant que ses compagnes s'en remettoient à elle, luy respondit, Grande Nymphe, il seroit peut-estre meilleur pour nous que vous eussiez seulement nostre cognoissance, par le rapport de la renommée, puis qu'elle nous est tant advantageuse : Toutefois puis qu'il vous plaist de nous faire cet honneur, nous le recevrons, comme nous sommes obligées de recevoir avec reverence les graces qu'il plaist au Ciel de nous faire : & à ces paroles elles la mirent entre elles, & la menerent au hameau de Diane, où elle fust receuë d'un si bon visage, & avec tant de civilité, qu'elle s'estonnoit comme il estoit possible qu'entre les bois, & les pasturages des personnes tant accomplies fussent eslevées. L'apres-disnée se passa entre elles, en plusieurs devis & en des demandes que Leonide leur faisoit : & entre autre, elle s'enqueroit qu'estoit devenu un Berger nommé Celadon, qui estoit fils d'Alcippe. Diane respondit qu'il y avoit quelque temps qu'il s'estoit noyé dans Lignon. Et son frere Lycidas, dit-elle, est-il marié ? Non point encor dit Diane, & ne croy pas qu'il en ayt beaucoup de haste, car le desplaisir de son frere luy est encor trop vif en la memoire. Et par quel mal-heur, adjousta Leonide, se perdit-il ? Il voulut, dit Diane, secourir cesste Bergere qui y estoit tombée avant que luy : & lors elle monstra Astrée. La Nymphe qui sans en faire semblant prenoit garde aux actions d'Astrée, voyant qu'à ceste memoire elle changeoit de visage, & que pour dissimuler ceste rougeur, elle mettoit la main sur les yeux, cognut bien qu'elle l'aimoit à bon escient, & pour en descouvrir davantage, continua : Et n'en a on jamais retrouvé le corps ? Non dit Diane, & seulement son chappeau fut recognu, qui s'estoit arresté à quelques arbres que le courant de l'eau avoit desracinez. Phillis qui cognut que si ce discours continuoit plus outre, il tireroit les larmes des yeux de sa compagne, qu'elle avoit des-ja beaucoup de peine à retenir, afin de l'interrompre ; Mais grande Nymphe, luy dit-elle, quelle bonne fortune pour nous, a esté celle qui vous a conduitte en ce lieu. A mon abort dit Leonide je la vous ay ditte : ç'a seulement esté pour avoir le bien de vostre cognoissance, & pour faire amitié avec vous, desirant d'avoir le plaisir de vostre compagnie. Puis que cela est, reprit Phillis, si vous le trouvez bon, il seroit à propos de sortir comme de coustume à nos exercices accoustumez, & par ainsi vous auriez plus de cognoissance de nostre façon de vivre, & mesmes si vous nous permettez d'user devant vous de la franchise de nos villages. C'est, dit Leonide, dequoy je voulois vous requerir, car je sçay que la contrainte n'est jamais agreable, & je ne viens pas icy pour vous desplaire. De ceste sorte Leonide prenant Diane d'une main & Astrée de l'autre, elles sortirent, & avec plusieurs discours parvindrent jusques à un bois, qui s'alloit estendant jusques sur le bort de Lignon, & là pour avoir plus d'humidité s'espaisissoit davantage & rendoit le lieu plus champestre. A peine furent-elles assises, qu'elles ouyrent chanter assez pres de là, & Diane fut la premiere qui en recognut la voix, & se tournant à Leonide. Grande Nymphe, luy dit-elle, prendrez vous plaisir d'ouïr discourir un jeune Berger, qui n'a rien de vilageois que le tiltre, car ayant tousjours esté nourry dans les grandes villes, & parmy les personnes civilisées, il ressent moins nos bois que toute autre chose. Et qui est-il, respondit Leonide ? c'est repliqua Diane, le Berger Sylvandre, qui n'est parmy nous que depuis peu de jours. Et de quelle famille est-il ? dit la Nymphe. Il seroit bien mal-aisé, adjousta Diane, de le vous pouvoir dire : car il ne sçait luy mesme qui est son pere ny sa mere, & a seulement quelque legere cognoissance qu'ils sont de Forests, & à ceste occasion, lors qu'il a pû, il y est revenu avec resolution de n'en plus partir, & à la verité nostre Lignon y perdroit beaucoup, s'il s'en alloit : car je ne crois pas que de long temps il y vienne Berger plus accomply. Vous le loüez trop, respondit la Nymphe, pour ne me donner point envie de le voir, allons nous en l'entretenir. S'il nous apperçoit, dit Diane, & qu'il ayt oppinion de ne nous point estre ennuyeux, il ne faillira pas de venir bien tost à nous : & il advint comme elle le disoit, car de fortune le Berger qui s'alloit promenant les apperceut, & tourna incontinent ses pas vers elles, & apres les avoir saluées, parce qu'il ne cognoissoit point Leonide, il faisoit semblant de ne vouloir continuer son chemin, lors que Diane luy dit. Est-ce ainsi, Sylvandre que l'on vous a enseigné la civilité dans les villes, d'interrompre une si bonne compagnie, pour ne luy rien dire. Le Berger, luy respondit en sousriant. Puis que j'ay erré en vous interrompant, moins je continueray en ceste faute : & moindre ce me semble, sera mon erreur. Ce n'est pas respondit Diane, ce qui vous faisoit si tost partir d'icy, mais plustost que vous n'y avez rien trouvé qui merite de vous y arrester, toutefois si vous tournez la veuë à ceste belle Nymphe, je m'assure que si vous avez des yeux, vous ne croirez pas d'en pouvoir trouver davantage ailleurs. Ce qui attire quelque chose, repliqua Sylvandre, doit avoir quelque sympathie avec elle, de sorte qu'il ne vous doit point sembler estrange, n'y en ayant point entre tant de merites, & mes imperfections, que je n'aye point ressenty cet attrait, que vous me reprochez. Vostre modestie, interrompit Leonide, vous fait mettre ceste antipathie entre nous, mais la croyez vous au corps ou en l'ame ? pour les corps vostre visage, & le reste qui se voit, de vous, vous le deffend ; si c'est en l'ame, il me semble que si vous en avez une raisonnable, elle n'est point differante des nostres. Sylvandre cognut bien qu'il n'avoit pas à parler avec des Bergeres, mais avec une personne qui estoit bien plus relevée, qui le fit resoudre de luy respondre avec des raisons plus fermes qu'il n'avoit pas accoustumé entre les Bergers, & ainsi il luy dit. Le prix, belle Nymphe, qui est en toutes les choses de l'univers ne se doit pas prendre pour ce que nous en voyons, mais pour ce à quoy elles sont propres. Car autrement l'homme qui est le plus estimé seroit le moindre, puis qu'il n'y a animal qui ne le surpasse en quelque chose particuliere ; l'un en force, l'autre en vistesse, l'autre en veuë, l'autre en ouye, & semblables privileges du corps : mais quand on considere que les Dieux ont fait tous ces animaux pour servir à l'homme, & l'homme pour servir aux Dieux, il faut avoüer que les Dieux l'ont jugé estre davantage. Et par ceste raison, je veux dire, que pour cognoistre le prix de chacun, il faut regarder à quoy les Dieux s'en servent, car il n'y a pas apparence qu'ils ne sçachent bien la valeur de chasque chose. Que si nous en faisons ainsi de vous & de moy, qui ne dira que les Dieux auroient une grande mescognoissance de nous, si estant egaux en merite, ils se servoient de vous d'une Nymphe, & de moy, d'un Berger ? Leonide loüa en elle mesme beaucoup le gentil esprit du Berger, qui soustenoit si bien une mauvaise cause, & pour luy donner occasion de continuer, elle luy dit : Quand cela seroit recevable pour mon regard, toutefois pourquoy est-ce que ces Bergeres ne vous eussent pû arrester, puis que selon ce que vous dittes, elles doivent avoir ceste sympathie avec vous ? Sage Nymphe, respondit Silvandre, "la moindre cede tousjours à la plus grande partie": où vous estes, ces Bergeres en doivent faire de mesme. Et quoy, adjousta Diane, desdaigneux Berger, nous estimez vous si peu ? Tant s'en faut, respondit Silvandre, que c'est pour vous trop estimer, que j'en parle ainsi, car si j'avois mauvaise opinion de vous, je ne dirois pas que vous fussiez une partie de ceste grande Nymphe, puis que par là, je ne vous rends point son inferieure, sinon qu'elle merite d'estre aymée, & respectée pour sa beauté, pour ses merites, & pour sa condition, & vous pour vos beautez & merites. Vous vous joüez Silvandre, respondit Diane, si veux-je croire que j'en ay assez pour obtenir l'affection d'un honneste Berger, & cela elle le disoit, parce qu'il estoit si esloigné de toute Amour, qu'entre elles, elles le nommoient l'insensible : & elle estoit bien ayse de le faire parler. A quoy il respondit, Vostre creance sera telle qu'il vous plaira, si m'advoüerez vous, que pour cet effet il vous deffaut une des principales parties. Et laquelle ? dit Diane. La volonté, repliqua-il, car vostre volonté est si contraire à cet effet, Que, dit Phillis en l'interrompant, jamais Silvandre ne le fut davantage à l'Amour. Le Berger l'oyant parler, se retira vers Astrée, disant que l'on luy faisoit supercherie, & que c'estoit l'outrager que de se mettre tant contre luy. L'outrage, dit Diane, s'adresse tout à moy, car ceste Bergere me voyant aux mains avec un si fort ennemy, faisant un sinistre jugement de mon courage & de ma force, m'a voulu aider. Ce n'est pas, dit-il, en cela belle Bergere qu'elle vous a offensée, car elle eust eu trop peu de jugement, si elle n'eust creu vostre victoire certaine ; mais c'est que me voyant desja vaincu, elle a voulu vous en desrober l'honneur en essayant de me donner un coup sur la fin du combat, mais je ne sçay comme elle l'entend : car si vous ne vous en meslez plus, je vous assure qu'elle n'aura pas si aisément ceste gloire, que elle pense. Phillis qui de son naturel estoit gaye, & qui ce jour avoit resolu de faire passer le temps à Leonide, luy respondit, avec un certain hausser de teste : Il est bon là Silvandre, que vous ayez opinion que de vous vaincre soit quelque chose de desirable ou d'honorable pour moy. Moy, dis-je, qui mettrois ceste victoire entre les moindres que j'obtins jamais. Si ne la devez-vous pas tant mespriser, dit le Berger, quand ce ne seroit que pour estre la premiere. "Autant, repliqua Phillis, qu'il y a d'honneur d'estre la premiere en ce qui a du merite, autant y a-il de la honte en ce qui est au contraire." Ah ! Bergere, interrompit Diane, ne parlez point ainsi de Silvandre : car si tous les Bergers qui sont moins que luy devoient estre mesprisez, je ne sçay qui seroit celuy de qui il faudroit faire cas. Voila Diane, respondit Phillis, les premiers coups dont vous le surmontez, sans doute il est à vous. Car "c'est la coustume de ces esprits hagards & farouches, de se laisser surprendre aux premiers attraits, dautant que n'ayant accoustumé telles faveurs, ils les reçoivent avec tant de goust, qu'ils n'ont point de resistance contre-elles." Phillis disoit ces paroles en se mocquant, si advint-il toutefois que ceste gratieuse deffense de Diane, fit croire au Berger d'estre obligé à la servir par les loix de la courtoisie. Et dés lors les perfections de Diane, & ceste opinion conceurent dans le coeur du Berger ce germe d'Amour, que le temps & la pratique accreurent, comme nous dirons cy apres. Ceste dispute dura quelque temps entre ces Bergeres, avec beaucoup de contentement de Leonide ; qui admiroit leur gentil esprit. Phillis en fin se tournant au Berger, luy dit, Mais à quoy servent tant de paroles, s'il est vray que vous soyez tel, venons à la preuve, & me dittes quel le Bergere fait particulierement estat de vous ? celle, respondit le Berger, de qui vous me voyez faire estat particulierement. Vous voulez dire, adjousta Phillis, que vous n'en recherchez point, mais cela procede de faute de courage. Plustost, repliqua Silvandre, de faute de volonté, & puis continuant : Et vous qui me mesprisez si fort, dittes nous quel Berger est-ce qui vous aime si particulierement ? Tous ceux qui ont de l'esprit & du courage, respondit Phillis : Car "celuy qui void ce qui est aymable sans l'aimer, a faute d'esprit ou de courage". Ceste raison, dit Silvandre, vous oblige donc de m'aimer, ou accuse en vous de grands deffaux, mais ne parlons point si generalement, & particularisez nous quelqu'un qui vous aime. Alors Phillis avec un visage grave & severe : Je voudrois bien, dit-elle, qu'il y en eust d'assez témeraires pour l'entreprendre. C'est donc, adjousta Silvandre, faute de courage. Tant s'en faut, respondit Phillis, c'est faute de volonté. Et pourquoy s'escria Silvandre, voulez-vous que l'on croye que ce soit plutost en vous faute de volonté qu'en moy ? Il ne seroit pas mauvais, dit la Bergere, que les actions qui vous sont bien seantes me fussent permises, trouveriez-vous à propos que je courusse, luittasse, ou sautasse comme vous faites ? Mais c'est trop disputer sur un mauvais sujet, il faut que Diane y mette la conclusion, & voyez si je ne m'assure bien fort de la justice de ma cause, puis que je prends un juge par tial. Je la seray tousjours, respondit Diane, pour la raison qui me sera cognuë. Or bien continua Phillis, quand les paroles ne peuvent verifier ce que l'on soustient, n'est on pas obligé d'en venir à la preuve. C'est sans doute, respondit Diane. Condamnez donc ce Berger, reprit Phillis, à rendre preuve du merite qu'il dit estre en luy, & qu'à ceste occasion il entreprenne de servir & d'aimer une Bergere de telle sorte, qu'il la contraigne d'advoüer qu'il merite d'estre aimé, que s'il ne le peut, qu'il confesse librement son peu de valeur. Leonide & les Bergeres trouverent ceste proposition si agreable, que d'une commune voix il y fut condamné. Non pas, dit Diane en sousriant, qu'il soit contraint de l'aimer : Car "en Amour la contrainte ne peut rien, & faut que sa naissance procede d'une libre volonté" : mais j'ordonne bien qu'il la serve & honore ainsi que vous dittes. Mon juge, respondit Silvandre, quoy que vous m'ayez condamné sans m'ouyr, si ne veux-je point appeller de vostre sentence : mais je requiers seulement, que celle qu'il me faudra servir, merite, & sçache recognoistre mon service. Silvandre, Silvandre, dit Phillis, parce que le courage vous deffaut, vous cherchez des eschapatoires, mais si vous en osteray-je bien tost tous les moyens, par celle que je vous proposeray, car c'est Diane, puis qu'il ne luy manque, ny esprit pour recognoistre vostre merite, ny merites pour vous donner vo lonté de la servir. Quant à moy, respondit Silvandre, j'y en recognois plus que vous ne sçauriez dire, pourveu que ce ne soit point profaner ses beautez de les servir par gageure. Diane vouloit respondre & se fust excusée de cette courvée, mais à la requeste de Leonide & d'Astrée, elle y consentit, avec condition toutefois que cet essay ne dureroit que trois mois. Ceste recherche estant doncques ainsi arrestée, Silvandre se jettant à genoux, baisa la main à sa nouvelle maistresse, comme pour faire le serment de fidelité, & puis se relevant. A ceste heure, dit-il, que j'ay receu vostre ordonnance, ne me permettez-vous pas, belle maistresse, de vous proposer un tort qui m'a esté fait. Et Diane, luy respondit, qu'il en avoit toute liberté. Il reprit ainsi : Si pour avoir parlé trop avantageusement de mes merites contre une personne qui me mesprisoit, j'ay justement esté condanné à en faire la preuve, pourquoy ceste altiere de Phillis, qui a beaucoup plus de vanité que moy, & qui mesme est cause de toute ceste dispute, ne sera-elle condannée à en rendre un semblable tesmoignage. Astrée sans attendre ce que respondroit Diane ; dit qu'elle tenoit ceste requeste pour si juste, qu'elle s'assuroit qu'elle luy seroit accordée, & Diane en ayant demandé l'advis de la Nimphe, & voyant qu'elle estoit de mesme opinion, condanna la Bergere ainsi qu'il l'avoit requis. Je n'attendois pas, dit Phillis, une sentence plus favorable ayant telles parties, mais bien, que faut-il que je fasse ? Que vous acqueriez, dit Silvandre, les bonnes graces de quelque Berger. Cela, dit Diane, n'est pas raisonnable : Car jamais la raison ne contrarie au devoir, Mais j'ordonne qu'elle serve une Bergere, & que tout ainsi que vous, elle soit obligée de s'en faire aimer, & que celuy de vous deux qui sera moins aimable, au gré de celles que vous servirez, soit contraint de ceder à l'autre. Je veux donc, dit Phillis, servir Astrée. Ma sœur, respondit-elle, il semble que vous doutiez de vostre merite, puis que vous cherchez œuvre faicte, mais il faut que ce soit ceste belle Diane, non seulement pour les deux raisons que vous avez alleguées à Silvandre, qui sont ses merites & son esprit : Mais outre cela, qu'elle pourra plus équitablement juger du service de l'un & de l'autre, si c'est à elle seule que vous vous adressiez. Ceste ordonnance sembla si équitable à chacun, qu'ils l'observerent apres avoir tiré serment de Diane, que sans esgard d'autre chose que de la verité, les trois mois estant finis, elle en feroit le jugement. Il y avoit du plaisir à voir ceste nouvelle sorte d'Amour, car Phillis faisoit fort bien le serviteur, & Silvandre en faignant le devint à bon escient, ainsi que nous dirons cy apres : Diane d'autre costé sçavoit si bien faire la maistresse, qu'il n'y eust eu personne qui n'eust creu que c'estoit à bon escient. Lors qu'ils estoient sur ce discours, & que Leonide en elle mesme jugeoit ceste vie pour la plus heureuse de toutes, ils virent venir du costé du pré deux Bergeres, & trois Bergers, qui à leurs habits monstroient d'estre estrangers, & lors qu'ils furent un peu plus pres, Leonide qui estoit curieuse de cognoistre les Bergers & Bergeres de Lygnon par leur nom, demanda qui estoient ceux-cy : A quoy Phillis respondit, qu'ils estoient estrangers, & qu'il y avoit quelques mois qu'ils estoient venus de compagnie, que quant à elle, elle n'en avoit autre cognoissance ; Alors Silvandre reprit qu'elle perdoit beaucoup de ne les cognoistre pas plus particulierement, car entr'autre il y en avoit un nommé Hylas de la plus agreable humeur qu'il se peut dire, dautant qu'il aime, disoit-il, tout ce qu'il void, mais il a cela de bon, que qui luy fait le mal, luy donne le remede, parce que si son inconstance le fait aimer, son inconstance aussi le fait bien tost oublier, & il a de si extravagantes raisons pour prouver son humeur estre la meilleure, qu'il est impossible de l'ouyr sans rire. Vrayement, dit Leonide, sa compagnie doit estre agreable, & faut que nous le mettions en discours aussi tost qu'il sera icy. Ce sera, respondit Silvandre, sans beaucoup de peine, car il veut tousjours parler, mais s'il est de ceste humeur, il y en a un autre avec lui, qui en a bien une toute contraire ; parce qu'il ne fait que regretter une Bergere morte qu'il a aimée. Celuy-là est homme rassis, & monstre d'avoir du jugement, mais il est si triste de la mort de sa Bergere, qu'il ne sort jamais propos de sa bouche, qui ne retienne de la melancolie de son ame. Et qu'est-ce, repliqua Leonide, qui les arreste en cette contrée. Sans mentir, dit-il, belle Nymphe, je n'ay pas encor eu ceste curiosité, mais si vous voulez je le leur demanderay, car il me semble qu'ils viennent nous rencontrer. A ce mot ils furent si pres, qu'ils ouyrent que Hylas venoit chantant tels vers.

VILANELLE DE
HYLAS SUR SON
inconstance.

  La belle qui m'arrestera,
Beaucoup plus d'honneur en aura.

I.

  J'ayme à changer, c'est ma franchise,
  Et mon humeur m'y va portant :
Mais quoy si je suis inconstant,
Faut-il pourtant qu'on me mesprise ?
  Tant s'en faut, qui m'arrestera
  Beaucoup plus d'honneur en aura.

II.

  Faire aimer une ame barbare,
C'est signe de grande beauté,
Et rendre mon cœur arresté,
C'est un effet encor plus rare.
  Si bien que qui m'arrestera
  Beaucoup plus d'honneur en aura.

III.

  Arrester un fais immobile,
Qui ne le peut faire aisément ?
Mais arrester un mouvement,
C'est chose bien plus difficile :
  C'est pourquoy qui m'arrestera
  Beaucoup plus d'honneur en aura.

IIII.

  Et pourquoy trouvez-vous estrange
Que je change pour avoir mieux  ?
Il faudroit bien n'avoir point des yeux,
Qui ne voudroit ainsi le change.
  Mais celle qui m'arrestera
  Beaucoup plus d'honneur en aura.

V.

  Car c'est signe que ceste belle,
Qui mon Amour constante aura,
Toute beauté surpassera,
Pendant que je seray pour elle.
  Et ainsi qui m'arrestera
  Beaucoup plus d'honneur en aura.

VI.

  Venez donc me trouver Bergeres,
Qui voulez le prix de beauté,
Arrestez ma legereté
Par des faveurs non coustumieres.
  Car celle qui m'arrestera
  Beaucoup plus d'honneur en aura.

  Leonide en sousriant contre Silvandre, luy dit, que ce Berger n'estoit pas de ces trompeurs qui dissimulent leurs imperfections, puis qu'il l'alloit chantant : C'est parce, respondit Silvandre, qu'il ne croit pas que ce soit vice, & qu'il en fait gloire. A ce mot ils arriverent si pres, que pour leur rendre leur salut, la Nymphe & le Berger furent contraints d'interrompre leur propos, & parce que Silvandre avoit bonne memoire de ce que la Nymphe luy avoit demandé de l'estat de ces Bergers, aussi tost que les premieres paroles de la civilité furent parachevées. Mais Tircis, dit Silvandre, car tel estoit le nom du Berger, si ce ne vous est importunité, dittes nous le sujet qui vous a fait venir en ceste contrée de Forestz, & que c'est qui vous y retient. Tircis alors mettant un genoüil en terre, levant les yeux & les mains en haut. O bonté infinie, dit-il, qui par ta prevoyance gouvernes tout l'Univers, sois tu loüée à jamais de celle qu'il t'a pleu avoir de moy, & puis se relevant, avec beaucoup d'estonnement de la Nymphe, & de ceste trouppe, il respondit à Silvandre. Gentil Berger, vous me demandez que c'est qui m'ameine & me retient en ceste contrée, sçachez que ce n'est autre que vous, & que c'est vous seul que j'ay si longuement cherché. Moy, respondit Silvandre, & comment peut-il estre, puis que je n'ay point de cognoissance de vous ? C'est en partie, respondit-il, pour cela que je vous cherche. Et s'il est ainsi, repliqua Silvandre, il y a des-ja long temps que vous estes parmy nous, que veut dire que vous ne m'en avez parlé ? Parce, respondit Tircis, que je ne vous cognoissois pas, & pour satisfaire à la peine où vous estes, parce que le discours en est long, s'il vous plaist je le vous raconteray quand vous aurez repris vos places sous ces arbres, comme vous estiez, quand nous sommes arrivez. Silvandre alors se tournant vers Diane : Ma maistresse, dit-il, vous plaist-il de vous r'assoir. C'est à Leonide, respondit Diane, à qui vous le deviez avoir demandé. Je sçay bien, respondit le Berger, que la civilité me le commandoit ainsi, mais Amour me l'a ordonné d'autre sorte. Leonide prenant Diane & Astrée par la main s'assit au milieu, disant que Silvandre avoit eu raison : parce que "l'Amour qui a autre consideration que de soy-mesme, n'est pas vraye Amour", & apres elles les autres Bergeres & Bergers s'assirent en rond : & lors Tircis se tournant à la Bergere, qui estoit avec luy. Voicy le jour heureux, dit-il, que nous avons tant desiré, Laonice, & que depuis que nous sommes entrez en ceste contrée, nous sommes tousjours allez recherchant : il ne tiendra plus qu'à vous que nous ne sortions de ceste peine, ainsi qu'a ordonné l'Oracle. Alors la Bergere, sans luy faire autre response, s'adressa à Silvandre, & luy parla de ceste sorte.

HISTOIRE DE TIRCIS
ET [LAONICE].

  "De toutes les amitiez il n'y en a point, à ce que j'ay ouy dire, qui puissent estre plus affectionnées que celles qui naissent avec l'enfance, parce que la coustume que ce jeune âge prend, va peu à peu se changeant en nature" : de laquelle s'il est malaisé de se despoüiller, ceux le sçavent qui luy veulent contrarier. Je dis cecy pour me servir en quelque sorte d'excuse, lors, gentil Berger, que vous me verrez contrainte de vous dire que j'aime Tircis, car ceste affection fut presque succée avec le laict, & ainsi mon ame de telle nourriture s'entretenant, receut en elle mesme comme propres, les accidens de ceste passion, & sembloit que toute chose à ma naissance s'y accordast, car nos demeures voisines, l'amitié qui estoit entre nos peres, nos âges qui estoient fort égaux, & la gentillesse de l'enfance de Tircis, ne m'en donnoient que trop de commodité, mais le malheur voulut que presque en mesme temps nasquit Cleon dans nostre hameau, avec peut-estre plus de graces que moy, mais sans doute avec beaucoup plus de bonne fortune : car dés lors que ceste fille commença d'ouvrir les yeux, il sembla que Tircis en receut au cœur les flames, puis que dans le berceau mesme il se plaisoit à la considerer : en ce temps-là je pouvois avoir six ans & luy dix, & voyez comme le Ciel dispose de nous sans nostre consentement ! Dés l'heure que je le vis je l'aimay, & dés l'heure qu'il vid Cleon il l'aima, & quoy que ce fussent amitiez telles que l'âge pouvoit supporter, toutefois elles n'estoient pas si petites, que l'on ne recognust fort bien ceste difference entre nous : puis venant à croistre, nostre amitié aussi creut à telle hauteur, que peut-estre n'y en a-il jamais eu qui l'ait surpassée ; en ceste jeunesse : vous pouvez croire que j'y allois sans artifice, mais venant un peu plus avant en âge, je remarquay en luy tant de deffaut de bonne volonté, que je me resolus de m'en divertir : "Resolution que plusieurs despitez conçoivent, mais que point de vrays Amans peuvent executer", comme j'espreuvis long temps apres : Toutefois mon courage offensé eut bien assez de pouvoir pour me faire dissimuler, & si je ne pouvois en verité m'en retirer entierement, essayer pour le moins de prendre quelque espece de congé, & ce qui m'en ostoit plus les moyens estoit, que je ne voyois point que Tircis affectionnast autre Bergere, car tout ce qu'il faisoit avec Cleon ne pouvoit donner soupçon, que ce ne fust enfance, puis que pour lors elle ne pouvoit avoir plus de douze ans, & quand elle commença à croistre, & qu'elle pût ressentir les traits d'Amour, elle se retira de sorte de luy, qu'il sembloit que cet esloignement estoit capable de la garentir de telles blessures : Mais Amour plus fin qu'elle, sçeut en telle sorte approcher de son ame les merites, l'affection, & les services de Tircis, qu'en fin elle se trouva au milieu, & tellement entournée de toutes parts, que si de l'une elle évitoit d'estre blessée, la playe qu'elle recevoit de l'autre en estoit plus grande & plus profonde. Si bien qu'elle ne pût recourre à nul meilleur remede qu'à la dissimulation, non pas pour ne recevoir les coups, mais seulement pour empescher que son ennemy ny autres les pûst voir. Elle pût bien toutefois user de ceste fainte quand elle ne commença que d'avoir la peau égratignée, mais quand la blessure fut grande, il fallut se rendre, & s'avoüer vaincuë. Ainsi voila Tircis aimé de sa Cleon, le voila qui joüyt de toutes les honnestes douceurs d'une amitié, quoy que du commencement il ne sçavoit presque quel estoit son mal, ainsi que ces vers le tesmoignent qu'il fit en ce temps-là.