[retour à un affichage normal]

Celadon à ce mot plyant les espaules : Puis, dit-il, mon pere, que les Dieux vous l’ont commandé, & que vous en voulez prendre la peine, je vous remets & ma vie & tout mon contentement. A ce mot le Druyde l’embrassa & baisa au front, & prenant Leonide par la main luy donna le bon soir, & le laissa reposer : mais ses pensées n’en firent pas de mesme, qui toute la nuict ne firent que luy representer les agreables discours qu’Astrée & luy avoient eus, sans oublier la moindre parole qu’elle eust dite, ny la moindre action qu’elle eust faite, & qui luy pouvoit rendre quelque tesmoignage qu’elle aymast encores la mémoire de Celadon : & lors que ce penser l’avoit longuement entretenu, il se reprenoit & le vouloit chasser de son ame, comme le jugeant contraire au dessein qu’autrefois il avoit fait.

Et comment, miserable berger, disoit-il, te laisses-tu si tost flatter au moindre bon visage que la fortune te fait, ayant si souvent espreuvé qu’elle ne t’a jamais caressé que pour te tromper, ny jamais eslevé que pour te faire tomber de plus haut ? souviens toy du bon-heur où tu t’es veu, & si jamais il y a eu berger qui ait eu plus de suject de se dire bien-heureux que toy, & incontinent tourne les yeux sur l’estat où ceste fortune t’a reduit, & considere si tu pouvois tomber en un precipice plus profond : & à ceste heure soubs pretexte que l’on te croit autre que tu n’es pas, & que sous ce nom emprunté l’on te fait bonne chere, tu prends ces faveurs pour tiennes, & tu ne consideres pas que tu desrobes sous le nom d’autruy ce que non seulement on refuseroit au tien : mais que tu ne serois pas mesme si effronté que de recevoir ny d’oser pretendre.

Ceste consideration aigrissoit de sorte la douceur de ses premieres pensées, qu’il retomboit presque aux mesmes desespoirs où il vivoit autrefois dans sa caverne, & peu s’en falut qu’il ne retournast à ses premiers desseins de vivre esloigné de tout le monde : puis qu’il ne pouvoit esperer quelque changement en ses miseres : Et faut croire que ceste resolution eust bien esté assez forte pour luy faire executer ce dessein, n’eust esté que quelque bon Demon luy remit devant les yeux ce que le sage Adamas venoit de luy dire, luy semblant que si le Dieu eust cogneu que son malheur n’eust point deu changer, il ne l’auroit pas mis entre les mains d’un si grand personnage, & qui estoit en si bonne estime parmy tous ceux qui le cognoissoient. Avec ceste consolation, apres s’estre longuement travaillé dans le lict, & avoir passé la plus grande partie de la nuict, enfin sur la pointe du jour, il s’endormit, & ne s’esveilla qu’il ne fust fort tard : Astrée, Diane, & Phillis n’en firent pas de mesme, parce qu’Astrée desirant passionnément de conduire Alexis en son hameau, s’esveilla de bonne heure, & Diane craignant que Paris ne la vint trouver au lict, quoy qu’elle le vist avec beaucoup de discretion, toutefois ne se voulant mettre en ce danger, apres qu’elle eut cogneu qu’Astrée estoit esveillée, elle se jetta à bas du lict, & contraignit Phillis d’en faire de mesme, en luy reprochant : Et quoy, mon serviteur, n’avez vous point de honte d’estre si endormy auprez de vostre Maistresse ? Je croy, dit Phillis, faschée qu’elle luy eust rompu son sommeil, que pour esveillée que vous soyez, vous le seriez encores plus, si Sylvandre estoit en ma place. O mon serviteur, dit Diane, laissons Sylvandre où il est : Il ne pense pas en nous, & nous ne pensons non plus en luy. Quelque Amour que j’aye pour vous, reprit Phillis, si ne voudrois je pas estre obligée d’y penser si souvent qu’il fait : Ce sont, repliqua Diane, les mauvaises opinions que vous avez de luy : mais vous verrez que quand j’auray donné le jugement qu’il attend, qu’incontinant il retournera à sa premiere façon de vivre. Par vostre foy, interrompit Astrée, le croyez-vous, ma sœur, comme vous le dites ? Quand vous demandez un serment de moy, dit-elle, il faut bien que j’y songe un peu d’avantage avant que je vous responde pour luy : mais si vous voulez sçavoir de moy ce que j’en voudrois, je vous diray avec verité que je l’ayme tant, & moy aussi, que pour le repos de tous deux, je souhaitterois ce que j’ay dit : Et par ma foy, dit Philis en sousriant, je jure que vous estes menteuse, & pardonnez moy, ma Maistresse, si cela vous offence : car il n’y eut jamais fille qui se faschast d’estre aymée & servie d’une personne de merite, & j’en ay bien veu plusieurs, qui au contraire estoient bien marries lors que ceux qui avoient fait semblant de les aymer, changeoient de volonté, encores qu’elles n’y eussent point de dessein : Et si je diray bien plus, que je n’en ay jamais veu qui en leur ame n’ayent eu quelque desplaisir de voir ces changemens : & moy-mesme, qui n’aymoit point Hylas, je suis contrainte d’avouër que lors qu’il me quitta, j’en eus du desplaisir, quelque mine que j’en fisse : & cela est d’autant que tout ainsi que les recherches de ceux qui nous ayment, sont des tesmoignages de nostre beauté & de nostre merite, de mesme leurs esloignemens sont des preuves du contraire. Vous aurez, dit Diane, telle opinion de moy qu’il vous plaira, mais si vous jureray-je que si c’estoit à mon choix, je ne sçay lequel j’eslirois plustost, ou la continuation, ou la fin de sa recherche, prevoyant qu’elles me rapporteront autant de desplaisir l’une que l’autre : car s’il continuë, à quel dessein le souffriray-je ? puis qu’il n’y a pas grande apparence que mes parens permettent que j’espouse une personne incogneuë, & moy-mesme j’aurois honte que Diane commist ceste faute : Et si nous nous separons d’amitié, je vous asseure que je le regretteray longuement, me semblant que ses merites le rendent digne d’estre aymé. Or celle-cy, dit Phillis, est l’une des plus grandes folies du monde, les parens nous veulent choisir des maris, & nous sommes si sottes que nous les laissons faire : cela seroit bon, si c’estoit eux qui les deussent espouser : Et ne voila pas la mesme consideration qui a rendu Astrée en l’estat où elle est, si ses parens luy eussent laissé la libre disposition de soy-mesme, elle eust espousé Celadon, il seroit plein de vie, & elle contente à jamais, au lieu que par leurs contrarietez, ils en ont fait mourir l’un, & l’autre n’est en guere meilleur estat. Et main tenant pour achever de la ruiner du tout, ce vieux réveur de Phocion luy veut donner Calydon, & s’est tellement persuadé que cela devoit estre ainsi, qu’il ne luy laisse point de repos : Ah ! que s’il avoit à faire à moy, je l’aurois bien tost resolu : Et que feriez-vous, reprit Astrée, si vous estiez en ma place ? Je luy dirois en fort peu de mots, dit elle, Je n’en feray rien : Et quelle opinion auroit-on d’une fille qui parlast ainsi ? interrompit Diane. Et qu’est-ce que l’on en diroit ? Ma Maistresse mamie, respondit Phillis, les paroles ne sont que des paroles, & le vent les emporte, & les opinions ne sont que des opinions, qui s’effacent aussi aysément qu’elles s’impriment, mais espouser un mary fascheux, c’est un effect qui dure le reste de la vie ; & c’est pourquoy j’estime que vous estes peu advisée, toute Diane que vous estes, quand vous dites, que vous ne voudriez pas avoir espousé Sylvandre, que vous avouëz d’avoir beaucoup de merites, & de l’avoir agreable, & seulement parce que vous ne sçavez d’où il est. Eh, ma Maistresse, mon cœur, ne voudriez vous point manger d’une belle pomme, si vous ne sçaviez quel est l’arbre qui l’a portée ? Folie, & folie la plus grande qui soit entre les hommes, qui se tuent de peine à poursuivre les apparences, & ne se soucient point des choses qui sont réelles, & veritablement bonnes. Dieu m’a fait une grande grace de m’avoir donné des parens qui ne me traittent point ainsi, car je vous asseure que s’ils estoient d’une autre humeur, je leur donnerois bien de l’exercice. Diane alors en sousriant : je vois bien mon serviteur, dit-elle, que vostre conseil est bon, mais il n’en faut guere user. Dites moy je vous supplie ceste opinion que vous mesprisez si fort, & ces apparences que vous blasmez, que sont-ce autres choses que la reputation pour laquelle nous sommes obligées, non seulement de mettre ce qui nous peut apporter du plaisir & du contentement, mais la propre vie ? Car y a-t-il rien de si mesprisable qu’une fille sans ceste reputation ? & y a-t-il condition au monde si miserable que celle de la personne qui l’a perduë ? Je vous avoüeray, que qui la veut bien considerer, trouvera que c’est une folie : Mais y a-t’il quelque chose parmy nous qui ne soit folie, si l’on la veut bien rechercher ? Tout (mon serviteur) n’est qu’une vaine ombre du bien que nous nous figurons, & toutesfois encores que nous en recognoissions & vous & moy la verité ; parce que par le commun consentement de tous, il est jugé autrement, ny vous ny moy ne voulons point estre la premiere à rompre ceste glace. Et cela me faict ressouvenir du conseil des Rats, qui resolurent que pour leur seureté, il falloit attacher au col d’un Chat qui les devoroit une sonnette, afin de l’ouyr quand il marcheroit : mais il ne s’en trouva point d’assez hardy en toute la trouppe qui l’osast entreprendre.

Discourant de ceste sorte, ces belles bergeres s’habillerent, & Astrée, sans sçavoir pour quel dessein, se coiffa & s’habilla avec plus de soing qu’elle n’avoit fait depuis la perte de Celadon : à quoy Phillis prenant garde, elle ne peut s’empescher de sousrire, & la monstrant à Diane : Ma maistresse, luy dit-elle, je ne sçay si les bergeres de Lignon sont de ceste humeur : Et de laquelle, dit Diane, voulez vous parler ? Je voy, continua Phillis, qu’Astrée se donne plus de peine à s’agencer que de coustume. Quant à moy, je n’en puis trouver autre raison, sinon la nouvelle amour de ceste belle Druyde, & qui n’a eu naissance que depuis hier. Dites moy, je vous supplie, si c’est l’humeur des bergeres de Lignon, de s’affectionner si promptement, & plustost des bergeres que des bergers ? Astrée respondit : Il est vray que j’ay plus de curiosité de me rendre aymable que je n’eus jamais, aussi est il bien raisonnable : car lors que j’ay esté recherchée par des bergers, j’ay creu d’avoir assez de merites pour en estre aymée, sans que j’y misse plus de peine que de me laisser voir : mais à cette heure si je veux acquerir les bonnes graces de ceste belle Druyde, il faut que j’y rapporte les mesmes soings que le serviteur a accoustumé de faire pour obtenir les bonnes graces de sa Maistresse. Ma sœur, reprit Diane, ou nous sommes Philis & moy de mauvais jugement, ou vous devez estre asseurée qu’il y aura plustost deffaut de cognoissance en celles qui vous verront, si elles ne vous aiment, qu’en vous faute de merite à vous faire aimer. En parlant de ceste sorte, elles finirent de s’habiller, & en mesme temps qu’elles vouloient sortir de la chambre, elles virent dans la sale voisine, Paris qui se promenoit avec Leonide, & qui, à ce qu’il sembloit, l’entretenoit d’une grande affection, parce que ces belles bergeres furent aupres d’eux avant qu’ils les apperceussent : dequoy Paris se trouva honteux quand il s’en prit garde, & apres les avoir salüées en demanda pardon à Diane, qui luy respondit, n’y avoir point d’offence en ce qui la touchoit : car estant la moindre des trois, les autres avoient plus d’occasion de s’en plaindre ; si toutesfois il y avoit suject de plainte, & sans attendre sa responce s’adressa à Leonide, & luy demanda, comment elle avoit passé la nuict ? Mais vous, dit-elle, qui vous estes levée si matin, n’avez-vous point trouvé quelque incommodité ou en la chambre ou au lict qui en soit cause ? J’en ay trouvé sans doute, respondit Diane, & en la chambre & au lict : mais c’est à cause de ceste belle bergere, dit-elle, monstrant Astrée, qui nous a esveillées plustost que nous n’eussions voulu, pour le desir qu’elle a de profiter le temps le mieux qu’il luy sera possible, cependant qu’elle demeurera en ce lieu, je veux dire d’estre le plus qu’elle pourra aupres de la belle Alexis, estant demeurée de sorte sa servante dés qu’elle l’a veuë, que je ne sçay comme nous l’en pourrons separer quand il faudra partir. Allons voir, dit Leonide, si elle est éveillée, & je vous diray un secret que j’ay pensé pour faire en sorte que ceste belle bergere ne s’en separe pas si tost, & lors s’acheminant vers la chambre d’Alexis, Il faut, continua-t’elle, que vous requeriez Adamas, que sans plus dilayer il aille aujourd’huy faire le sacrifice du remerciment du Guy salutaire, & qu’il nous y meine toutes. Je sçay qu’il ne vous en dédira point : car aussi bien faut il qu’il s’acquitte de ce devoir une fois, & il n’a garde d’aller pour ce soir en autre logis qu’en celuy d’Astrée, à cause de Phocion qu’il ayme & estime fort, & par ainsi nous serons encores ensemble demain presque tout le jour : mais, belle bergere, ne me decelez point : car peut-estre si Adamas sçavoit que je vous eusse donné cet advis, il m’en sçauroit mauvais gré, & cela pourroit estre cause qu’il en feroit quelque difficulté. Il n’est pas aussi necessaire qu’Alexis le sçache, parce qu’elle est d’humeur si retirée, qu’elle n’a jamais plus de contentement que quand elle est seule : Je ne me soucie guere que Paris l’entende, sçachant assez qu’il se plaist si fort en vostre compagnie, que ce ne sera jamais luy qui y contrariera. Je ne dementiray jamais, respondit Paris, l’opinion que vous avez de moy : Alors Astrée apres avoir un peu sousrit contre Diane & Phillis : Pensez-vous, Madame dit-elle, qu’Adamas ne nous refuse point, ou bien qu’il y laisse venir Alexis : car il est tres-certain que si tout le reste du monde y venoit, & qu’Alexis seule y deffait, je serois de trop mauvaise humeur, & faudroit que je m’allasse cacher pour ne point ennuyer la compagnie : Vous voyez, interrompit Phillis, comme les bergeres de Lygnon ne sont point dissimulées : Je vous jure, Madame, qu’elle ne ment nullement : Elle & toutes les autres, reprit Leonide, en sont plus estimables : mais d’où vient ceste grande amitié ? Dieu voulut, adjousta Astrée, que ce fut de sympathie, parce que malaysément pourroit-elle estre de mon costé qu’elle ne fust aussi du sien, & si cela estoit, je m’estimerois la plus heureuse qui fust jamais : S’il ne faut que cela, dit la Nymphe, pour vous rendre contente, vous la devez estre sur ma parole : car je ne fus de ma vie si estonnée que d’ouyr hyer au soir Alexis tenir presque les mesmes discours de vous que vous tenez à ceste heure d’elle, estant chose si inacoustumée à son humeur particuliere, qu’il faut bien ce changement venir de quelque plus forte puissance que n’est pas son naturel : Vous la rendrez si glorieuse, dit Philis, que nous ne pourrons plus vivre aupres d’elle : & à ce mot elles arriverent dans la chambre d’Alexis, où elles la trouverent encores dans le lict, d’autant qu’il estoit assez matin, & que toute la nuict elle n’avoit peu trouver repos parmy ses pensées, qui sans cesse l’avoient entretenuë tantost de ses desplaisirs, & tantost de l’heureuse journée qu’elle avoit euë, & de la felicité qu’elle esperoit encore la suivante : de sorte que sur le matin elle s’estoit endormie, & s’estoit à peine esveillée lors que ceste belle troupe estoit entrée dans sa chambre.

Elle fut à la verité grandement surprise de ceste visite inesperée, non pas tant toutefois qu’elle ne se ressouvint de cacher la bague qu’elle avoit prise à Astrée lors qu’elle se jetta dans Lignon, & que depuis elle avoit tousjours portée au bras avec le mesme ruban duquel elle estoit attachée, & aussi de serrer bien sa chemise sur son estomach, tant à fin qu’on n’apperceut point le deffaut de son sein, que pour ne laisser voir à la belle Astrée le petit portrait qu’elle avoit accoustumé de porter au col, & que la bergere ne cognoissoit que trop bien. Elle mit donc la main à moitié sur son visage, & de l’autre elle prit le linceul & s’en couvrit presque toute, comme si elle eust eu honte de se laisser voir en cét estat. Leonide pour mieux joüer son personnage : Que vous semble ma sœur, dit-elle, des belles filles que je vous ameine pour vous ayder à lever ? Ma sœur, dit Alexis se relevant un peu sur le lict, vous m’avez fait une grande honte, en me faisant une si grande faveur : car que diront-elles de moy me trouvant encores au lict ? Et que peuvent-elles dire, reprit la Nymphe, sinon que vous estes paresseuse, & que les filles Druydes des Carnutes ne sont pas si diligentes que les bergeres de Forests ? A ce mot toutes ces belles bergeres luy donnerent le bonjour, & elle apres leur avoir rendu leur salut avec la mesme courtoisie, se tournant du costé d’Astrée : Et vous belle bergere, comment avez vous passé ceste nuict ? Voulez-vous ma sœur, interrompit Leonide, que je le vous die pour elle ? Je vous proteste continua-t’elle, qu’elle a couché icy aupres de vous : Aupres de moy ? reprit incontinent Alexis. Aupres de vous ? continua Leonide, & si ce n’a esté du corps, ç’a esté pour le moins de la pensée : De ceste sorte, respondit Alexis, cela pourroit bien estre : & je le veux croire ; d’autant plus que je vous puis asseurer belle bergere, dit-elle, prenant Astrée par la main, que j’ay bien faict pour le moins la moitié du chemin : car je ne sçay comment j’ay esté toute la nuict embroüillée parmy les discours que nous eusmes au soir, de telle sorte que je ne me suis peu endormir que quand le jour a paru.

Leonide pour donner commodité à ceste chere sœur d’entretenir plus particulierement Astrée, prenant Diane & Phillis par la main, les retira vers la fenestre qui avoit la veuë du costé de leur hameau, & l’ouvrant s’y appuyerent toutes trois, cependant qu’Alexis faisant asseoir Astrée sur son lict, & la tenant tousjours par la main, fut presque transportée de l’extreme affection de la luy baiser : Enfin craignant de luy donner cognoissance de ce qu’elle vouloit cacher, elle se retint, & se contenta de la luy serrer & presser doucement entre les siennes deux. Et apres avoir demeuré quelque temps muette : Je vous jure, luy dit-elle, belle bergere, que toute la nuict j’ay pensé en vous, & aux discours que vous me tintes : Mais dites moy, je vous supplie, est-il bien possible que Phocion (ainsi que Leonide m’asseuroit au soir) vueille vous contraindre de vous marier contre vostre gré ? Madame, respondit Astrée, il est vray qu’il a ceste humeur : mais il est vray aussi qu’il n’y parviendra jamais : Non pas que j’aye la hardiesse de luy contredire tout ouvertement, mais je traitteray bien de sorte Calydon, que je luy en feray perdre la fantasie. Ce n’est pas que je ne recognoisse que ce berger a beaucoup plus de merites que je ne vaux, mais c’est que mon Genie ne sçauroit se bien accommoder avec le sien. jugez, Madame, quelle apparence il y a que je croye Calydon estre Amoureux de moy, que je sçay avoir aymé Celidée plus que sa propre vie, & en avoir fait les excez de desobeyssance que chacun sçait, & contre un oncle qui luy tient lieu de pere, soit pour le soing qu’il a eu de luy depuis le berceau, soit pour les biens qu’il en peut esperer : Mais, dit Alexis, j’ay ouy dire que depuis qu’elle s’est blessée de la sorte que nous la voyons, il a perdu ceste humeur, & qu’il ne l’ayme plus. Je crois, respondit Astrée, qu’il est vray : mais s’il est ainsi, que puis-je esperer de son amitié, qui n’est née que d’autant qu’il pense me devoir aymer, par le commandement de Thamire, puis que celle qu’il a portée à Celidée, que chacun a recogneuë si ardente, s’est esteinte lors qu’elle est devenuë moins belle ? Doncques aussi tost que mon visage changera, son affection en fera de mesme. Qu’est-ce que je deviendrois, si je recognoissois non pas ce changement, mais la moindre diminution de la bonne volonté qu’il m’auroit fait paroistre ? Mais, madame, continua-t’elle, avec un grand souspir, celle-là n’est pas la principale difficulté : car peut-estre pourrois-je bien esperer de retenir cet esprit en l’amitié qu’il me devroit, n’ayant pas si mauvaise opinion de moy-mesme, que pour peu que je m’y voulusse estudier, je ne me peusse asseurer de luy. Il y a bien une chose qui m’en retire d’avantage : Mais, Madame, vous l’oserois-je bien dire, ou si je la vous dis, quelle opinion aurez vous de voir que je vous parle si familierement de mes petites affaires ? Alexis alors en luy resserrant la main : Si vous sçaviez, dit-elle, quelle est l’amitié que je vous porte, vous n’useriez point de ces paroles avec moy, qui ne desire de sçavoir vos affaires & vos intentions, que pour essayer de vous servir, soit par mon propre moyen, soit par celuy d’Adamas, si vous le trouvez à propos. L’honneur que vous me faites de m’aymer, reprit Astrée, est veritablement, Madame, le bon-heur que j’ay recogneu pour moy, depuis quatre ou cinq Lunes ; aussi le tien-je si cher, que j’aymerois mieux perdre la vie que d’en estre privée : mais pour l’offre que vous me faites d’Adamas, je vous supplie de ne luy en point parler, parce que je ne le veux employer en chose de si peu d’importance, & de laquelle je viendray bien à bout, m’asseurant de faire que Calydon mesmes s’en deportera : Dieu le vueille, dit Alexis, mais je le croy difficilement, voyant la beauté de vostre visage, & ayant ouy dire combien il a souffert de mespris de Celidée sans changer. La beauté, belle Astrée, est une glu, de laquelle il est bien mal-aysé de se despestrer, quand une fois l’on a donné de l’aisle dedans. Madame, repliqua la bergere, ceste beauté n’est pas en moy, mais quand elle y seroit, j’espere que ma resolution sera encores plus forte que toutes les violences, ny les opiniastretez de l’Amour. Et c’est ce que je voulois vous dire, car sçachez que plustost je me donneray mille fois la mort, si autant de fois je pouvois revivre, que de me marier jamais, puis que le Ciel ou plustost ma mauvaise fortune l’a voulu. A ce mot elle s’arresta pour prendre son mouchoir pour s’essuyer les yeux, parce qu’elle ne peut retenir ses larmes : Et voulant reprendre son discours, la survenuë d’Adamas l’en empescha, qui de fortune entrant dans la chambre, & y trouvant ceste bonne compagnie, fut bien marry de l’avoir interrompuë, n’y ayant rien qu’il desirast plus que de voir Alexis & Astrée ensemble, pour l’esperance qu’il avoit que ceste pratique remettroit Alexis en son premier estat, & que par ainsi, suivant la parole de l’Oracle, il verroit sa vieillesse contente & bien-heureuse : Toutesfois feignant de l’avoir faict expres, il dit à Alexis apres avoir salüé toutes ces bergeres : Et quoy, ma fille, vous voila encore au lict, & que diront ces belles filles de vous voir si paresseuse ? Mon pere, respondit Alexis, la faute en est à ma sœur qui les a amenées icy sans m’en advertir : La faute, repliqua Adamas, en est vostre, qui estes encores dans la plume : mais si elles me vouloient croire, elles vous foüeteroient de sorte qu’une autre fois vous vous leveriez plus matin : Alors Astrée qui s’estoit levée de dessus le lict pour salüer Adamas : Mon pere, dit-elle, il est raisonnable que nous nous levions matin pour avoir le soing des trouppeaux que nous avons en garde, & il l’est encores plus que la belle Alexis conserve son beau visage, sans se donner tant de peine : Vous en direz, respondit Adamas, ce qu’il vous plaira : mais je suis bien d’advis si elle veut estre belle, qu’elle fasse comme vous : car vostre beauté luy apprend que vostre recepte doit estre fort bonne. Astrée rougit un peu, & vouloit luy respondre lors qu’on le vint advertir que Daphnide & Alcidon estoient dans la sale qui l’attendoient : cela fut cause que pre nant ces bergeres par la main, il laissa Alexis seule pour luy donner loisir de s’habiller, cependant qu’il alloit monstrant à toute ceste belle trouppe les raretez de sa maison, qui se pouvoit dire tres-belle & tres-curieusement enjolivée.

Apres que toute la compagnie fut assemblée, & que pour le contentement de Hylas, Alexis fut arrivée : Adamas creut que pour attendre l’heure du disner, il estoit à propos de leur faire voir les promenoirs, & cela d’autant plus que ce jour là le Soleil estoit un peu couvert des nuës. Chacun s’accompagna de celle qu’il luy pleust, horsmis Sylvandre, Hylas & Calydon : Car Diane fut prise de Paris, auquel Sylvandre par respect estoit contraint de la quiter, & Astrée estoit tousjours avec Alexis, qui empeschoit que la nouvelle affection de Hylas, & de Calydon, ne pouvoit recevoir le contentement de parler à ceste feinte Druyde, & à la belle bergere. Quant à Calydon & à Sylvandre, ils n’en osoient point faire de semblant : mais Hylas qui n’avoit pas accoustumé de se contraindre : Ma Maistresse, dit-il aussi tost qu’ils furent hors du logis, permettez que Calydon entretienne Astrée : Et qui sera celuy, dit Astrée en sousriant, qui tiendra compagnie à Alexis ? Ne vous en mettez point en peine bergere, dit froidement Hylas, celuy qui pourvoit l’Hyver de grains aux oyseaux ne la laissera pas sans secours, & attendant qu’il luy en envoye un meilleur, je m’y offre : Et en mesme temps sans attendre d’avantage, prit Alexis de l’autre bras : Vrayment, dit Astrée à moitié en colere de se voir oster la commodité d’estre seule aupres d’Alexis : Il est aysé à cognoistre, Hylas, que vous n’estes pas des bergers de Lignon, car ils n’ont guere accoustumé d’estre si hardis : Je le croy, dit Hylas, mais il y a bien apparence aussi que des bergers soient si courageux que moy : Il me semble, repliqua Astrée, que puis que vous en portez l’habit, vous en devez avoir le courage. Non, non, respondit-il, bergere, DESSOUS UN FER ROUILLÉ N’EST MOINS PREUX UN ACHILLE : au contraire si l’exemple de la vertu avoit quelque force en ces bergers, Calydon que je vois là sans party, & vous regarder avec un œil qui vous demande l’aumosne, en feroit autant que moy. Astrée baissa les yeux en terre, craignant que pour peu que ce discours continuast, ce jeune berger pourroit bien imiter Hylas, & qu’ainsi d’une faute elle en auroit fait deux : Mais Hylas qui print garde à ceste mine, & qui eut opinion que si quelque chose divertissoit Astrée, il pourroit plus aisément entretenir Alexis : Il fit signe à Calidon, qui rendu plus hardy que de coustume, apres avoir fait une grande reverence à la bergere la prit de l’autre costé sous les bras, feignant que c’estoit pour luy ayder à marcher : La bergere qui vit bien qu’il n’y avoit plus de moyen de s’en desdire, se tournant vers Alexis ; Je confesse que les mauvais exemples, dit-elle, s’imitent plustost que les bons, & qu’il faut que je me desdise de l’avantage que j’ay donné aux bergers de Lignon : Que voulez vous y faire ? dit Alexis en pliant les espaules, si nostre vie n’e stoit meslée de ces amertumes, ne serions nous point trop heureuses ? Elle respondit cela si bas, que ny Hylas, ny Calydon n’en entendirent rien, & toutefois la froideur de laquelle la bergere receut Calydon, luy donna bien quelque opinion, qu’elle eust eu plus agreable d’estre seule avec ceste Druyde : mais feignant de ne le point recognoistre, il ne laissa de continuer son dessein, de sorte qu’il n’y avoit plus personne sans party que Sylvandre. Mais Laonice qui avoit tousjours nourry un esprit de vengeance contre luy, & qui ne cherchoit que l’occasion de luy pouvoir rendre un signalé desplaisir, depuis le jour que par son jugement elle perdit Tircis : le voyant seul, pensa que peut estre elle pourroit en trouver quelque moyen : Elle sçavoit desja l’affection qu’il portoit à Diane, & celle de Diane envers luy, ne luy estoit pas du tout incogneuë, parce qu’ayant tant aymé, il estoit impossible qu’elle ne se prit garde de leurs actions, & mesme en ayant appris ce qu’en diverses fois elle en avoit ouy de leur bouche mesme, c’est pourquoy le voyant seul & pensif, elle s’approcha de lui, & feignant un visage tout autre qu’elle n’avoit le cœur. Que veut dire, berger, ceste tristesse, dit-elle, qui est peinte en vostre visage, estes vous peut estre amoureux ? Bergere, respondit Silvandre, j’ay tant d’occasion d’estre triste, qu’il ne faut point me demander si l’amour en est la cause : Je croy, adjousta-t’elle, que ce ne sont pas de nouvelles occasions, & toutefois ces jours passez vous viviez plus content : mais voulez vous que je vous die ce que j’en pense ? Le subject de vostre melancolie vient ou du mal present, ou du bien absent : Si vous ne m’expliquez d’autre sorte cet Enigme, dit le berger, je ne sçay que vous respondre : Je veux dire, reprit Laonice, puis que vous voulez que je vous parle plus clairement, que le mal present vous tourmente, voyant qu’un autre a vostre place aupres de vostre Maistresse, ou le bien absent, car je sçay que vous aymez Madonthe : Vous estes, dit Sylvandre, sage bergere, une grande devineuse, car l’une des deux choses que vous me dites veritablement me tourmente : mais toutefois, dit-il en sousriant, non pas peut estre tant que vous penseriez bien. Quelquefois, respondit Laonice, en semblable mal l’on ne pense pas estre si malade que l’on est : mais à bon escient Sylvandre, lequel de ces deux maux vous presse le plus ? Lequel, dit le berger, pensez vous que ce soit ? Je ne sçay, dit Laonice, si je vous en dois dire mon opinion, car peut estre ne l’avouërez vous pas : Si c’estoit une faute que d’aymer : Je confesse que difficilement j’en avoüerois la debte : mais puis que pour ne faire tort à tous les hommes (car je croy qu’il n’y en a point qui n’ait aymé quelquefois) il faut plustost dire que c’est une vertu, ou pour le moins une action qui de soy-mesme peut estre ny bonne ny mauvaise : Pourquoy pensez vous que je fasse difficulté de dire la verité, puis qu’en la nyant je commettrois une plus grande erreur ? Vous avez raison, berger, respondit Laonice : car toute personne qui veut estre estimé homme de bien, doit sur tout estre soigneuse de ne blesser jamais la verité. Mais dites moy en vostre foy, Sylvandre, le bien absent ne vous tourmente t’il pas d’avantage que le mal present ? Le berger qui ne vouloit point donner cognoissance de son affection à ceste estrangere, ny à personne, s’il luy estoit possible : voyant que d’elle-mesme elle bastissoit la tromperie qu’il eust esté en peine de controuver, pensa estre à propos de la continuer, & ainsi faisant un petit sousris, luy respondit : C’est une chose estrange que la vivacité de vostre veuë. Je vous jure, discrette Laonice, que je ne croyois pas y avoir personne qui s’en fust pris garde : mais comment l’avez vous peu recognoistre ? Silvandre, luy dit-elle, contentez vous que toutes ces feintes que vous faites pour Diane peuvent bien amuser Thersandre, mais non pas ceux qui avec mes yeux remarquent vos actions : presque tous ceux qui sont le long de la douce riviere de Lignon ont tellement le cœur occupé en leurs propres affections, qu’ils ne prennent garde à celles d’autruy, n’ayans des yeux que pour voir ce qu’ils ayment : mais moy qui n’ay rien à faire qu’à considerer vos actions de tous, j’ay fort bien apperçeu que Madonthe vous plaist d’avantage que Diane : mais ne soyez marry que je l’aye recogneu, puis que peut-estre ne vous seray-je point inutile. Madonthe m’ayme, & je pense qu’elle croira aysément ce que je luy persuaderay : Je sçay que c’est que d’aymer, & quels ressorts il faut toucher pour en avoir le contentement que l’on en desire, je vous promets de vous y ayder & servir en toute ce que je pourray. Sil vandre ne se pouvoit presque empescher de rire de l’ouyr parler de ceste sorte, & pour luy en asseurer encores plus l’opinion qu’elle en avoit conceuë, la supplia de n’en vouloir point faire de semblant, de peur que quelque autre ne s’en prist garde, & sur tout n’en rien dire à Madonthe, parce qu’elle s’en sentiroit offencée, & cela pourroit estre cause de ruiner tout son dessein, qu’il la remercioit grandement des offres qu’elle luy faisoit, lesquelles il ne refusoit point : mais qu’il ne vouloit accepter encores pour plusieurs raisons que bien-tost il luy feroit sçavoir. Silvandre pensoit ainsi faire le fin, mais Laonice qui feignoit de le croire commençoit d’ourdir par là la meschanceté qu’elle luy vouloit faire, & que depuis elle luy vendit si cherement. Cependant Paris, & Diane estoient entrez bien avant en propos : car ce jeune homme brusloit d’une si violente amour pour ceste bergere, qu’il ne pouvoit vivre avec aucun repos que l’ors qu’il estoit aupres d’elle. Et il est certain que si ceste bergere eust eu dessein d’aymer quelque chose, elle eust peu s’en embroüiller : mais depuis la mort de Filandre, elle ne vouloit que l’Amour prist place parmy ses affections, luy semblant que rien n’estoit digne d’estre mis au lieu où un berger si parfaict que Filandre avoit esté si long temps. Que si elle ayma depuis Sylvandre, ce ne fut pas par dessein, mais par une surprise que luy firent les merites & les recherches de ce berger : De sorte que jamais la bonne volonté qu’elle eust pour Paris n’outrepassa celle qu’une sœur pourroit avoir pour un frere, luy semblant d’estre obligée à celle-là par l’amitié qu’elle luy portoit, & empeschée par un vertu incogneuë de l’aymer d’avantage que comme son frere, & qu’en son cœur elle attribuoit à l’amour qu’elle avoit portée au gentil Filandre ; luy toutefois de qui l’affection n’avoit point de limites, apres luy avoir rendu tous les tesmoignages de son amour qui luy avoient esté possibles, il se resolut de tenter enfin quelle seroit sa fortune, & trouvant ceste occasion bonne, il pensa qu’il ne la faloit point perdre. La tenant doncq sous les bras, il la separa un peu d’aupres des autres : & cependant que chacun s’amusoit à diverses occupations, il luy parla de ceste sorte : Est-il possible belle Diane, que quelque service que j’aye essayé de vous rendre, n’ait peu vous donner cognoissance de l’affection que je vous porte, ou si vous l’avez recogneüe, est-il possible que ceste Amour soit demeurée jusques icy sterile, & sans avoir peu donner naissance à un peu de bonne volonté en vostre ame ? Si l’offence fait naistre la haine, pourquoy mes services encores que bien petits ne produisent-ils en vous, non pas de l’Amour, car ce seroit trop de bon-heur, mais quelque peu de bien-vueillance, qui vous les rende pour le moins aggreables ? J’espreuve, & en cela je n’accuse que mon peu de merite, & mon mal-heur trop grand : J’espreuve, dis-je, que tout ce qui est profitable à tous les autres qui ayment, m’est entierement inutile. Mon extréme affection vous outrage, mes services vous desplaisent, ma patience se rend mesprisa ble, ma constance ennuyeuse, & l’aage que je passe en vous aymant, servant, & adorant, tellement infructueuse, que peut estre encores n’avez vous pas pris garde que je sois à vous. Dieux ! ceste cruauté ou plustost ceste mescognoissance pour ne dire ingratitude, accompagnera-t’elle tousjours ceste belle ame, & jamais ne permettrez vous que ce cœur de diamant s’amolisse à mon sang, que je verse par les yeux en forme de larmes ?

A ce mot, Paris se teut, tant parce qu’il eut peur que ses yeux ne fussent assez forts pour retenir dans la paupiere les pleurs que ces paroles luy arrachoient du cœur, s’il continuoit son discours, que pour donner loisir à Diane de luy dire quelque parole qui le peust consoler, elle qui l’aymoit, comme nous avons dit, ne pensant pas qu’il fust reduit aux termes que ces propos faisoient paroistre, & ne voulant, s’il luy estoit possible, qu’il partist mal satisfait, apres avoir tourné les yeux doucement vers luy. Je ne pensois pas, luy dit-elle, gentil Paris, que vous me tinssiez jamais un tel langage, qui est autant esloigné de mon intention, que le Ciel l’est de la terre : vous me blasmez d’estre insensible, & de ne recognoistre l’affection que vous me portez : & quelle me pensez vous estre, si ne vous aymant point, je vis toutesfois de ceste sorte avec vous ? Comment voulez vous que je vous rende plus de preuve de ma bonne volonté, qu’en vous rendant toutes les fois que vous venez vers moy, tout le bon visage que je suis capable de faire, si je reçois tout ce que vous me dites tout ainsi qu’il vous plaist, si je vous responds avec toute la courtoisie, & toute la civilité que je puis penser m’estre permise, & vous estre agreable ? Qu’est-ce que vous desirez d’avantage de moy, ou que pensez vous que je puisse de plus ? voyez vous que je caresse quelqu’un plus que vous ? voyez vous que je vous laisse pour aller entretenir quelqu’autre, ou plustost ne voyez vous point qu’il n’y a personne que je ne laisse pour avoir le bien de parler à vous ? Ah ! belle bergere, dit Paris en souspirant, j’avoüe ce que vous me dites, & que vous faites plus pour moy que pour tout autre : mais que me vaut cela, si enfin vous ne faites rien pour personne ? Si mon affection n’estoit point telle qu’elle est, je veux dire, si elle n’estoit point extreme, je ne demanderois pas peut-estre avec tant d’importunité des tesmoignages de vostre bonne volonté. Mais de tout ce que vous me dites que vous faites pour moy, qu’est-ce que vous ne feriez pas pour le fils d’Adamas, la premiere fois que vous le verriez, encore qu’il ne vous eust jamais tesmoigné aucune affection ? Toutes vos actions envers moy sont veritablement pleines de civilité, & de courtoisie : mais à cela n’y estes vous pas obligée envers tous ceux qui vous voyent, & qui sont de ma qualité ? Et pensez-vous que ces devoirs que vous rendez à mon nom & à ma condition, puissent satisfaire pour ceux que mon extreme affection pense que vous luy devez ? Nullement, belle Diane, souvenez vous qu’au fils d’Adamas il faut ces courtoisies & ces civilitez : mais à l’amour de Paris, il faut quelque correspondance de bonne volonté, si vous ne voulez que je continuë à me plaindre, & de vous comme insensible, & de moy comme le plus malheureux qui ayma jamais tant de beauté. Diane alors, apres estre demeurée muette quelque temps, luy respondit froidement : jusques icy j’ay tousjours creu qu’il n’y avoit rien en mes actions qui ne vous deust contenter, me semblant que je les avois disposées selon les regles que les filles doivent observer, mesme lors qu’elles veulent honnestement plaire, & s’obliger quelqu’un : mais à ce que je vois, je n’y suis pas parvenuë, & puis que je me suis faillie de cette sorte, pour vous monstrer combien je vis franchement avec vous, je vous veux dire ouvertement ma pensée, je vous honore Paris, autant qu’homme du monde, & je vous aime comme si vous estiez mon frere ; si cela ne vous contente, je ne sçay que vous pouvez desirer de moy. Belle Diane, dit Paris, il est vray que cette declaration m’est extremement agreable, & que je demeure plus que satisfait en qualité de fils d’Adamas, mais nullement en celle de Paris, parce que mon affection vous demande quelque chose d’avantage : c’est-à-dire, non pas amitié, mais Amour pour Amour. Or en cecy, reprit incontinent la bergere, si vous n’estes content & satisfait, prenez vous en à vous mesmes, qui laissez aller vos desirs plus outre que vous ne devez, & j’aurois sujet de justement me douloir de vous, si je le voulois prendre, de pretendre de moy plus que je ne dois : Il est vray, repliqua Paris, que vous auriez le sujet que vous dites, si je recherchois de vous, belle bergere, quelque chose qui fust outre vostre devoir : mais tous mes desseins estans fondez sur l’honneur & sur la vertu, il me semble, qu’avec raison vous ne pouvez vous plaindre de mes desirs ; & afin que je parle à cœur ouvert à celle à qui est ce mesme cœur, sçachez belle bergere, que je me suis tellement donné à vous, que je ne puis avoir ny repos ny contentement, que de mesme vous ne soyez mienne : mais avec la condition que je le dois & puis desirer, qui est en vous espousant. Vous me faites de l’honneur, respondit alors Diane froidement, d’avoir cette volonté : j’ay les parens qui peuvent disposer de moy, c’est à eux à qui je remets semblable affaire, & toutefois si vous voulez sçavoir ce que j’en ay dans l’ame, je vous jure Paris, que ny vous ny personne vivante ne me donne, ny donnera jamais à ce que je crois cette volonté : Je vous aime bien comme mon frere, mais non pas pour mary : & ne trouvez cela estrange, puis que je suis toute telle envers le reste des hommes. O Dieux ! dit alors Paris, est-il possible que je ne reçoive jamais un parfait contentement ? donques vous me voulez aimer pour vostre frere : mais vous ordonnez que le reste de ma vie, cette Amour demeure infructueuse : Que voulez-vous Paris, dit-elle, que je vous die ? avez vous envie que je vous trompe, ou qu’avec des discours dissimulez je vous donne des esperances qui n’auront jamais effect ? Il me semble qu’en cela je vous oblige en vous descouvrant franchement ma resolution. O bergere ! la desobli geante obligation qu’est celle-cy, dit Paris en souspirant, & que de larmes & de peine pour m’en acquitter faudra-t’il que je paye à vostre cruauté ?

Ils vouloient continuer lors que se rencontrant à la croisée de plusieurs allées, ils en furent empeschez par le reste de la trouppe qui s’en retournoit à la maison, Adamas les ayant advertis qu’il estoit heure de disner, & mesme Alexis, qui ennuyée & des discours d’Hylas, & d’estre si long-temps separée d’Astrée, alloit recherchant l’occasion de se remettre pres d’elle, de laquelle Calidon l’avoit separée aussi-tost qu’elle vid Diane. Je vous supplie, luy dit-elle, belle bergere, aidez moy à respondre aux beaux discours d’Hylas : car je vous asseure que je ne sçay plus m’en defendre. Ma Maistresse, dit Hylas, quand on ne se peut plus deffendre, il se faut rendre, afin d’espreuver autant la courtoisie que l’on a ressenty la force & la valeur de son ennemy : J’ayme mieux mourir, dit Alexis en sousriant, que me mettre à la mercy d’un tel vainqueur. Et moy, respondit-il, j’ayme mieux non seulement vous ceder la victoire, mais me donner pour vaincu, que si pour me trop opiniastrer à ce combat vous y mouriez : Veritablement, repliqua Alexis, vous estes courtois : mais voyez vous, Hylas, je suis si glorieuse, & desire si peu de m’obliger, que je ne sçay si je dois recevoir l’offre que vous me faites. Et pourquoy en feriez vous difficulté ? dit Hylas, est-ce peut-estre pour la mespriser ? Nullement, respondit Alexis, mais c’est que j’ay peur que d’estre victorieuse de ceste façon, ne soit estre vaincuë. O Dieux ! s’escria alors Hylas, que j’ay tousjours bien dit, qu’il estoit dangereux d’aymer une femme Clergesse, & qui eust esté nourrie parmy ces Druydes des Carnutes : Je vous jure par la foy & par l’amour que je vous porte, n’y avoir rien eu qui m’ait tant donné d’apprehension quand je commençay de vous aymer, que ceste consideration que vous n’estiez pas beste. Et quoy, interrompit Diane, qui estoit bien aise de s’entremettre en leur discours, pour oster le moyen à Paris de continuer les siens, Et quoy Hylas voudriez vous aymer une personne qui le fust ? Je ne voudrois pas, dit-il, qu’elle le fust du tout, mais ouy bien un peu, & pourveu qu’elle eust assez d’esprit pour croire tout ce que je luy dirois, je ne me soucierois point qu’elle peust expliquer les profondes sciences de nos sçavans Druydes : Mais, reprit Diane, si elle n’avoit d’esprit que pour vous croire, vous auriez trop de peine au soing qu’il vous faudroit avoir de sa conduitte : Vous vous trompez, dit il, bergere, car ce qui se fait pour plaisir ne donne jamais peine : quelques-uns le dient bien ainsi, adjousta Diane, mais je pense qu’ils sont menteurs, car je croy bien que le plaisir les empesche de penser à la peine : mais qu’ils n’en ayent point, c’est un erreur, puis que si l’exercice est violent, on les void suer & halleter comme s’ils estoient Pantois : Voyez vous pas, dit alors Hylas, & vous aussi Diane, vous estes une de celles que je ne voudrois point aymer, vous avez trop d’esprit, & vous me mettez en peine de vous respondre, & c’est ce que je ne voudrois pas : car au contraire, je serois au comble de mes contentemens, si celle que j’aymerois admiroit tout ce que je ferois & tout ce que je dirois : car de l’admiration vient la bonne opinion, & de ceste bonne opinion l’amour que je demande.

Sylvandre qui estoit là aupres, & qui ne cherchoit que l’occasion de s’entremettre aux discours de Diane : L’admiration, interrompit-il, feroit le contraire effect de ce que tu desires. Et pourquoy cela, dit Hylas, puis que si elle m’admiroit, elle croiroit en moy toutes choses grandes & parfaites, & lors que je luy parlerois je luy serois un Oracle, mes prieres luy seroient des loix, & mes volontez des commandemens ? L’admiration, reprit alors Sylvandre, feroit un effect tout contraire, parce que les plus sçavans disent que l’admiration est la mere de la verité, & cela d’autant qu’admirant quelque chose, l’esprit de l’homme est naturellement poussé à rechercher d’en avoir la cognoissance, & ceste recherche fait trouver la verité : Et ainsi, Hylas, quand tu dis qu’elle t’admireroit, tu dis de mesme, qu’elle essayeroit de te cognoistre, & te cognoissant, elle trouveroit que si elle avoit estimé quelque chose en toy, elle s’estoit trompée, & alors en te mesprisant elle admireroit de t’avoir admiré : Et toy aussi berger, respondit Hylas, tu es un de ces esprits, que si tu estois fille je n’aymerois jamais : Mais quoy que tu sçaches dire, si suis-je encores en la mesme opinion : car celuy qui admire, cependant qu’il est en ceste admiration, n’est-il pas vray qu’il estime infiniment ce qui la luy donne ? Il est vray, dict Sylvandre, mais incontinent apres il change quand il vient à la cognoissance de la verité, Or, reprit Hylas, cela me suffit : car de dire qu’elle changera incontinent apres ; Mon amy, Sylvandre, luy dit-il en luy donnant d’une main sur l’espaule, qu’elle se haste tant qu’elle pourra, je luy pardonne si elle change plustost que moy, & si de fortune elle me devance, sois asseuré que je l’auray bien tost attrapée : Plusieurs ouyrent ceste responce, parce que Hylas parloit fort haut, & cela fut cause que chacun en rit ; de sorte que ce discours les entretint jusques dans la maison où les tables se trouvant couvertes d’abondance de vivres, chacun s’y assit comme le soir auparavant.

Durant tout le repas l’on ne parla presque que de l’humeur de Hylas, & pour luy donner subject de parler, il y en avoit tousjours quelqu’un qui soustenoit son party. Et Stelle entre les autres, qui encores qu’elle le fit en apparence pour plaire à la compagnie, toutesfois aussi ce n’estoit pas contre son humeur, ayant toute sa vie suivy les regles de ceste doctrine ; & Corilas qui en avoit autrefois ressenty les effects, l’oyant de telle sorte fortifier le party de Hylas. Je voudrois bien, dit-il, s’adressant à Sylvandre, te faire une demande si tu l’avois agreable ; & puis continua : Dy moy berger, je te supplie, est-il vray que l’amour naisse de la sympathie ? Tous ceux, respondit Sylvandre qui en ont parlé, disent qu’ouy : Or, reprit Corilas, je suis donc le seul qui croit le contraire, & s’ils sont fondez sur quelque raison, je m’en remets, tant y a que j’ay l’experience pour moy : Car y peut-il avoir deux humeurs plus semblables que celles de Hylas & de Stelle ? & toutefois je ne voy point qu’il y ait de l’amour entr’eux. Il n’y eut celuy en toute la table qui ne se mit à rire oyant la proposition de Corilas : & lors que Silvandre vouloit respondre, Stelle l’interrompit, en disant ; Je ne t’en desdis point berger, ny je ne rougiray jamais d’une chose qui m’a redonné tout le repos duquel je jouys : car si je n’eusse point changé lors que je commençay de t’aymer, que chacun considere combien j’eusse eu peu de contentement en ceste amour : mais de ce changement, il faut que tu en accuses la raison que Silvandre disoit tantost, qui est que l’admiration est la mere de la verité : car d’abord ne te cognoissant point, je t’admiray, & t’ayant recogneu, je te méprisay, de sorte qu’avec raison l’on te peut donner pour ta devise ce mot, DE LOING, QU’EST-CE DE PRES RIEN : Mais, dit-elle apres en sousriant, s’il est vray que je sois inconstante pour t’avoir aymé quelque temps, & ne t’aymer plus maintenant : pourquoy ne me dis-tu beaucoup plus constante, puis que n’ayant changé qu’une fois & qu’un seul moment, maintenant je demeureray ferme & resoluë tout le reste de ma vie à ne t’aymer point. La demande que j’ay faicte, interrompit Corilas, n’est pas si vous estes volage ou non : mais pourquoy l’estant & Hylas aussi, vous ne vous entre aymez, s’il est vray que la sympathie soit cause de l’amour ? A cela dit-elle incontinent, je te le diray sans que tu en mettes peine en personne, la sympathie peut faire effect lors qu’il n’y a point une plus grande force qui s’y oppose. Et celle qui peut estre entre Hylas & moy pourroit avoir la force de faire naistre ceste Amour, si ce n’estoit que t’ayant cogneu si peu digne d’estre aymé, tu m’as fait concevoir une si mauvaise opinion de tous les autres bergers, que je ne sçay quand je la perdray jamais. Je pense, dit Corilas froidement, que vous avez raison bergere : car depuis que je vous espreuvay telle que vous sçavez, je n’ay peu me figurer que celles qui estoient vestuës comme vous, ne cachassent sous les mesmes habits les mesmes imperfections. Ah ! s’escrierent tous les bergers, Corilas, c’est trop de blasmer toutes les autres. Non, dit Corilas, ce n’est pas mon intention de les blasmer, je ne dis pas qu’elles ayent ces imperfections, mais seulement je dis, que je ne me suis peu figurer qu’elles ne les eussent, & en cela je ne fais tort qu’à moy mesme, qui n’ay le jugement de sçavoir recognoistre la verité : mais de tout ce mal j’accuse ceste trompeuse, laquelle toutefois ne se peut guere glorifier de ceste victoire, puis qu’elle luy a cousté si cher qu’elle advoüe elle-mesme.

Daphnide & Alcidon escoutoient avec beaucoup de plaisir les petites disputes de ces gentils bergers & belles bergeres, & admiroient que ces esprits nourris & eslevez parmy les bois & les lieux champestres fussent si polis & si civilisez : Mais parce que Daphnide avoit un esprit curieux, & qui desiroit tousjours d’apprendre quelque chose, s’ad dressant au sage Adamas ; Il me semble, mon pere, luy dit elle, que pour separer ces deux amis ennemis (elle avoit sçeu qu’on leur donnoit ce nom) & pour m’oster d’une ignorance & satisfaire à une curiosité où j’ay vescu il y a long-temps, vous pourriez bien nous dire, que c’est que ceste sympathie de laquelle ils ont parlé, & si veritablement il y en a une qui fasse aymer, & par ainsi vous nous donneriez tout à coup deux sortes de viandes : L’une pour le corps, l’autre pour l’esprit. Madame, respondit Adamas, vostre curiosité est loüable, & si je n’y satisfaisois, je serois à blasmer, tant pour n’obeyr à ce qu’il vous plaist de me commander, que pour ne vouloir instruire ceux qui le desirent, ainsi que ma charge m’y oblige. Et cela d’autant plus que je le puis faire aysément, & en peu de paroles : Sçachez donc, Madame, que Tautates le supréme createur de toutes choses, a estably là haut où est sa principale demeure, le lieu où il crée toutes les ames : & parce qu’il n’y a pas apparence que rien parte de la main d’un si bon ouvrier, qui ne soit en sa perfection, & celle de l’ame estant l’entendement, il la rend outre que par sa forme elle est raisonnable, par participation intellectuelle. Or ceste participation, elle la prend de ceste pure intelligence de la Planette, qui domine alors qu’elle est creée, & ceste perfection qu’elle reçoit luy est tellement agreable, qu’elle brule toute d’Amour, de l’intelligence qui la luy participe : Et tout ainsi que l’Amant se forme une Idée en sa fantaisie de la chose aymée, le plus parfaitement qu’il luy est possible, afin d’y replier les yeux de son ame, & se plaire en ceste contemplation, lors qu’il est privé de la veuë du visage bien aymé. De mesme ceste ame amoureuse de la supréme beauté de ceste intelligence & de ceste Planette, lors qu’elle entre dans ce corps à qui elle donne la forme, elle imprime non seulement ses sens, & le corps Etheré, dans lequel les plus sçavans disent qu’elle est enveloppée, pour apres se joindre comme par un milieu à celuy que nous voyons : mais aussi sa fantaisie de ce caractere, de la beauté de laquelle elle a esté ardemment esprise dans le Ciel, & d’autant plus qu’elle en peut rendre la figure, & la ressemblance parfaicte, d’autant plus aussi se plaist-elle à la considerer & à la revoir, & se plaisant en ceste contemplation, elle se forme une certaine naturelle disposition d’estimer bon & beau tout ce qui luy ressemble, & à repreuver generalement tout ce qui luy est dissemblable, accoustumant de telle sorte son jugement à y porter la volonté, qu’enfin ce decret se donne non point par discours de raison, mais tout ainsi que toutes les autres choses qui se font en nous naturellement : voire mesme ceste coustume se rend enfin une habitude, à laquelle nous ne pouvons contrevenir sans nous faire un tres-grand effort. De là il avient qu’aussi tost que nous jettons les yeux sur quelqu’un, s’ils rapportent à nostre ame, comme de fideles miroirs qu’il y ait en ceste personne quelque chose qui ressemble à ceste image, que nous nous sommes faites de la Planette, de l’intel ligence tant aymée nous l’aimons tout incontinent, sans faire en nous mesme autre discours, ny autre recherche de l’occasion de ceste bonne volonté, y estant portez par un instinct qui se veut dire aveugle : & au contraire nous le hayssons si nous trouvons qu’il en soit different, & c’est ce que l’on nomme sympathie, qui est ceste conformité que nous rencontrons d’avoir les uns avec les autres, & laquelle est la veritable source de l’Amour, & non pas comme plusieurs ont creu que se fust toute beauté : car si la beauté estoit la source de l’Amour, il s’ensuyvroit que toutes les belles personnes seroient aymées de tous : Et au contraire nous voyons que non point les plus beaux & les plus dignes, mais ceux-là seulement qui reviennent le plus à nostre humeur, & avec lesquels nous avons le plus de conformité, sont ceux que nous aymons le plus.

A ce mot, le Druyde s’estant teu, Daphnide reprit ainsi, J’avouë, mon pere, que tout à un coup vous m’avez esclaircy plusieurs doutes : mais si en ay je encor un, sur ce que vous venez de dire, qui n’est pas petit, & duquel je voudrois bien avoir la resolution. S’il est vray que l’Amour vienne de ceste ressemblance que je rencontre en celuy que j’ayme, d’où vient que de mesme par ceste mesme ressemblance il ne m’ayme pas ? car si je l’ayme pour ceste sympathie, & si ceste sympathie vient comme vous dites, il est impossible que j’en aye pour luy, qu’il n’en ait pour moy : Je veux dire, que si je suis née sous sa Planette, qu’il ne soit né aussi sous la mienne : Et toutesfois nous en voyons tant qui n’ayment point ceux qui meurent d’Amour pour elle. Vostre doute, respondit Adamas, merite d’estre esclaircie, & monstre bien qu’elle part d’un esprit tel que celuy de Daphnide.

Sçachez donc, Madame, que comme je vous ay dit, l’ame se faict une image la plus parfaite qu’elle peut de ceste Planette, & de ceste intelligence qu’elle ayme. Mais d’autant que pour representer un visage si beau & si parfait, la matiere est de telle sorte inferieure, qu’elle ne le peut faire que fort imparfaictement : Il s’ensuit que ceste representation n’est pas également parfaite en chacun, parce que la matiere du corps est quelquefois mieux disposée aux uns qu’aux autres, & selon que l’ame la rencontre, elle y travaille plus ou moins parfaictement : Et il avient de là que tout ainsi que les couleurs, le pinceau, & la toile estans mal propres, le Peintre n’en peut faire quelquefois que des pourtraits aussi fort grossiers, & fort peu ressemblans à ce qu’il veut representer ; de mesme l’ame rencontrant le corps mal disposé à recevoir la figure & les lineamens qu’elle luy veut donner de ceste beauté qu’elle ayme, la ressemblance demeure si imparfaite, qu’à peine y en a t’il quelques traits grossiers & si mal-faits, qu’ils ne sont pas presque recognoissables en chose quelconque : & quand cela se rencontre ainsi, sans doute celuy qui a la representation plus parfaite de l’intelligence & de la Planette, sera aymé par sympathie de celui qui l’a aussi, encore que plus mal-faite : car l’ame de celuy-cy, quoy qu’elle n’ait peu representer en son corps bien au naturel ce visage qu’elle ayme, ne laisse d’en aymer le portrait qu’elle en void bien fait, en quelque lieu qu’il soit, comme l’Amant celuy qu’un estranger aura de sa maistresse, encores que le sien propre ne soit pas bien bon : Mais au contraire l’ame qui aura rencontré une matiere bien disposée, & qui par consequent aura l’idée & le patron bien representé, ne daignera pas seulement tourner les yeux sur l’autre, soit qu’elle le mesprise pour le voir si mal fait, ou soit qu’elle le mescognoisse pour en avoir si peu de ressemblance, & de la procede ceste amour par sympathie qui n’est pas mutuelle.

Mais, interrompit Hylas, me permettez vous, mon pere, de vous faire une demande ? Vous le pouvez, respondit Adamas, si ces amours viennent par sympathie : D’où vient, dit Hylas, qu’apres avoir aymé quelque chose, l’on cesse quelquefois de l’aymer, & que mesme on la mesprise, & que bien souvent on la hayt ? Ceste demande, respondit l[e] Druyde en sousriant, est propre à Hylas, & vous voyez qu’il est vray que ceste sympathie est un instinct aveugle, puis qu’Hylas aymant, & cessant d’aymer un mesme subject, toutefois il ne sçait pourquoy il le fait ainsi. Or je le vous diray Hylas, afin qu’à l’avenir vous sçachiez la raison des choses que vous practiquez si bien.

Figurez vous, Hylas que les impressions que l’ame fait en son corps, par lesquelles elle se represente ceste beauté superieure de son intelligence, & de sa planette, sont veritablement cor porelles : Car en la fantaisie elle met les lineamens, comme un Amant en son imagination ceux de la chose bien aymée, & les represente de telle sorte en ses sens & en sa complexion, qu’elle rendra son humeur ou melencolique, si elle tient de Saturne, ou joyeuse, si c’est de Jupiter, & ainsi des autres. Et apres comme nous avons desja dit, elle prend une si grande coustume de contempler & d’approuver ces choses, qu’elle en fait une habitude, laquelle encores qu’il soit difficile de changer ou de perdre, toutefois ainsi que toutes les autres, peut estre & changée & perduë : Ce que l’on voit ordinairement avenir en la cire par la force du cachet : car encore qu’on y ait imprimé une figure, toutefois si l’on veut, en y mettant un autre cachet, elle perd la marque du premier ; tant parce que l’ame n’ayant imprimé ce caractere en ses sens, & en son corps, que parce que ceste beauté celeste luy plaisoit : Il est certain que si par nonchalance, elle vient à ne s’y plaire plus, ou bien que quelque nouvel object, auquel sa volonté se laisse aller, marque sa fantaisie d’une autre figure, elle perd la premiere ressemblance, & n’en retient rien du tout : Et alors celuy qui aura esté aymé de luy, ou qui l’aura aymé par sympathie, perdant ceste ressemblance qu’il avoit perdu aussi l’amour qui en estoit causée : car tout ainsi que les habitudes, la sympathie aussi se peut perdre & acquerir. Mais, Hylas, si toutes les fois que vous avez changé, vous avez imprimé en vous une nouvelle idée de quelque autre chose, il n’y en doit guere plus avoir en tout le mon de, qui n’ait esté quelquefois imprimée en vous, de sorte que ma fille peut esperer que vous serez plus constant pour elle que pour les autres, non pas pour meriter plus que celles qui l’ont devancée, mais pour avoir esté la derniere. Chacun se mit à rire oyant ceste conclusion, & peut estre Hylas eust respondu quelque chose, n’eust esté qu’Astrée prit la parole :

Mais dit-elle mon pere, s’il est vray que l’Amour vienne de cette sympathie, que veut dire que l’on aura veu fort long-temps une personne sans l’aimer, & qu’apres l’on l’aime ? La response, dit Adamas que j’ay faite à Hylas, peut servir à cette demande : au commencement cette personne n’avoit pas encore le caractere de la beauté de ceste intelligence, & depuis par une nouvelle marque, comme d’un cachet nouveau il le peut avoir imprimé : Mais en voicy encores une raison assez claire.

Depuis que l’ame est enveloppée de ce corps que nous avons, tant qu’elle y est enfermée comme dans une prison, elle n’entend ni ne comprend chose quelconque que par les sens, par lesquels, comme par des portes luy vient la cognoissance de tout ce qui est en l’Univers. Et non seulement elle n’entend ny ne comprend que par eux, mais encores ne peut ny entendre ny comprendre que par des representations corporelles, quoy qu’elle contemple les substances incorporelles. Il advient de là qu’elle ne peut avoir sa cognoissance qu’autant parfaite que ses sens la lui peuvent representer, & que s’ils sont faux & trompeurs, ils la deçoivent, & luy font faire un jugement faux, comme nous voyons en ceux qui sont malades, qui trouvent les viandes, pour bonnes qu’elles soient, de tres-mauvais goust, parce que le leur est depravé. De mesme, ceux qui ont mal aux yeux verront quelquefois les choses doubles, ou une couleur pour autre, ou bien encores que l’œil ne soit pas mal disposé, les milieux par lesquels la vision se fait quelquesfois ne laissent de les tromper, comme à travers un verre bleu tout ce qu’il verra luy semblera de mesme couleur, dedans l’eau un baston bien droit luy semblera tortu, & toutes choses plus grandes ou plus petites, selon la qualité des lunettes par lesquelles il regarde. Or ces faussetez estans representées par les sens pour vrayes, l’ame qui leur adjouste toute creance, en fait incontinent le jugement, qui ne peut estre que faux, parce que les choses presupposées, & desquelles elle tire ses consequences sont telles : Le jugement estant fait, la volonté incontinent s’y porte & y consent, la volonté, dis-je qui a pour son subject le bon, & ce qui est jugé tel, ou qui au contraire fuit de ce qu’elle pense estre mauvais. Et par là vous pouvez entendre, belle bergere, que la raison qui est cause que nous voyons quelque temps sans aymer une personne, qu’apres nous aimons : c’est ou que nos yeux & nos sens, qui doivent representer ces choses à l’ame, ne font pas soigneusement leur office, ou les milieux par lesquels ils agissent, ont quelque imperfection qui les empesche de les pouvoir fidelement representer, lesquelles estans ostées, ils viennent à descouvrir la verité, & à la redire à nostre ame, qui alors recognoissant cette ressemblance se met à aimer ardemment ce qu’auparavant elle avoit veu sans aimer, & sans s’en soucier.

Diane qui escoutoit fort attentivement Adamas : Mon pere, luy dit-elle, & moy aussi, si ce ne vous estoit importunité, je voudrois bien vous faire une demande. Jamais, respondit Adamas, ce qui procede d’une si gracieuse bergere ne peut avoir ce nom : Mais je crains que je ne pourray peut-estre vous respondre assez bien. Je ne suis, repliqua-t’elle en sousriant, plus difficile que ma compagne, & puis la profonde cognoissance que le sage Adamas a de toutes choses, n’a garde de manquer au doute d’une ignorante bergere comme je suis : Dites moy donc je vous supplie, mon père, puis que l’Amour procede de cette sympathie, qui est une image representée en nous de l’intelligence & de la planette sous laquelle nous naissons, que veut dire que les personnes belles sont aimées presque ordinairement de chacun ? car il faudroit donc que tous ceux qui les aiment fussent naiz sous mesme planette, ce que l’on void bien n’estre pas par le temps de leur naissance.

Je me suis bien douté, respondit Adamas, que cette subtile bergere me feroit une demande qui ne seroit pas commune : mais il faut essayer de lui respondre. Toutes les choses qui sont belles, encore qu’elles soient diverses, ne laissent pas d’avoir entr’elles quelque conformité, comme aussi toutes les bonnes : Et c’est pourquoy quelques uns ont dit, qu’il n’y avoit qu’un bon & un beau, à la similitude duquel toutes les choses bonnes & belles sont jugées estre telles. Or ces planettes & ces intelligences qui leur president ne sont bonnes ny belles, sinon qu’en-tant qu’elles ressemblent le plus à ce supréme Bon & Beau ; & quoy qu’elles soient entr’elles separées & diverses, si est-ce que comme que ce soit, elles ne sont aimables ny estimables qu’en-tant qu’elles sont bonnes & belles, & cette bonté & beauté ayant tousjours de la conformité, encore qu’elles soient en divers sujets, il ne faut trouver estrange si plusieurs aiment les personnes qui sont belles, encores qu’elles ne soient pas nées sous mesme Planette, puis que chacun remarque en leur beauté quelque chose qui est conforme à celle de la sienne propre.

Me voila, interrompit Hylas, le plus content homme du monde : car je viens d’apprendre une chose qui m’est grandement avantageuse : Et toy Silvandre, dit-il se tournant vers le berger, tu as raison de demeurer muet, car ce discours ne faict rien pour toy. Je ne sçay, respondit froidement Silvandre, en quoy il t’avantage si fort. Ignorant berger, reprit Hylas, n’as-tu pas ouy que le sage Adamas a dit, que l’occasion pour laquelle les belles personnes estoient aymées de tant de gens, estoit parce que leur beauté participoit avec quelque conformité à celle de toutes les autres planettes & intelligences ? Je l’ay fort bien ouy, respondit Silvandre ? mais enquoy est-ce que cela t’est advantageux ? En ce que, repliqua Hylas, si j’aime tant de diverses beautez, il faut que j’aye de la conformité avec toutes, & ainsi je me puis dire plus beau que toy qui n’en regardes qu’une seule. Je pense, reprit Silvandre en sousriant, que si ta raison est bonne, tu n’es pas seulement plus beau que moy, mais plus que tous ceux de ceste contrée, quand ils seroient joints tous ensemble : Mais il ne faut pas entendre le discours du sage Adamas de ceste sorte : Au contraire, si tu te souviens de ce qu’il a respondu à Daphnide, tu cognoistras que c’est signe d’un grand deffaut en toy, qui as ce pourtraict de ton intelligence & de ta Planette si mal faict, qu’il n’y a pas une de ces belles qui ne desdaigne de voir en toy une si grande imperfection d’une chose si parfaite.

Chacun se mit fort à rire, & Hylas eust bien repliqué quelque chose pour sa deffence, n’eust esté qu’on se leva de table, estant desja assez tard. Et parce qu’Astrée avoit fort bonne mémoire du conseil que Leonide luy avoit donné, de prier Adamas de vouloir venir en leur hameau faire le sacrifice qu’il avoit promis pour l’action de grace du Guy salutaire, elle tira à part Diane, Philis, Celidée, Stelle, & les autres bergeres, & leur proposa, qu’il luy sembloit qu’ayant eu ceste grace de Tautates, d’avoir en leur hameau le Guy sacré, il ne falloit pas estre paresseuses de l’en remercier, parce que cela les rendroit indignes de la continuation de ses graces : Et puis que leurs bergers en estoient desja venus prier le Druyde, elles se monstreroient trop nonchalantes, si avant que de partir pour s’en retourner, elles ne joignoient leurs supplications aux prieres qu’ils avoient faites, & que mesme afin de ne point differer d’avantage une si bonne œuvre, il falloit essayer de l’emmener avec elles en s’en retournant : Il n’y en eut une seule qui n’approuvast ce qu’Astrée avoit dit, & apres avoir consideré qui d’entre-elles seroit bonne à faire la priere pour toutes : elles furent d’avis que Diane accompagnée de toutes, luy en porteroit la parole, ce qu’elle accepta, encores qu’elle en fit au commencement quelque difficulté, & sans dilayer d’avantage s’approchant d’Alexis, elles luy firent entendre qu’elles desiroient de parler au sage Adamas, & qu’elles la supplioient que ce fut par son moyen. Alexis qui ne sçavoit ce que c’estoit, s’approchant d’Adamas, luy fit sçavoir le desir de ces discrettes bergeres, & en mesme temps Diane luy fit la supplication, de laquelle ses compagnes l’avoient chargée. Et y adjousta, qu’elles s’estimeroient grandement favorisées de luy, si sans plus dilayer, elles pouvoient l’emmener à leur retour pour cest effect : Et ensemble le supplioient d’ordonner à la belle Druyde sa fille, & à la Nymphe Leonide, de vouloir honorer ce sacrifice de leur presence. Le Druyde luy respondit, Belles & discrettes bergeres, vostre requeste est si juste, & moy tellement obligé de procurer que le grand Tautates soit honoré & servy en ceste contrée, que pourveu que vous m’accordiez une chose que je vous demanderay, je suis tout prest de faire tout ce que vous voulez de moy. Je ne croy pas, respondit Diane, qu’il y ait entre nous bergere qui ait la hardiesse, ny la volonté de refuser ce qu’il vous plaira de nous ordonner : Je vous demande donc, reprit Adamas, que vous demeuriez encores aujourd’huy en ceste maison, tant afin que j’aye plus longuement le contentement de vous y voir, que pour avoir le loisir de donner ordre à toutes les choses necessaires au sacrifice, & je vous promets que demain je vous reconduiray en vostre hameau, & qu’encores je supplieray ceste belle Dame, dit-il, se tournant vers Daphnide, de vouloir prendre la peine d’assister à ceste action de grace : tant pour rendre cet honneur à nostre grand Tautates, que pour vous obliger toutes, & ne point rompre si tost ceste bonne compagnie : Nous n’avons garde, dit Diane, de contrevenir à ce que vous voulez de nous, estant de toute sorte si fort à nostre avantage.

Ainsi fut resolu le voyage d’Adamas, qui en mesme temps pour s’acquiter de sa promesse, supplia Daphnide d’y vouloir assister, laquelle s’y accorda librement, tant pour luy complaire, que pour estre bien ayse de voir un peu la façon de vivre de ces bergers & bergeres de Forests, desquelles elle avoit tant ouy parler. Alexis fut un peu estonnée de voir qu’il falloit retourner en son hameau, craignant tousjours infiniment d’estre recogneuë. Toutesfois voyant que la chose estoit resoluë, elle dissimula le mieux qu’elle peut ceste crainte : Et parce qu’Astrée apres qu’elles eurent remercié le Druyde de ceste grande faveur, s’en vint resjouyr avec elle, de ce qu’elles possederoient plus longtemps le bon-heur de sa presence : C’est moy, dict Alexis, belle bergere, qui dois faire ceste resjouyssance, & qui puis dire avec verité n’avoir jamais eu rien qui m’ait pleu, depuis que je suis partie du lieu où j’ay estéjeslevée, que le contentement de vous voir. Madame, dit Astrée, Dieu me garde de douter jamais de chose que vous me disiez : Mais j’avouë bien que s’il y en avoit quelqu’une qui me peust mettre en doute, ce seroit celle cy, parce que malaysément me puis-je persuader, qu’une personne qui vaut si peu : & qui est si malheureuse, ait quelque chose qui merite, ou qui soit capable de recevoir une si grande faveur : Belle bergere, respondit Alexis, outre que je ne mens jamais, croyez que j’eslirois plustost la mort que d’estre menteuse à vous que j’ayme si fort : & qu’avant que je vous esloigne, vous cognoistrez la verité de mes paroles : Vous plaist-il Madame, que je le croye de ceste sorte ? Non seulement, dit Alexis, il me plaist, mais je vous en supplie de tout mon cœur : Promettez-moy donc, dit Astrée que vous aurez agreable que je demeure le reste de ma vie aupres de vous, & si vous le faites, vous me rendrez la plus heureuse & contente fille de l’Univers : Astrée, dit Alexis, en luy mettant une main sur la sienne, J’ay peur que vous ne vous repentiez bien tost de ceste resolution : Si vous recognoissiez, dit la bergere, l’humeur d’Astrée, vous ne croiriez pas, Madame, que cela peust arriver, car j’ay ce naturel de jamais ne changer une resolution quand je l’ay prise. Alexis alors demeura sans parler, & se retirant d’un pas l[a]s regardoit avec le mesme œil qu’elle avoit lors qu’elle luy com manda de ne se faire jamais voir à elle, & ceste pensée luy remit si vivement devant les yeux tout ce qui s’y estoit passé, qu’il luy fut impossible de n’en donner quelque cognoissance par les larmes qui luy vindrent aux yeux, & que toutefois elle eut encores assez de force pour retenir. Astrée qui remarqua en elle un si grand changement, demeura de son costé fort estonnée ne s’en pouvant imaginer le subject, & ne luy semblant pas que ce qu’elle luy avoit dit luy peust desplaire, & en ceste peine ayant demeuré toutes deux quelque temps sans parler, enfin la bergere fut la premiere à reprendre ainsi la parole, Je vous voy, Madame, tout à coup si fort changée, qu’il m’est impossible de n’en estre en peine : car si j’en estois la cause, ou par mes discours ou autrement : Je vous jure la foy que je vous doibs, comme à la chose du monde que j’aime & que j’honore le plus, que je vous en vengerois bien tost ; Que si aussi je ne la suis pas, dites moy je vous supplie si ma vie y peut remedier, & vous verrez que je n’ay rien de si cher que vostre service. Alexis qui recogneut la faute qu’elle avoit faicte, se reprenant, essaya de la cacher au mieux qu’il luy fut possible, & pource elle lui dit en souspirant. Il est vray, belle bergere, que le changement que vous avez remarqué en mon visage est procedé de vous, & toutesfois vous n’en avez point de coulpe : mais seulement mon ame trop sensible au souvenir que vous luy avez donné par vos paroles : & afin que vous sortiez de peine, il faut que vous sçachiez qu’estant nourrie parmy les vierges Druydes des Carnutes, dans tout le grand nombre qu’il y en a, je fis eslection d’une, qui entre toutes me sembla la plus aymable, & je suis bien asseurée que je ne me trompay point en mon choix, estant estimée telle de toutes nos compagnes, & ayant toutes les conditions qui se peuvent desirer pour se faire aymer : elle estoit belle, & née de l’une des principales maisons de la contrée, elle avoit l’esprit semblable à la perfection du corps, accomplie en toutes ses actions de toute sorte de courtoisie & de civilité : Mais il faut que j’avoüe qu’apres avoir commencé d’aymer ceste fille, ce qui me lia par apres si estroitement avec elle, fut l’opinion que j’eus qu’elle m’aimoit, & il est vray que ceste cognoissance vraye ou fausse redoubla de telle façon l’amitié que je luy portois, que je me donnay entierement à elle : Je dis de telle sorte que je ne pouvois vivre sans elle, ny elle à ce qu’elle me disoit sans moy ; Nous vesquismes ainsi plusieurs années avec tant de contentemens & tant de satisfactions l’une de l’autre, que jamais l’on ne peut remarquer dans l’enfance où nous estions que la plus parfaite amitié de l’aage le plus parfait. Mais cependant que plus satisfaicte de ceste fortune que les plus grands Monarques ne sont de posseder toute la terre, j’allois joüyssant de mon bon-heur, ne voilà pas que ceste belle & tant aymable fille me quitte, & se separe de telle sorte d’amitié d’avec moy qu’elle ne me veut plus voir, & sans m’en dire le subject me hayt & me chasse d’aupres d’elle ? Le sursaut que je receus de ce chan gement fut si grand, & le coup si sensible, que me donnant du tout à la douleur, je tombay en la maladie que vous avez sçeuë, & de laquelle je ne suis pas encore ny n’espere jamais estre bien guerie. Et lors que vous m’avez tenu ce langage de vostre humeur ferme & arrestée : je me suis ressouvenuë de semblables discours que si souvent cette belle & sage fille m’a tenus, & depuis si mal observez, & ceste pensée a esté cause du changement que vous avez recogneu en mon visage. Madame, dit Astrée, je suis marrie d’avoir esté cause de vostre ennuy : Je m’asseure que vous m’en jugerez bien innocente, & que si j’en eusse sçeu quelque chose, je n’eusse pas commis ceste faute : mais qui eust jamais pensé, vous voyant si belle & si remplie de ces perfections, qui peuvent convier & retenir la bien-vueillance de tout le monde, que vous eussiez rencontré une fille de l’humeur dont vous la dépeignez, & si peu advisée que de laisser volontairement eschapper de ses mains un bon-heur que chacun doit desirer & rechercher si soigneusement ? Mon Dieu ! Madame, combien me semble-t’il que j’eusse esté plus curieuse de la conservation d’un si grand bien, si le Ciel outre mon merite m’eust eslevée à une si grande fortune ? & avec combien de soing la rechercherois-je, si je pensois qu’avec peine & travail je la peusse quelquefois obtenir ? mais le Ciel qui m’a regardé d’un mauvais œil à ma naissance, ne me veut pas estre si favorable au cours de ma vie. Belle bergere, dit alors Alexis, je vous supplie si vous ne voulez me deso bliger grandement, n’accusez jamais de deffaut ceste belle & tres-sage fille pour m’avoir traitée de ceste sorte : car je ne puis souffrir sans un extreme desplaisir qu’elle reçoive du blasme de ce qu’il faut seulement accuser mon deffaut, & le mauvais astre sous lequel je suis née. Et quant au desir qu’il semble que vous ayez d’entrer en sa place, c’est moy, belle Astrée, qui le devrois souhaiter & rechercher avec toute sorte d’artifice, mais une seule chose m’en empesche : Et croyez moy, que si ce n’estoit ceste consideration, mes desirs surpasseroient les vostres : Mais, belle bergere, je crains qu’encores que d’abord vous me fassiez le bien de me juger digne de vostre amitié ; lors que vous m’aurez plus particulierement recogneuë vous n’en fassiez un jugement tout contraire, & qu’il ne vous convie à me traicter de la mesme sorte que ceste belle & sage fille de qui je regrette la pette avec tant de desplaisir : & si cela m’arrivoit, je ne sçay ce que je deviendrois, pouvant dire avec verité que je suis si foible à semblables coups, que je ne sçay comme la vie m’est demeurée apres les avoir receus. Et puis qu’il a pleu au grand Tautates que je les aye suportez, j’avouë que la crainte de retomber en un semblable inconvenient me faict toute fremir, & me glace le cœur. Il ne vous plaist pas, Madame, reprit Astrée, que je die que ceste belle fille a eu tort de vous traicter ainsi, & moy qui ne veux vous desplaire pour quelque consideration que ce soit, je ne veux pas le dire : mais si feray bien avec vostre permission, que jamais elle n’acquerra chose de si grande valeur que celle qu’elle a perduë ; & que si Bellenus par une particuliere faveur me mettoit en sa place, tout le reste du monde ne me seroit rien au prix de ceste faveur, laquelle j’essayerois de conserver, non seulement avec le soing & la peine, mais avec le sang & la vie. Ah ! belle bergere, dit Alexis en souspirant, ce seroit à moy, quand ce bonheur m’arriveroit à qui ce soing devroit estre reservé : mais croyez moy, ma belle fille, que vous ne sçavez ce que vous demandez quand vous desirez mon amitié : J’avoüe, Madame, ce que vous dites, respondit Astrée, mais cela d’autant que le bien que je recherche est si grand, qu’il ne peut estre compris de la foiblesse de mon entendement : Mais si ce n’est mon peu de merite, qu’est-ce qui vous peut empescher de me faire ceste grace, puis que j’appelle Bellenus pour tesmoing ? que si je l’obtiens de vous, je la conserveray plus cherement que ma vie ; je dis ceste vie qui ne me peut estre que tres-desagreable, si je suis refusée, & que tres-heureuse si vous m’en jugez digne. Alexis alors toute pleine de contentement, luy prenant la main & la luy serrant un peu : Belle bergere, lui dit-elle, souvenez vous où nous laissons ce discours, nous le finirons demain en nous en allant en vostre hameau, & cependant soyez asseurée que j’ay plus de volonté de vous aymer & servir que vous ne le sçauriez desirer.

Ce qui fut cause qu’Alexis remit ce discours à une autrefois, ce fut pour ne le pouvoir continuer plus long-temps, sans donner quelque soupçon à ceux qui les regardoient, & qui voyant les changemens de son visage eussent peu s’en estonner, & lesquels elle esperoit pouvoir mieux couvrir par les chemins, où la pluspart attentifs à marcher n’attendent qu’à choisir les plus commodes passages : mais outre cela, elle faisoit dessein de se conseiller & avec Adamas & avec Leonide, de ce qu’elle avoit à faire en ceste occasion : Et de fortune, Hylas qui ne pouvoit supporter de si longs entretiens sans qu’il en eust sa part, comme s’il y eust esté envoyé expres, vint interrompre leur propos. Ma maistresse, luy dit-il, vous entretenez si longuement & si soigneusement ceste bergere, que si vous continuez vous me ferez croire que vous trouvez les bergeres de ceste contrée plus aymables que les bergers : De cela, dit Alexis, n’en soyez point en doute, & n’en accusez que la nature, qui veut que chacun ayme son semblable : mais mon serviteur, ne vous en fachez point, car il me restera encor assez d’amour pour vous. Je croyois, reprit froidement Hylas, que pour avoir esté nourrie parmy les sçavantes filles Druydes, vous sçeussiez mieux les ordonnances de la nature que vous ne faictes : mais puis que vous en estes sortie si ignorante, il faut, ma maistresse, que je vous instruise mieux qu’elles n’ont pas fait : Peut-estre mon serviteur, respondit-elle en sousriant, y perdriez vous & le temps & la peine aussi bien qu’elles ; c’est pourquoy je ne vous conseille pas de l’entreprendre. Toutesfois, repliqua Hylas, je ne puis surporter l’outrage que vous me faites, sans m’en plaindre, puis mesme que vous ne voulez pas estre instruite de vos er reurs. Je serois bien marie, dit Alexis, si Hylas se pleignoit de moy à bon escient, mais je croy qu’il se jouë : Et comment ? reprit Hylas, penseriez vous que je ne fusse en colere quand je vous oy dire que vous aurez encor de l’amour de reste pour moy, apres que vous aurez aymé ces bergeres, puis qu’il semble que vous me vueillez donner ce dequoy elles n’auront pas affaire, & seulement le reste des autres ? J’entends, ma maistresse, que ce seront elles qui auront ce reste apres moy, puis que toutes les raisons le veulent ainsi : S’il n’y a que cela qui vous fasche, mon serviteur, respondit Alexis en sousriant, nous y mettrons ordre nous separerons mon amitié en deux, une des parties sera pour aymer ces bergeres, & l’autre les bergers, & parmy les bergers vous serez le premier que j’aymeray. Mais de ces deux parties, adjousta Hylas, laquelle sera la premiere & la plus grande ? Il ne faut point douter, respondit Alexis, que ce ne soit celle qui doit estre employée pour les bergeres, & avec raison, parce que des bergers vous estes le seul que vous voulez que j’ayme, & des bergeres, il n’y en a point que je ne vueille aymer & servir : Vrayement, dit alors Hylas, j’avouë que vous avez raison, & que j’ay eu tort de vous accuser d’ignorance, puis que vous en sçavez mesme plus que Silvandre.

Cependant qu’ils parloient ainsi, le reste de la compagnie s’entretenoit diversement dans la sale, & Philis qui avoit continuellement l’œil sur Astrée, voyant que Calydon s’aprochoit d’elle, & sçachant assez combien ce lui estoit une pesante charge que celle de parler à luy en particulier, elle s’avança pour les interrompre : & laissa Silvandre seul aupres de Diane : car de fortune Paris desirant de se conseiller avec Leonide, s’estoit retiré avec elle dans une chambre, de sorte que Silvandre avoit eu le loisir de s’approcher de ceste bergere, aupres de laquelle Philis avoit aussi tousjours demeuré, jusques à ce que Calydon l’en fit partir : Et parce qu’ils se faisoient continuellement la guerre ; Je ne veux pas, ma Maistresse, dit-elle en s’en allant, que vous me jugiez si jalouse, que je ne vueille laisser quelquefois ce berger seul aupres de vous : je suis si asseurée de ma bonne fortune, & de son peu de merite, que je ne le craindray jamais : Et pour vous monstrer que je dis vray, je vous laisse tous deux pour assister Astrée en ce grand combat que je vois luy estre preparé par cét ennemy qui l’approche : Et sans attendre leur response, s’alla joindre aux costez d’Astrée, qui jugeant bien à quelle occasion elle y venoit, la prit par une main, & passant l’autre bras sur le sien la tenoit la plus pres d’elle qu’elle pouvoit, pour donner subject à Calidon de ne la point acoster : Mais ce jeune berger, qui estoit veritablement touché de la beauté d’Astrée, ne se peut empescher de s’y en venir : & parce que la recherche qu’il luy faisoit estoit au sçeu de Phocion, qui l’avoit pour tres-agreable, & par l’avis de Thamire qui la luy avoit conseillée, il luy sembla qu’il n’importoit point de parler à la bergere en la presence de quelqu’autre ; qu’au contraire, peut-estre Phillis lui ayderoit à luy declarer son affection, puis qu’elle devoit croire que c’estoit l’avantage de sa compagne. Phocion en ayant desja fait le mesme jugement, luy qui estoit tenu pour le plus sage Pasteur de son temps, & Oncle de la bergere : & qui depuis la mort de ses père & mere, en avoit tousjours eu le mesme soing que si elle eust esté sa fille.

S’approchant donc avec cette asseurance de cette belle bergere : Ne seray je point importun, luy dit-il apres l’avoir salüée, si sans estre appellé, je viens estre le troisiéme en vostre conseil ? Jamais Calidon, respondit Astrée, ne sçauroit avoir ce nom, en quelque lieu qu’il aille, & mesme venant vers des personnes qui l’estiment tant que nous faisons : Je voudrois, respondit le berger, que cette estime fust changée en amour. Quelquefois, ajousta la bergere, nous desirons des choses au dommage d’autruy, & qui ne nous sont point avantageuses. Je croy, ajousta Calidon, ce que vous dites pouvoir avenir en toute autre occasion qu’en celle qui se presente : car que mon desir soit à vostre desavantage, permettez moy de dire, belle bergere, que vous ne le devez point penser, puis que le sage Phocion le juge d’autre sorte. Phocion qui en prudence & en sagesse est tenu pour l’Oracle de tous les plus sages bergers de cette contrée, & qui m’a fait l’honneur de m’accorder la requeste que je luy en ay fait faire par Thamire. De dire aussi que ce que je souhaitte soit à mon dommage, tant s’en faut qu’il puisse estre ainsi, qu’au contraire, je n’auray jamais bien ny contentement que ce bon-heur ne m’arrive. Je ne sçay, repliqua Astrée avec un visage un peu plus rude, quelle peut estre la requeste dont vous parlez : mais si fay bien que si c’est chose qui me touche, il n’y a personne qui vous doive ny puisse promettre rien contre ma volonté, puis mesme que mon pere & ma mere, pour mon mal-heur, m’ont esté ostez. Et quant à ce que vous dites de Phocion, vous ne sçauriez me raconter tant de choses de sa prudence, que je n’en croye encores d’avantage : mais cela ne conclud pas, que nous fassions luy & moy un mesme jugement : & quoy que le sien puisse estre le meilleur, il y faudra bien du temps à m’y faire consentir : & pour dire le vray, je croy que si ce sage Pasteur sçavoit les choses que j’ay dans l’ame, il laisseroit bien-tost cette opinion : Et c’est ce qui me faict vous supplier de vouloir changer la vostre, car si vous la continuez, outre que vous n’y avancerez rien, encore n’en retirerez vous que du mescontentement & pour vous & pour moy. Les belles, reprit Calidon, sont comme les Dieux, elles veulent estre vaincuës par supplications. Je ne sçay, dit-elle incontinent, quelles sont les belles, mais si fais bien, que vos paroles, ny vos prieres envers moy, ne vous acquerront jamais chose qui vous soit agreable pour ce sujet. Peut-estre, ajousta-il, quand vous me verrez mourir devant vos yeux, vous n’aurez pas tant de cruauté, que la pitié ne puisse trouver place parmy tant de beautez. Si vous continuez, respondit Astrée, vous me ferez croire que vous pensez encore parler à la belle Celidée : mais voyez vous Calidon, & vous & moy meritons mieux, car il n’est pas raisonnable que nous ayons le reste de quelque autre, & plutost que cela fust, je vous dis franchement que pour vous en divertir, je prendrois la resolution de Celidée. Puis que la mort m’a osté ce que je desirois, je ne veux plus qu’elle puisse avoir cet avantage sur moy, & ne pensez pas que je n’estime & n’honore vostre merite autant que de berger de cette contrée, & que je ne me recognoisse vostre obligée, en la recherche que vous faites de moy, & mesme avec l’intention que je sçay que vous avez : Mais ne vous persuadez pas aussi, que toutes ces considerations me fassent jamais changer de volonté : Et tenez cecy pour un Arrest escrit des Dieux dans l’immuable Destin. PUIS QU’ASTRée A PERDU LA PREMIERE CHOSE QU’ELLE A AYMEE, ELLE N’A PLUS D’AMOUR QUE POUR TAUTATES, AU SERVICE DUQUEL, ELLE PASSERA LE RESTE DE SES JOURS, AINSI QU’ELLE LUY A PROMIS. Et vous souvenez, Calidon, que si vous ne croyez cette prophetie, le temps vous la fera trouver si veritable, que vous vous repentirez d’avoir esté trop incredule.

Ceste response si resoluë qu’Astrée fit, estonna de sorte le berger qu’il demeura sans replique, & la bergere le voyant ainsi confus, se levant d’aupres de luy, laissa Philis en sa place, & s’en alla trouver Alexis, qui la voyant aprocher & cognoissant à ses actions qu’elle estoit troublée, laissa Hylas, pour sçavoir d’elle ce qu’il y avoit de nouveau : Madame, luy dit-elle avec un sousris meslé de desdain, vous direz que je n’ay pas assez affaire à supporter mon fardeau, si ces Amants sans party ne me venoient encores sur charger de leurs importunitez. Je vous asseure que Calidon a fort bien sçeu choisir son temps, c’est bien à ceste heure que les discours d’amour me plaisent, je le conseille de continuer, s’il ne veut que perdre sa peine, il pense peut-estre parler à Celidée, ou que je ne sois icy que pour payer le temps qu’il a perdu en la servant : & sur ce propos raconta à la Druyde tous les discours qu’il luy avoit tenus, & la responce qu’elle luy avoit faicte avec une si grande passion, qu’Alexis cogneut bien que mal-aisément recevroit-elle jamais du mal de ce Rival.

Cependant Silvandre estoit aupres de Diane, elle assise & luy à genoux, mais si plein de contentement de se voir pres d’elle sans y estre empesché de Paris ny de Philis, qu’il ne pouvoit assez remercier Amour d’une si grande faveur. Ma belle maistresse, luy dit-il, par où commenceray-je à vous remercier de la grace que vous me faictes de vous arrester icy, où la compagnie que vous y avez ne peut que vous estre importune, au lieu que vous pourriez passer beaucoup mieux ces heures avec les doux entretiens de ces gentils bergers & de ces discrettes & belles bergeres ? Silvandre, luy respondit-elle, encores que je vueille bien que vous me soyez obligé, si est-ce que vous ne devez pas croire qu’en cecy je fasse pour vous tant que vous dites, puis que je m’asseure n’y avoir une seule de la trouppe qui ne voulut avoir changé avec moy, & je vous jure, berger, que je ne les envie point toutes ensemble : Si je pensois, reprit Silvandre, que vo stre cœur consentist à ce que vostre langue profere, je me dirois le plus heureux berger de l’Univers : S’il ne vous faut que cela, repliqua Diane, pour estre heureux, asseurez vous sur ma parole que vous avez tout l’heur que vous sçauriez souhaiter. Et quel tesmoignage en puis-je avoir ? dit Silvandre : Vous estes personne de tant de jugement, respondit la bergere, que vous recognoistrez assez la verité quand il vous plaira de la rechercher : Outre que si cela n’estoit pas vray, qu’est-ce qui me pourroit obliger de demeurer icy, puis que je pourrois trouver autant d’excuses que j’en voudrois pour aller ailleurs chercher l’entretien qui me seroit plus agreable que le vostre ? mais j’ay bien plus à craindre que Silvandre ne s’ennuye aupres de moy, n’y ayant rien qui luy puisse arrester que sa seule civilité : Ma belle maistresse, adjousta incontinent Silvandre, cest excez de courtoisie dont il vous plaist user envers moy à ce coup, m’offence plus que vous ne sçauriez croire, puis que si vous avez ceste opinion de moy, ou vous me tenez pour personne de peu de jugement, ou vous faites un grand tort au vostre & à mon affection : car il faudroit bien que je fusse sans cognoissance, si je ne voyois les perfections de la belle Diane, puis que chacun les void, les advouë & les admire : Seroit-il possible que Silvandre fust le seul entre les hommes qui demeurast aveugle pour ne voir point un soleil si esclatant ? ou le voyant, si je ne l’admirois ? Aussi faut-il que je confesse que veritablement je suis tellement esbloüy par une si grande lumiere quand je suis aupres de vous que je n’ay plus des yeux que pour voir, ny esprit que pour adorer ceste Diane en terre, que je tiens bien plus advantagée que celle qui est dans les Cieux, puis que celle là y est surmontée par la beauté de son frere, & celle-cy surpasse tout ce qui est en l’Univers. Silvandre, respondit la bergere en sousriant, je vous promets de dire tout ce que vous voudrez de moy, qui me recognois assez pour telle que je suis : mais qui ne veux point trouver estrange que la feinte que vous avez entreprise vous fasse tenir ces discours : Mais à propos de vostre gageure avec Phillis, jusques à quand ordonnez vous berger, que je sois vostre Maistresse ? & quand voulez vous que je change ce nom avec celuy de vostre Juge ? Les discours que je vous tiens, respondit incontinent le berger, sont si veritables, qu’ils n’ont rien de commun avec ceste gageure : & quant à ce nom de maistresse duquel vous parlez, croyez belle Diane, que vous pouvez prendre celuy de Juge quand il vous plaira : mais non pas vous despoüiller jamais de celuy de maistresse, que non pas la gageure ny la feinte, mais vos perfections & mon affection vous ont si justement acquis sur mon ame. Je vous ay desja dit, reprit la bergere, que je trouve bon que vous parliez de ceste sorte, jusques à ce que ceste feinte soit achevée : mais enfin quand voulez vous que nous sortions de ceste affaire tous trois ? car il me semble qu’il a tantost assez continué, & que le terme des trois Lunes est presque doublé : Quant à moy, dit Silvandre, je n’avanceray ny ne recule ray le temps qu’il vous plaira, estant tres-asseuré, que quoy qui en arrive, je ne changeray point de condition : Ne parlons jamais, dit Diane, de l’avenir sinon avec doute, puis qu’il n’y a que les Dieux qui le puissent sçavoir, & dites moy Silvandre, voulez vous que nous employons ceste apresdinée à terminer ce different ? Il me semble que la commodité y est bonne, & l’assistance telle que nous la sçaurions desirer. Silvandre qui craignoit, quelque mine qu’il fit, l’humeur de Diane, & qui sçavoit bien qu’il ne falloit plus esperer de vivre avec elle de ceste sorte quand ceste feinte seroit ostée, demeura un peu surpris, & ne respondit pas si tost à la bergere, qu’elle ne cogneust bien la peine en laquelle il estoit, & cela ne faisoit que l’asseurer d’avantage de la verité de son affection. Et toutefois feignant comme de coustume, Vous ne respondez point berger, dit-elle, voulez vous que nous prenions ceste commodité, ou bien que nous retardions jusques à demain, que nous serons dans nostre hameau ? Voyez comme je suis Juge traictable, je m’en remets à vostre volonté : Mon Juge, dit alors Silvandre en sousriant, avant que je vous responde, passons quelques articles entre nous, promettez moy que vostre jugement ne me sera point desavantageux, & que la chose du monde qui m’est la plus aggreable, ne me sera point deffenduë, & avant que de partir de ce lieu, je veux bien recevoir vostre jugement : Mon jugement, dit froidement Diane, sera juste : Et quant à la deffence que vous craignez, si vous me faictes entendre de quoy vous voulez parler, je vous y respondray : Silvandre alors prenant un visage plus posé : Je ne suis jamais entré en doute, mon Juge, luy dit-il, que vous ne fussiez tres-juste : mais n’avez vous pas ouy dire que la justice extreme est une extreme injustice ? Et parce que je vous vois desirer une explication sur ma seconde requeste, je suis d’opinion, ma maistresse, continua-t’il en sousriant, que nous remettions ceste affaire à une autre fois, afin que j’aye un peu plus de temps pour mieux instruire mon juge.

A ce mot, ils furent interrompus par Adamas, qui convia Daphnide & le reste de la compagnie d’aller au promenoir, puis que la chaleur du jour estant abbatuë, l’on auroit plus de plaisir dehors que dedans la maison : Et parce que la plus grande partie estoit bien ayse de prendre un peu d’air, & que la beauté du lieu les y convioit, toute la trouppe s’y achemina, les uns chantant, & les autres discourant de ce qui leur estoit le plus aggreable.