[retour à un affichage normal]

ZENOBIAS.
aux Roys.

  Si j’avois faict appeller Arcylante, j’aurois pour moy cette excuse que Parysatis ne me souffriroit jamais pour son serviteur, si je pouvois souffrir que qui que ce soit osast avec dessein tourner les yeux sur elle. Mais je n’ay faict que me defendre, & opposer mon courage à la violence d’un Prince qui de toutes les qualitez qu’il avoit, n’a jamais creu que les mauvaises. Si je l’ay tué c’est son mal-heur, & si je me suis battu, c’est que vos Majestez me font l’honneur de m’enseigner comme il faut que je vive. J’ay en l’un & en l’autre des exemples qui parlent pour moy, & qui vous accuseront de me traitter plus mal que vous-mesmes, si vous me condamnez. Je scay que ceste action ne merite point de loüange : Mais je scay bien aussi, qu’elle n’est pas si honteuse, que pour m’en punir vous deviez rechercher un supplice si effroyable qu’est celuy de me priver de vous voir. Souvenez-vous donc, s’il vous plaist, que je ne suis plus à moy, puisque vous m’avez donné à la plus belle & à la meilleure chose du monde, & que si vous me refusez la permission de retourner à la Cour, vous me reduisez à la necessité de vous desobeïr.

  Ceste lettre fut receuë avec joye, & leuë de ces deux Princes avec de tres-particuliers mouvemens d’amitié. Zenobias eut tout ce qu’il demandoit, mais à condition qu’il atten- droit qu’il fust nuict pour entrer à la ville. Ce temps luy fut un exil si long & si insupportable, que pour le passer il se mit à escrire à Parysatis, & en sept ou huict heures qu’il fut bany, (c’est ainsi qu’il nommoit cet esloignement) il luy envoya six lettres. Je ne vous diray que la premiere, parce qu’elle est fort courte, & qu’elle est fort courte, & qu’elle n’est pas superfluë pour la cognoissance de sa vie.

  Si j’ay pris la hardiesse, Madame, de faire quelque chose sans en avoir receu vostre commandement, vous en rejetterez, s’il vous plaist, la faute sur un, qui non content de vous deplaire, m’a contraint de n’estre pas plus sage que luy. Mais je luy ay pour toute sa vie appris quel crime s’estoit de ne vous garder pas tout le respect qui vous est deu. Il est mort pour la satisfaction de ses fautes, & peut-estre aussi des miennes. Si vous ne me commandez d’adjouster à la perte d’un audacieux, celle d’un desobeïssant. J’en feray, Madame, tout ce que vous ordonnerez, & le feray avec une joye si veritable, que vous y cognoistrez que tousjours ce sera malgré moy, s’il m’arrive jamais de vous desobeyr.

  Parysatis à qui toutes les heures du jour donnoient de nouvelles preuves de l’amour & du merite de Zenobias, receut ceste lettre, & les autres, avec un visage où son contentement se lisoit ; mais se lisoit de sorte, qu’on y remarquoit je ne sçay quel ennuy, qu’elle ne pouvoit cacher autant qu’elle l’eust souhaitté. Cela fut cause que Zenobias ne sçachant d’où ceste nouveauté venoit, se resolut de n’attendre pas la nuict, mais de haster son retour, & par des chemins detournez gaigner les jardins du Palais. Il monta à cheval à Soleil couchant, & avec toute la diligence qu’il pût regaigna Palmire. Il est vray qu’il n’y fut pas si tost qu’il esperoit, pource qu’un orage extraordinaire estant survenu tout à coup, le tonnerre tomba si prés de luy, que son cheval en fut tué entre ses jambes. Il prit cet accident, ou pour une punition de sa desobeïssance, ou pour un presage de quelque mal-heur dont le menaçoit le desplaisir de Parysatis. Toutefois le temps luy fit veoir que les choses naturelles agissant sans passion, comme elles agissent sans cognoissance, ne se doivent expliquer ny à bien, ny à mal. Il fut donc obligé de faire descendre Polemandre, & prendre son cheval : mais ne voulant pas aller loin de ceste façon, il commanda à cet Escuyer de le venir trouver dans une maison qu’il voyoit devant luy, & qu’infalliblement il l’y attendroit, & luy feroit prester un cheval. Zenobias quitte Polemandre, en disant cela, & picque vers ceste maison. Il entre sans se faire cognoistre, & demande à parler au maistre. Une Dame vint aussi-tost au devant de luy, & le recognoissant d’abord : Seigneur, luy dit-elle, vous soyez le tres-bien venu : ce n’est pas d’aujourd’huy que j’ay l’honneur de voir le grand Zenobias dans ma chetive Cabane ; mais, à n’en mentir point, je ne l’ay jamais eu, ny mesme esperé parfaict comme je le reçoy maintenant. Comme elle disoit cela, Zenobias avoit mis pied à terre pour la saluër, & s’estonnant d’avoir esté si bien cogneu d’une personne qu’il n’avoit jamais veuë, ne sçavoit comme expliquer ce langage qu’elle luy avoit tenu. Il ne se souvenoit point d’estre venu où il estoit, ny d’en avoir mesme ouyr parler. C’est pourquoy, apres qu’il eust salué ceste venerable Dame, il luy prit la main, & luy dit : Je ne croyois pas, ma mere, estre assez honneste homme, pour meriter place en la memoire d’une personne, dont la parole & la presence me font prejuger les qualitez, qui me sont encores incognuës. Dites-moy donc qui vous estes, & comme quoy vous avez pû si aysément cognoistre que j’estois Zenobias ? Grand Prince, luy respondit-elle, si vous daignez prendre la peine d’entrer en une petite salle que vous voyez, vous ne me demanderez plus comme il a esté possible qu’une vieille villageoise, qui ne sçait ce que c’est de la Cour, & qui n’a plus mesme la memoire d’y avoir autrefois esté, vous ayt peu prendre pour Zenobias. Ce Prince entra dans la salle, où la bonne Dame l’avoit conduit, & d’un costé veid trois tableaux : En l’un Amadonte estoit peint, en l’autre la belle Rhodogune sa femme, & au milieu Zenobias, peint couvert des premieres armes qui luy furent données par les Palmyreniens. De l’autre costé estoit Timolas, avec la magnifique Statira sa femme, & au milieu la celeste Pary- satis, si belle & si charmante, qu’il faut advoüer qu’il ne s’en falloit presque rien, que l’art n’eust fait une chose impossible, c’est à dire, ne fust venu à bout de contrefaire un ouvrage que les Dieux mesmes ne contreferoient pas, quand ils l’auroient entrepris. Zenobias, apres avoir consideré attentivement ces peintures, s’arresta si long-temps sur celle de sa maistresse, que Polemandre entra où il estoit, avant qu’il en eust detourné les yeux. Polemandre luy dit quelque chose, mais il ne fut veu ny escouté, tant l’imperieux objet de ceste merveille, s’estoit rendu maistre absolu de tous les sens de ce Prince. A la fin il fit je ne sçay quoy qui divertit Zenobias, & l’eust mis en mauvaise humeur, si en toutes ses actions il n’eust tousjours eu ceste excellente maxime de ne se fascher jamais, ou pour le moins contre ceux que le mal-heur de la naissance avoit mis au dessous de luy. Polemandre, luy dit-il en riant, tu n’es pas Amoureux. Et puis ma mere, continua-t’il se tournant vers Anitis, je ne m’estonne plus de quoy vous me cognoissez si bien. J’advouë que nous ne valons pas la peine tout ce que nous sommes, que vous ayez ceste affection pour nous, puisque non seulement elle en a esté jusques icy ignorée, mais aussi qu’elle n’en a point esté recognuë. Mais continuez, s’il vous plaist, en ceste bonne volonté, & vous souvenez que Zenobias n’est pas homme à perdre la memoire de ses amis. Je ne me plains moins de vous, de moy, que de tant de gens qui sont tous les jours à persecuter de leurs sottises, & de leurs mauvais contes, & les Roys & moy-mesme : Car il n’est pas que plusieurs ne vous cognoissent, & ne peussent nous avoir advertis de cecy, puis qu’ils nous entretiennent de tant de nouvelles qui ne le vallent pas. Mais voyez, ma mere, comme les Dieux veillent pour les gens de bien : quand ils ont veu que les hommes se taisoient, ils ont parlé tout haut pour vous, & pour me for- cer à sçavoir ce que personne ne me vouloit apprendre, m’ont tué un cheval entre les jambes, afin que je vinsse sur le lieu mesme voir ce tesmoignage de vostre affection, & y vinsse pour demander une faveur à une personne à qui j’estois desja tres-estroittement obligé, sans en estre revanché. Anitis ne respondit au Prince que par ses larmes, & se jettant à ses pieds, luy embrassoit les jambes avec un tel excez de ravissement, qu’il luy fut aysé de cognoistre que toutes ses larmes estoient larmes de joye. Ma mere, poursuivit ce Prince pour la consoler, je voy bien que vostre affection vous met en l’estat où vous estes : Mais comme c’est pour l’amour de moy que vous pleurez, aussi pour l’amour de moy cessez de pleurer. Accordez-moy ce que je vous demande, & en recompense, asseurez-vous que vous ne me sçauriez rien demander que je ne vous l’accorde. Ceste venerable Dame s’essuya les yeux, & se levant par le commandement ex- prez que fut contraint de luy en faire Zenobias, luy respondit ainsi. Je n’ay rien à demander aux Dieux, ny à vous, sinon que tous ensemble vous ayez un soin particulier de la conservation de vostre personne, si chere aux gens de bien, & si necessaire aux enfans mesme qui sont au berceau. La fortune ne m’a jamais esté bonne ny mauvaise, parce qu’elle ne m’a jamais rien osté, qu’auparavant je ne fusse disposée à le perdre : ny rien donné, que je n’aye receu comme un present d’ennemy. Mais la Vertu m’ayant trouvée avec fort peu de choses, m’a enseigné à m’en passer, & m’a faict veoir qu’en ce peu, il y en avoit encore beaucoup qui m’estoient superfluës. J’ay aymé les Dieux, comme ceux à qui je devois tout, & regardant mes Roys & leurs enfans, comme leurs vivantes images, je ne me suis jamais lassée de faire des vœux pour eux, & me consoler en gardant leurs peintures, ou lisant les miracles qu’ils ont faicts pour le salut de leurs peuples. J’aurois, sans doute, achevé mes jours en repos, comme je les avois commencez, si l’ambition d’une sœur que j’ay, n’eust troublé mon repos, & attiré, par maniere de dire, l’orage d’un bout du monde à l’autre, pour le faire tomber sur ma teste. Ce qui me console est, qu’elle & ma fille sont innocentes, & que si elles ont failly, c’est sans y avoir pensé : mais elles estoient aupres d’une Princesse, de qui les qualitez sont si divines, que d’estre vertueuses simplement, ce n’est pas assez pour vivre aupres d’elle. Zenobias adoucissant l’amertume de ceste bonne femme, ne l’a voulut pas laisser avec ceste espine en l’esprit. Il s’informa qu’elle estoit l’aventure de sa sœur & de sa fille, & luy promit qu’il feroit tout ce qu’elle croiroit capable de les retirer de la peine où elles estoient. Anitis luy dit, que sa sœur se nommoit Melibée, & sa fille Steliane. Quoy ! reprit Zenobias, Melibée & Steliane qui sont à Parysatis ? Ce sont celles-là mesmes, respondit Anitis. O Dieux ! s’escria le Prince, & par quel si soudain mal-heur ont-elles perdu les bonnes graces de leur maistresse ? Seigneur, continua ceste bonne Dame, c’est veritablement par un soudain mal-heur : mais si vous l’avez agreable, je les iray faire venir toutes deux, & par leur bouche vous sçaurez leur offence. Allez, ma mere, dit Zenobias, & les amenez, je veux faire leur paix, si leur faute peut estre remise. Anitis sortit de la salle, & revint aussi-tost avec sa sœur & sa fille. Zenobias qui sçavoit qu’elles estoient les confidentes & les plus cheres de tout ce que la Princesse avoit de femmes aupres d’elle, les receut avec un visage plein de joye pour les consoler, & apres les avoir conjurées de se mettre l’esprit en repos, leur demanda le sujet de leur disgrace. Ces deux filles se jetterent aux pieds du Prince, & leur dirent qu’apres avoir perdu une maistresse dont leur seul mal-heur les avoit renduës indignes, comme sa seulle bonté les en avoit renduës en quelque façon dignes, elles ne pouvoient se resjouïr, ny ne devoient desirer consolation quelconque. Zenobias ne les voulut point entendre comme elles estoient : mais il les fit lever, & commanda à Melibée de luy dire succinctement sa fortune. Seigneur, luy dit-elle en pleurant, comme Madame est pour sa beauté quelque chose au delà de la beauté, & pour sa vertu quelque chose au delà de la vertu, elle est si sage & si parfaite qu’elle punit les premiers mouvemens, que les Dieux mesmes n’ont jamais mis au nombre des choses qui doivent estre considerées. Et si les actions de tous ceux qui ont l’honneur de l’approcher, ne sont aussi pures que celles des enfans au berceau, elles en sont rigoureusement punies, ou entierement ignorées. Voila d’où vient la disgrace de ceste fille & de moy. Hyer, Seigneur, que par vos magnificences, & les preuves de vostre justesse & de vostre courage, vous aviez laissé dans les esprits de toute la Cour, des sujets d’admirations eternelles, Madame nous fit l’honneur apres qu’elle fut retirée, de trouver bon que nous l’entretinssions de ce qui nous avoit plû davantage. Il ne faut point Seigneur que je vous die à qui nous donnasmes la gloire du Tournoy, elle est toute entiere à vous, & sans injustice, ou sans rage, on ne pouvoit en donner la moindre partie du monde, à qui que ce pût estre. Toutefois comme on passe de discours en un autre, apres avoir tenu sur le tapis, jusqu’aux moindres actions que vous eussiez faictes, & les avoir jugé toutes merveilleuses, nous parlasmes des autres qui avoient paru, avecque vous, & & nous mismes à parler d’Arcylante. Ne parlez point de cét insuportable, nous dit la Princesse. Cét homme ne fait rien qui ne deplaise, & je croy mesme, que si par fortune, la vertu s’estoit jettée entre ses bras, elle ne seroit plus desirable. Mais, Madame, luy respondy-je, pour un homme vous ne pouvez nier qu’il n’ait des qualitez tres rares & tres loüables. Je vous le nie effectivement, me respondit Pa- rysatis, il n’a rien que les bestes ne luy puissent justement disputer. Quoy ! sa naissance est-elle plus glorieuse que celle du Phoenix ? Son courage est-il au delà de celuy d’un Lion ! est-il plus fort qu’un Elephant ? Il faut avouër Madame, qu’il faut estre beaucoup plus que nous ne sommes, pour avoir l’esprit de vous contredire : mais ne faictes pas, s’il vous plaist, tant la rigoureuse, puisque les Roys en font une estime si particuliere. Quelque excellent que soit vostre jugement, le devoir vous oblige à le soubmettre au leur. Comment Melibée, me repartit la Princesse, avec un ton de voix qui me fit soupçonner quelque alteration, vous avez donc entrepris de m’offencer ? Que je ne vous entende pas dire un mot davantage sur cet infame subjet, & souvenez-vous que mon affection n’est point aveugle ; qu’elle void extraordinairement clair, & que je sçauray bien vous la faire perdre toutes les fois que vous en oserez abuzer. Ce ne fut pas une menace que ces paroles-là, ce fut un coup de foudre, qui de toutes les fonctions de la vie, ne me laissa que celle de craindre & de pleurer. Je me jettay aux pieds de ma Princesse, & apres y avoir esté fort long-temps sans pouvoir ouvrir la bouche que pour souspirer, elle me dit : Levez-vous, & vous appaisez, je ne veux pas me souvenir du desplaisir que vous venez de me faire ; mais si vous m’aymez, recevez ce que je vay vous dire pour ma satisfaction, & pour vostre profit, C’est que devant que de me parler de quoy que ce soit, pensez à mon humeur, & jugez par là quelles sont les choses que je puis entendre, & quelles sont celles qui peuvent me desplaire. Ma paix fut ainsi faite, apres que je luy eus juré par son salut, & par celuy de toute sa maison, qui m’estoit plus cher que le mien, qu’en la liberté que j’avois prise de l’entretenir, je n’avois point meslé l’impudence de l’offencer : Que ma faute n’estoit pas irremissible, pource qu’elle estoit faite par fragilité, plustost que par malice. Mais, Seigneur, vous m’avez vengée, le monstre est mort, qui n’a pas esté cause de ce premier mal-heur seulement, mais d’un beaucoup plus grand. Voicy comme il est arrivé. Ce matin un Page d’Amadonte est venu trouver Steliane, & l’a priée de faire veoir à la Princesse une lettre qu’il avoit à luy donner : De qui est-elle, luy a demandé ma niece ? Elle est, luy a respondu le Page, d’une personne que je ne puis vous nommer : mais dites seulement à Madame, que c’est la responce qu’elle a desiré qu’on luy donnast, d’une affaire dont Amitiste l’entretint hier au matin. Beliane m’estant venuë advertir de cela : moy qui n’eusse jamais songé à l’artifice du traistre qui nous a perduës Steliane & moy, & d’ailleurs, qui sçavoy qu’Ametiste avoit parlé à l’heure que le Page disoit, à Madame, sans m’informer d’avantage, me suis enhardie d’en advertir la Princesse. Que ne peut la Fortune, Seigneur, quand elle a resolu de nous persecuter ? Elle aveugle les plus clair-voyans, elle oste l’esprit aux plus sages, dans le plus beau chemin du monde faict naistre des precipices, & si nous sommes si fermes que nous ne puissions trebucher, elle desrobe la terre de dessous nos pieds, afin qu’en depit de nostre prudence nous soyons contrains de tomber. Parysatis ayant sceu qu’on luy vouloit donner une lettre de la part d’Ametiste, sembloit se defier pour nous, & s’informa pourquoy elle n’estoit point venuë, elle-mesme luy dire la response. Pourquoy elle envoyoit un Page du Roy plustost qu’un de sa mere luy apporter sa lettre. A tout cela le page me respondit si pertinemment pource qu’il n’estoit permis à homme du monde d’entrer dans le cabinet de Madame, & qu’il falloit que j’allasse à la porte de sa chambre recevoir les responces, & luy rapporter, qu’elle les receut aussi bien que moy & commanda à ma niece de luy apporter cette fata- le lettre : Mon infortunée niepce fit ce qui luy estoit commandé. Mais bien à peine Parysatis eust-elle ouvert ce papier, qu’en recognoissant la trahison, elle s’escria : Donc toute la prudence humaine n’est pas assez forte pour eviter une malice noire comme l’est celle-cy ? ô Dieux ! faut-il que celles que je tenois aupres de moy pour me defendre, & s’armer avec moy contre l’effronterie du siecle, ayent esté les instruments dont elle s’est servie pour me troubler ?

  Comme elle eut dit cela, je vis que la douleur luy fit tomber quelques larmes des yeux : mais son grand courage ne luy permettant pas de se relascher devant nous, elle m’appella, & Steliane aussi. Tenez, dit-elle, ce maudit papier, & que je ne vous voye ny l’une ny l’autre devant moy, non plus que luy. Il ne faut pas que vous soyez gardiennes d’une chose que vous mettez vous-mesmes au pillage. Allez, & que je ne vous revoye plus. N’ouvrez pas seulement la bouche pour vous excuser, si vous ne voulez que je ne vous pardonne jamais, ny ne vous pleignez à qui que ce soit des miens. Je me contente de souffrir la peine de vostre sotise, je ne veux pas qu’elle redouble en la publiant. Sortez donc, & m’ostez ce papier de devant les yeux, aussi bien que vous. Il ne nous fut pas permis de respondre : nous luy fismes une grande reverence, & toutes couvertes de pleurs nous sortismes de son cabinet. Nos compagnes nous demanderent la cause de nostre ennuy, muettes & desolées nous leur dismes adieu, mais par signes seulement. La colere où j’estois d’estre innocente & coupable, & de le sçavoir bien, fit qu’à demy enragée, je sortis en resolution d’estrangler de mes mains le Page qui nous avoit trompées. Mais, le perfide qu’il est, s’estoit sauvé aussi-tost qu’il nous eut donné sa lettre empoisonnée. Apres avoir bien pleuré chez une de nos parentes, qui est à Palmyre, elle nous a conseillé de nous retirer chez ma sœur, & laisser faire au temps ce que ne pouvoient faire les prieres de nos amis, & les preuves de nostre innocence. Nous sommes sorties soulées de vangeance en voyant ce spectacle funeste, & apres avoir tout haut beny le bras & l’espée qui l’avoient osté du monde, nous avons appris que vous en estiez l’autheur. Cela nous a un peu consolées, esperans qu’un jour vous sçauriez nostre infortune, & qu’en vous en informant, vous apprendriez nostre innocence. Mais, Seigneur, par quel bon-heur estes-vous venu au secours de ces miserables filles ? & comme est-il possible que celuy devant qui tout le monde ne paroist presque rien, ait voulu s’abaisser jusqu’à trouver bon que nous luy contions nos affaires ? Zenobias en sousriant respondit ainsi à Melibée. J’ay plus de sujet de vous vouloir mal, que n’a pas eu Parysatis, puisque vous avez voulu servir si puissamment mon rival, dire tous les biens du monde de luy, & de faire voir ses lettres : toutefois je vous le pardonne, & ne veux pas estre si colere que ma Princesse. Je croy que vous m’aymez autant que luy : & d’ailleurs quand cela ne seroit pas, à ceste heure qu’il est mort, il faut que vostre affection cesse, puisque j’en ay faict cesser la cause. Alors Melibée se jettant aux pieds de Zenobias, luy dit : Seigneur, si ce que je vay vous dire n’est vray, que les Dieux me punissent visiblement devant que je me sois levée : lamais je n’ay regardé Arcylante que comme un monstre d’orgueil & d’ambition : nous l’avons tousjours rendu ridicule parmy tous ceux qui en parloient : Et si ce ne fut pour faire une petite guerre à Madame, que je le loüay hier comme je fis, que de ma vie je n’aye ses bonnes graces, c’est à dire, que je sois plus infortunée qu’une personne sans esperance. Je puisse mourir si j’eusse creu que vous n’eussiez point esté le plus aymable homme qui vive, plustost que de croire qu’Arcylante eust esté effronté assez, pour aspirer à la bonne volonté de Madame. Non, non, ceste pensée ne me pouvoit entrer en l’ame : Et si son orgueilleuse lettre ne me l’eust appris, je ne l’eusse point creu, quand toute la terre me l’eust juré. J’ay gardé ceste lettre, Seigneur, afin de la mettre entre vos mains, & qu’elle soit une des pieces de vostre trophée, encore que ce luy soit faire plus d’honneur qu’elle ne merite. Zenobias releva Melibée, & la prenant, & Steliane aussi, par la main, les mena aupres d’Anitis, & leur dit à toutes trois : Je ne veux pas que vous-vous attristiez davantage. Je feray vostre paix, ou je viendray vous tenir compagnie. Parysatis est trop scrupuleuse : mais elle fait tout de si bonne grace, qu’y trouver quelque chose à redire, c’est accuser les Graces mesmes d’estre mal-aprises. Loüons tous ensemble sa vertu, recevons tous ce qu’elle nous fera avec benediction, & nous asseurons que sa haine est plus souhaitable, que l’amitié de beaucoup d’autres Princesses. Ainsi Zenobias sceut ce qui avoit fasché Parysatis, & par là receut deux extraordinaires consolations. La premiere, de voir une vertu si éminente en ceste Princesse : Et la seconde, d’en estre aymé si veritablement. Melibée luy donna la lettre d’Arcylante : mais n’y voyant que l’orgueil d’un indiscret, & le venin d’un monstre qui presage sa mort, il la deschira, & la mit au feu, afin que rien qu’eust faict Arcylante, n’eust l’honneur de vivre plus que luy. Toutes ces femmes s’estans consolées sur la promesse que leur fit Zenobias, elles le supplierent de leur commander quelque chose, dont la difficulté luy pûst faire cognoistre qu’au peril de leur vie elles prendroient tousjours plaisir de le servir. Mais Zenobias les remerciant de leur bonne volonté, leur dit qu’il avoit affaire d’un cheval, pour aller à Palmyre, s’il y en avoit là quelqu’un qu’on luy prestast, & qu’il en respondoit. Anitis luy baisant la main avec un excés d’affection, luy dit qu’elle estoit si peu curieuse de chevaux depuis la mort de son mary, que tout ce qu’elle en avoit estoient indignes de luy : toutesfois que pour ce peu de chemin, elle en avoit un qui ne le laisseroit pas. Zenobias commanda à Polemandre de s’en accommoder, & comme il le veid beau, & puissant comme il estoit : Vrayement, dit-il, voila un cheval de bataille : c’est estre plus qu’Amazone de nourrir des coursiers de ce prix-là. O mal-heureux cheval, s’escria la pauvre Anitis ! c’est bien pour me renouveller mes playes, que je te garde chez moy : puis qu’il est impossible qu’en te voyant je ne me souvienne de la seule perte que je pouvois faire au monde, sans esperance de consolation. Zenobias avoit une telle impatience qu’il n’estoit auprés de sa maistresse, qu’il ne print point garde aux plaintes d’Anitis, mais il monta en mesme temps à cheval, & luy ayant promis aussi bien qu’à Melibée & Steliane, que bien-tost elles auroient de ses nouvelles, sortit de leur Chasteau, & au grand galop entra le plus couvertement qu’il pûst jusques dans le Palais. Plusieurs de ceux qui le veirent arriver, coururent pour luy rendre les tesmoignages du contentement que leur donnoit l’heureux succez de son combat : mais il les pria de ne le suivre point, & qu’il se treuveroit le lendemain au lever du Roy son pere, pour les remercier tous de leur bonne volonté. Aussi tost il monte au logement de Parisatis, & estant entré comme de coustume jusqu’à la porte de son cabinet, il heurta, & demanda la permission de veoir la Princesse. Une fille qui estoit venuë à la porte ne le recognoissant point à l’obscurité, luy dit qu’il se retirast, & qu’on ne parloit point à Parisatis. Dittes-luy, je vous prie, la belle fille, reprit Zenobias, que c’est une lettre de la part d’Arcylante que je luy apporte. Cette fille estoit si jeune & si innocente qu’elle print la raillerie du Prince pour argent contant, & alla porter ces nouvelles à Parisatis. Elle qui sçavoit tout ce qui estoit arrivé, se figura aussi-tost, que ce devoit estre Zenobias : De sorte qu’elle se leva du lieu où elle estoit assise, & pour luy donner sujet de dire quelque bon mot, alla elle-mesme luy rendre response. Monsieur, luy dit-elle en ouvrant la porte, si peu qu’elle ne pouvoit point estre veuë, Madame n’a point de communication avec ceux de l’autre monde, c’est pourquoy vous pouvez retourner vers vostre maistre, l’asseurer qu’il devroit estre en repos, où jamais, & que ses lettres ne peuvent que faire pœur à ceux ausquels il les envoye. La Princesse n’est point resoluë de se donner l’alarme à credit. Zenobias cognût à la voix que c’estoit Parisatis, c’est pourquoy il feignit de l’ignorer, & respondit à ce qu’elle luy avoit dit, que ce n’estoit pas la façon dont il falloit refuter ceux qui mesme au milieu de l’oubly ne pouvoient oublier une chose si belle, comme Parisatis : que cette preuve d’une affection sans exemple devoit estre recognuë autrement que par le mespris, & qu’ayant vaincu par son Amour la mort, il avoit sujet d’esperer de vaincre Parisatis, puis que toute cruelle & toute insensible qu’elle estoit, elle ne le pouvoit estre davantage que la mort. Mais la belle fille, continua-t’il, je vous prie tres-humblement de me laisser veoir Madame, possible qu’elle escoutera avec plaisir, en le voyant, celuy qu’elle mesprise si fort en ne le voyant pas. Vous parlez si bien, repartit la Princesse, qu’il y a quelque apparence à ce que vous dittes, c’est pourquoy je vous supplie d’attendre un peu où vous estes, je vay donner cet advis à Madame, & peut-estre vous croira-t’elle. En disant cela, elle referme la porte, & à l’instant mesme qu’elle se fust remise en sa chaire, commanda qu’on ouvrit. J’entray aussi-tost & apres luy avoir fait la reverence, fis mine de me vouloir plaindre de ce qu’on ne me cognois- soit desja plus. A n’en mentir point Zenobias, me dit-elle, Jacinthe, (c’estoit le nom d’une de ses filles) à tort, elle m’est venu dire que c’estoit je ne sçay qui de la part d’Arcylante qui m’apportoit des lettres de sa part. Dieu mercy, vous m’avez fait apprendre qu’il n’est plus en estat d’escrire, c’est pourquoy j’ay fait difficulté de permettre qu’on ouvrist mon cabinet, pource que je ne veux point d’intelligence avec les morts, ny ne suis pas assez personne d’affaires pour me charger du testament des autres. Vous rirez tant qu’il vous plaira, poursuivit Zenobias, si est-ce que vous ne pouvez nier que vous ne m’ayez refusé vostre porte. Contentez-vous, respondit-elle en l’interrompant, & croyez que vous n’estes pas peu privilegié d’entrer icy apres m’avoir fait-nommer Arcylante. Si vous estiez moins grand Seigneur que vous n’estes, où que je ne craignisse point que vous me fissiez appeller, souvenez-vous que vous tiendriez compagnie à celles, qui pour le mesme sujet ont changé de condition, & de giste. Madame, luy respondis-je, nous parlerons tantost, s’il vous plaist de cette advanture : mais à cette heure permettez moy, s’il vous plaist, que je demande de mes nouvelles, & si j’ay sujet de craindre ou d’esperer. Cette Princesse le tirant lors à part, luy tesmoigna la peine où son combat l’avoit mise, l’accusa de n’avoir pas seulement eu le soin de l’en faire advertir, & en suitte de mille petites plaintes, luy demanda comme il se portoit de la playe qu’on luy avoit dit que son ennemy luy avoit faitte. Zenobias, respondit à toutes ces choses si bien au gré de sa Princesse, & l’entretint si puissamment de la grandeur de sa passion, qu’ils passerent toute la nuict dans des joyes & des douceurs qu’autres qu’eux ne sçauroient avoir exprimées. Comme il fut question de se separer Zenobias qui n’avoit pas oublié sa promesse se jetta aux pieds de Parisatis, & la supplia tres ardemment de trouver bon qu’il demeurast toute sa vie, comme il estoit, où qu’elle luy accordast ce qu’il desiroit luy demander. Il y a de l’injustice en vostre requeste, luy respondit-elle. Si ce que vous desirez de moy est juste, pourquoy voulez-vous m’obliger à vous le promettre par serment ? & s’il n’est pas juste, pourquoy m’y voulez vous forcer ? Il luy dit que c’estoit ne cognoistre pas la bonté de son esprit, d’oser entreprendre de le combattre, aussi qu’il n’avoit pas ce dessein, mais qu’il l’a vouloit supplier de faire grace si on avoit merité le chastiement, & rendre la justice si l’on n’avoit point failly. Parisatis se doutant du sujet qui faisoit prier si instamment le Prince, luy dit qu’elle vouloit tout ce qu’il desiroit, & que sa consideration seroit cause de luy faire retrancher la moitié de ce qu une fois elle auroit absolument resolu. Zenobias ayant receu cette bonne responce, declara qui estoient celles pour qui il parloit, & apres avoir obtenu leur grace & leur retour, print congé de la Princesse & se retira en son appartement. Il n’estoit pas encore eveillé que la moitié de la Court estoit à la porte de sa chambre pour se resjouïr avec luy de son combat. Comme il en fut adverty, il commanda qu’on ouvrist, & en se levant receut les compliments de tout ce monde, remarquant par une force de jugement, dont la pluspart des Princes n’ont pas mesme l’apparence, qui estoient ceux lesquels par une veritable affection luy rendoient le devoir, ou qui le faisoient par interest, ou par imitation. Timolas mesmes vint à sa chambre, & apres l’avoir appellé son fils, luy dit que s’il estoit l’un des derniers à s’offrir à luy, & luy tesmoigner le contentement qu’il recevoit de l’honneur qu’il avoit acquis, qu’il estoit infailliblement le premier à qui la volonté en estoit venuë. Cela dit, Timolas sortit & emmena Zenobias. Ils furent ensemble visiter Amadonte qui receut son fils avec le meilleur visage qu’il pouvoit desirer, de là les Reines, où il eut le mesme traittement. Elles disnoient ensemble ce jour-là, comme elles faisoient ordinairement. Zenobias fut de la partie, & pour rendre la compagnie parfaitte Statira y fit venir Parisatis. Je vous laisse à penser, mon pere, quelles furent les douceurs & les delices de ce festin, puisque les jeunes Amants ne se nourrissans que de leurs regards & de leurs pensées, furent remplis des choses à leur goust les plus ravissantes & les plus delicates. Toute la journée & la moitié de la nuict, se passerent en cette compagnie, & Statira qui estoit extraordirement magnifique tint le bal le soir, mais secrettement, où personne n’entra que ceux & celles qui devoient dancer. Les Roys s’y trouverent seuls avec les Reynes & les Ambassadeurs de Perse. Là Zenobias sans songer à son bras, dança, & dança avec Parisatis de si bonne grace, qu’apres que les spectateurs les eurent long-temps considerez depuis les pieds jusqu’à la teste. Ils furent contraints d’advouër, que si l’une passoit toutes les filles du monde en bonne mine, & en bonne grace, que l’autre ne cedoit à qui que ce fust qui eust acquis la reputation d’estre incomparable en toutes choses. Mais cette loüange estoit si indifferente â Zenobias, qu’il eust rougy de honte de la recevoir s’il n’eust sceu qu’on ne peut ignorer quelque chose pour inutile qu’elle soit, sans avoir quelque espece de deffaut, & qu’un honneste homme, doit sçavoir parfaittement tout où il y a de l’honneur à gaigner. Depuis ce temps-là Parisatis & Zenobias porterent leur affection si haut, que toute la Court n’avoit point d’autres pensées, ny presque d’autres discours : Chacun admiroit de quelle façon ils vivoient l’un avec l’autre, & ceux qui jusque-là, s’estoient figurez que l’Amour estoit quelque chose contraire aux occupations d’un grand courage, & aux conseils de la raison, cognoissant en ces deux Amants la faulseté de cette creance, se mirent à faire l’Amour, ou n’en surent receus que par la honte d’aymer à l’exemple d’autruy. Cependant les Ambassadeurs de Perse, lassez des remises qu’on leur donnoit, & du temps qu’ils perdoient, demanderent audience. Là ils parlerent en la presence des deux Roys assez haut : dirent que leur maistre n’estoit pas pour souffrir qu’on le mesprisast, qu’il estoit fort bon amy : mais que quand on abusoit de sa douceur, il sçavoit mettre dedans les Enfers ceux qu’il n’avoit retiré que la bouë. Amadonte print la parole pour leur respondre, & ne voulant disputer que l’espée à la main, ne repliqua rien à leur picoterie, mais leur dit que comme l’honneur qu’ils avoient d’estre alliez au Roy leur maistre, & de l’avoir servy à ses plus importantes affaires leur fermoit la bouche, de mesme qu’il leur defendoit de soupçonner rien de mauvais de sa part. Timolas poursuivit ce discours & en ayant fait un fort long des necessitez de son Estat, de l’interest qu’il avoit en la conservation des anciennes maximes de Palmirene, du peu de temps qu’il y avoit que la liber- té y estoit r’establie. Et en un mot qu’il ne pouvoit forcer son peuple à recevoir un Prince estranger pour maistre apres luy, declara ouvertement qu’il ne luy estoit pas possible de recevoir l’honneur que le Roy leur maistre luy faisoit de vouloir marier sa fille avec Tiribazus. Ces Ambassadeurs voulurent repliquer, mais Amadonte leur ferma la bouche & les supplia de se retirer s’ils n’avoient d’autres nouvelles à leur faire entendre, & que le Roy son frere avoit une si particuliere cognoissance de ses affaires, & s’en sçavoit si dignement demesler, qu’il n’y avoit Prince en Asie qui deust prendre le soin de regler sa maison. Ces paroles furent suivies de compliments de part, & d’autre, pleins toutesfois de dissimulations, & de froideurs, & les Roys & les Ambassadeurs se separerent avec aussi peu de satisfaction les uns que les autres. Toutesfois Amadonte & Timolas leur envoyerent de tres-grands, & tres-rares presents : mais par un orgueil de Perse, ils les re- fuserent & dirent qu’ils ne prenoient rien que du Roy leur maistre. Comme Amadonte sceut cela, il ne dit que ce mot. Nous devons estre contents, les Ambassadeurs ont fait ce qu’ils ont pensé glorieux pour leur maistre, & nous avons voulu faire ce qui estoit digne de nous. Ils ont bien-fait ou non, c’est à la voix publique d’en juger, mais quoy qu’il en soit ils nous ont laissé toute la gloire de l’action. Le jour mesme que les Perses sortirent de Palmire, comme s’ils eussent menacé tout l’estat de sang & de feu, & que les Dieux eussent voulu nous en advertir par d’extraordinaires presages, le feu print au Palais la nuit, & sans en sçavoir la cause devint si grand, que la moitié fut bruslée sans que l’on y peust mettre ordre. Mais ce qui est plus remarquable, c’est qu’il commença au quartier de Zenobias, & continuant par celuy de Parisatis fut jusqu’à celuy des Roys, qui toutesfois par l’extreme diligence de toute sorte d’ouvriers, demeura miraculeusement inviolable. Zenobias estoit lors avec la Princesse, & comme leur Amour leur ostoit toute autre pensée, ils furent fort long-temps sans ouyr le bruit qu’on faisoit, ny sçavoir que le feu les gaignoit. Cependant l’embrasement estoit si fort accrû, que les sales de la Princesse estoient desja en feu. Il fut question d’en advertir ces deux Amants. Les femmes & les filles se mirent à crier de telle sorte qu’elles les retirerent de leur ravissement.

  Zenobias croyant que ce fust quelqu’autre chose, se leva tout hors de soy, tant la presence de ce qu’il aimoit luy avoit imperieusement occupé les sens. Il se remit toutesfois au bruit, & apres estre allé jusqu’où le feu avoit gagné, revint à Parisatis, & en riant. Ma belle Princesse, luy dit-il, je m’estois tousjours bien douté de ce qui est arrivé, c’est que le feu que j’ay au sein augmentant de minute en minute, m’a fait prevoir qu’en fin il seroit contraint de s’estendre au delà. Le Palais brusle, & je m’estonne fort, comme desja je n’ay mis le feu par toute l’Asie. La Princesse sourit à ce discours, mais luy dit-elle, prenez garde que ce feu ne soit plus chaud que le vostre, & qu’estant moins respectueux que luy, il ne vienne attaquer son propre autheur.

  Elle en eust dit d’avantage, mais elle ouït au mesme temps un fort grand bruit. Elle fut regarder ce que c’estoit, & sceut qu’un grand pan des murailles de son logis venoit de tomber. Cela l’effraya & luy fit penser qu’il n’estoit plus temps de rire, c’est pourquoy elle pria Zenobias de la conduire en lieu où elle fust plus en repos. Zenobias ne perdit point de temps, il fut veoir par où sortiroit Parisatis, & trouvant les degrez tous rompus ou tout en feu, il commença lors de craindre pour sa maistresse, & venant à tout propos pour l’asseurer, perdit presque l’occasion de la secourir. Il fut au bout d’une petite gallerie pour veoir si un degré desrobé qui estoit sur le jardin estoit en seureté. Il y fut, mais en revenant la gallerie fondit sous luy, pource que n’estant soustenuë que de pilliers de bois, le feu s’y estoit insensiblement coulé, sans qu’on y eust pris garde. Il ne fut point enveloppé sous les ruïnes, car il l’avoit ouy trembler & s’estoit attaché à des ouvrages de menuserie qui tenoient au gros mur. Il se desesperoit là, & fut contraint de se jetter au travers du feu & des pierres, pour avoir du secours. Il fit venir des eschelles & sans crainte du feu qui estoit au pied monta dans le cabinet de Parisatis. Il la trouva esvanouïe, & sceut que son mal venoit de la pœur qu’elle avoit euë pour luy, ne sçachant pas s’il avoit esté accablé sous la gallerie qui estoit tombée. Il faut que je vous die une chose incroyable, mais tres-vraye, toutesfois. C’est que l’affection que Zenobias avoit pour la Princesse, & celle que tout le monde avoit pour l’un & pour l’autre surmonta la violence du feu. Le Prince fit prendre Parisatis dans une couverture & la portant luy mesme avec cinq autres qui s’estoient bruslez pour venir à luy, elle fut descenduë avec des cordes & des eschelles, un nombre infiny d’hommes & de femmes jettant de l’eau, & se precipitant au travers des flammes pour prendre part à la bonne fortune de ces deux Amants. La peine qu’on print à les aider fut telle que Parisatis se trouva dans le grand jardin, sans avoir eu autre mal que celuy de son esvanouïssement. Il est vray que Zenobias n’en fut pas quitte à si bon marché, car il eut une main & les pieds presque bruslez, & il ne luy demeura que fort peu de cheveux. On fit revenir la Princesse avec l’eau de la fontaine au pied de laquelle elle estoit. La premiere parole qu’elle dit fut Zenobias, & la premiere demande qu’elle fit fut où il estoit, & s’il n’estoit point mort. Me voicy, Madame, luy dit-il, qui n’ay pas manqué d’estre puny pour avoir eu l’indiscretion de vous quitter. O bons Dieux, s’escria la Princesse en l’interrompant, où estes-vous Zenobias, & que vous est-il arrivé ? Approchez-vous de moy, & me faites veoir si veritablement c’est vous que j’entends. N’en doutez point, s’il vous plaist, ma belle Princesse, luy respondit-il, voicy vostre Chevalier qui n’a autre douleur que par le ressentiment de celle que vous avez. Elle se leva à ce mot, & me bailla sabelle main à baiser, tesmoigna combien grand avoit esté son ennuy par la grandeur de la joye qu’elle receut. Zenobias la supplia d’aller trouver les Reynes qui estoient au Palais du Parc. C’est une maison de plaisir qui est bastie dans un estang au milieu d’un parc le plus beau de tout le levant, & qui n’est qu’à une portée d’arc du Palais de la ville. La Princesse le trouva bon, & suivie de ses femmes & de ses belles filles qu’on avoit secouruës, fort à propos, y fut conduitte par Zenobias. Il faut advoüer que ce spectacle avoit je ne sçay quoy de beau parmy son horreur. Car ce feu qui outre sa propre clarté, en avoit encore une nouvelle que luy donnoit l’obscurité de la nuit sembloit avoir esté allumé plustost pour une resjouïssance que par accident. Le bourdonnement de tous ceux qui travailloient adjoustoit un second tumulte à celuy que faisoient les pierres & les pieces de bois, qui apres avoir long-temps resisté au feu estoient contraintes de tomber, & comme si elles eussent voulu se vanger en tombant entrainoient le vainqueur avec elles & bien souvent l’estouffoient sous leurs ruïnes. Mais ce qui estoit le plus beau de tout le spectacle, c’est que l’Amour s’y faisoit veoir clairement à la lueur du feu. L’on voyoit plusieurs Chevaliers qui conduisoient leurs maistresses en seureté, & parmy les troubles où elles estoient, songeoient moins à esteindre le feu du Palais que le leur. Pardonnez-moy, mon pere, si ce mot m’est eschappé, puisque les Dieux ne nous pardonnent jamais que nous ne leur disions nos plus importantes actions, ils veulent bien souffrir nos mauvaises pensées. Tant y a, mon pere, que toute la nuict se passa en ces alarmes, & le feu dura jusqu’au lende- main midy. Les Roys, les Reynes, la Princesse & le Prince, apres avoir esté deux ou trois jours à mettre ordre à leurs affaires, chacun selon sa charge : c’est-à-dire les Roys aux publiques, les Reynes à leurs domestiques, & les Amants à l’entretien de leurs Amours, tous ensemble ils quitterent la ville, & furent à quinze lieuës de là dans un des plus beaux Chasteaux du monde, basty au milieu des sablons & des deserts de Palmirene, mais en lieu si plein de fontaines & de bois qu’il en est infiniment delicieux. Il s’appelle Callyroé. Je n’aurois jamais fait si j’entreprenois de vous repeter toutes les paroles, & vous faire entendre les demonstrations d’Amour que par les tournois, les joustes, les bals & les autres galenteries Zenobias renouvella à Parisatis. Il se passa plus d’un mois, durant lequel tous les bons esprits de la Court, & tous les Musiciens ne cesserent par leurs ouvrages, de seconder la passion du Prince, & ravir tout le monde des merveilles qu’ils se sentoient obligez de faire & par l’estime incroyable que Zenobias en faisoit, & par les recompenses dont il prevenoit tousjours leurs services, & leurs affections. Ce fut en ce temps-là que Melibée & Steliane vinrent trouver la Princesse, & reprendre auprés d’elle la place qu’elles y avoient tenuë. Anitis fut sollicitée de leur venir faire compagnie par les prieres du Prince : mais s’en estant tres-judicieusement excusée, luy envoya les contracts d’une terre de quinze mille livres de rente, qui pour estre tout contre la sienne il avoit acheptée à fin de luy en faire present. Cette bonne Dame demeura non seulement ravie, mais faschée d’estre contrainte de recevoir un si grand bien. Elle fit supplier le Prince de ne l’accabler point soubs la pesanteur d’une si grande fortune. Mais elle n’en eust autre responce, sinon que les tableaux qu’elle avoit, meritoient bien d’estre logez aussi honnorablement qu’ils seroient dans le Chasteau qu’il luy donnoit. Toutes ces choses n’ostoient point de l’esprit de Zenobias, le dessein qu’il avoit d’aller en Perse & tirer raison de Tyribazus. Il demande congé à Parisatis d’aller jusque sur la fontiere pour une affaire qui importoit au Roy. Cette Princesse apres avoir long-temps fait combattre son Amour contre sa generosité, ceda aux raisons de la gloire, & permit à son Chevalier de faire ce voyage, mais à condition qu’il auroit de soy, le mesme soin que si elle estoit inseparablement attachée avec luy. Cet adieu ne laissa pas d’estre accompagné de toutes les larmes & de toutes les douleurs qui sont imaginables, & l’eust esté encore beaucoup plus si Parisatis l’eust receu, comme luy disoit Zenobias. Ce Prince sans prendre congé des Roys, ny des Reynes, fit porter ses armes a une journée de Calliroé, & n’ayant avec luy que son fidelle Escuyer se mit en chemin. Ils se desguiserent le mieux qu’ils purent, s’armerent de toutes pieces à la frontiere, & de là aux plus grandes journées qu’il leur fust possible de faire, arriverent en Perse. Je ne vous diray point les fortunes qu’ils coururent, les advantures qu’ils acheverent, & combien de Chevaliers & d’ennemis ils eurent à combattre. Ce recit seroit trop long & trop advantageux pour Zenobias : mais ce qui suivit tous ces evenemens ne sçauroit estre teu sans vous cacher une des plus belles parties de cette histoire. Zenobias n’estoit qu’à deux lieuës de Persepolis, où Araxes s’estoit retiré pour mener une vie aussi desbordée que celle de son pere avoit esté glorieuse, lors qu’au point du jour il se trouva dans un bois qui sembloit plustost celuy d’un parc qu’autrement. Il ne faisoit que d’y entrer quand un bruit d’armes, d’hommes & de chevaux le retira des pensées dont il avoit accoustumé de se divertir par les chemins. Il baisse la visiere de son habillement de teste, & s’avance pour veoir à qui l’on en vouloit, il veid quatre hommes à pied, l’espée à la main, qui en attaquoient un à cheval. Ce Chevalier se defendoit genereusement, & par le mauvais estat où il en avoit mis deux qui estoient couchez par terre, & un troisiesme que Zenobias veid tomber à demy-mort, monstroit une force incroyable jointe à une extreme valeur. Le Prince fut touché de l’inegalité de cette partie, & par une assistance qu’il ne pouvoit refuser à celuy qu’on vouloit assassiner, se jette l’espée à la main sur un des trois qui restoient apres leur avoir crié qu’ils se defendissent & du premier coup le renverse sur l’herbe avec ses compagnons. Courage, Chevalier, dit-il à celuy qu’il assistoit, il ne sera pas dit qu’un homme vaillant, comme vous demeure la proye des traistres ny des voleurs. L’autre tourne la teste, & se voyant secourir à son besoin, ne sceut luy respondre autre chose, sinon qu’il luy estoit obligé de la vie. Ils redoublent leurs coups à l’envy & en moins de rien se defirent des trois qui restoient de ces six assassins. Le Chevalier estoit blessé aux bras & aux cuisses, & perdoit tant de sang que mal-aisément, s’il n’eust esté secouru à propos, comme il fut, pouvoit il finir le combat que par la perte de sa vie. Aussi-tost qu’ils se furent approchez, & que par reciproques compliments ils eurent entame leurs discours, le Chevalier dit à Zenobias, qu’il le supplioit tres-humblement de luy pardonner si pour luy rendre ce qu’il luy devoit, il ne descendoit point de cheval, pource que ses playes ne luy donnoient pas cette liberté. Mais si cette incivilité forcée, continua-t’il, ne vous fait point avoir mauvaise opinion de moy, faittes-moy l’honneur de me dire qui vous estes, & quel bon demon vous a conduit en ce lieu. Zenobias ne voulant en façon du monde se declarer, s’excusa le mieux qu’il luy fut possible, & dit tant de raisons pour monstrer celle qu’il avoit de ne dire point son nom, que l’autre fut obligé honnestement de ne l’en pas importuner davantage. Je ne vous diray pas mon non, luy repliqua l’autre, puisque vous ne voulez pas que je sçache le vostre, mais à fin que je vous serve à la Court si vous y avez affaire, & que vous puissiez sçavoir qui je suis, recevez s’il vous plaist cette boëtte. Il n’y a per- sonne en ce pays qui ne recognoisse le visage qui est dedans. Zenobias crût que cela ne se devoit point refuser encore que la boëtte fust fort couverte de perles & de diamans, puisqu’il se promettoit de ne la garder que jusqu’à ce qu’il eust sceu qui luy avoit donnée. En mesme temps le blessé prit congé de luy, pource qu’il avoit à ce qu’il luy dit, une retraitte fort prés de là, & en partant il luy jura que le plustost qu’il luy seroit possible il se rendroit à la Court. Bien à peine se furent-ils separez que Zenobias se trouva hors du bois, & à la veuë de cette grande & fameuse ville qui a tousjours esté la capitale de l’Empire. Il n’avoit pas envie d’entrer de jour, cela fut cause qu’il se retira dans un assez gros village qui estoit sur le chemin, descendit à une Hostelerie, & se resolut d’y passer le reste du jour. Il fit venir le maistre apres qu’il se fut desarmé, & luy demanda des nouvelles de la Court. Cette homme luy en dit tant qu’il le jugea assez intelligent pour l’esclaircir de la doute où il estoit. Il tire donc la boëtte qu’il avoit, & l’ayant ouverte fit veoir à son hoste la peinture qui y estoit cachée. Aussi-tost que cet homme l’eust un peu considerée. Cette boëtte est fort riche, luy respondit-il, mais encore ne convient-elle pas à la grandeur de la fortune de celuy dont elle garde la peinture. C’est Tyribazus le favory du Roy, où pour parler plus veritablement le second Roy de Perse. Ces paroles surprinrent de telle sorte Zenobias qu’il en rougit, & pour couvrir le changement de son visage, mon hoste, dit-il vous m’estonnez, les favoris de Perse sont bien plus hazardeux que ceux des autres contrées. J’ay trouvé ce matin celuy qui m’a donné cette boëtte dans ce bois que vous voyez devant vous, blessé en divers endroits, & attaqué par six voleurs qui l’eussent à la fin mal-traitté encore qu’il en eust desja tuez trois, si de hazard en passant nostre chemin, mon compagnon & moy ne l’eussions secouru. Il nous a donné cette beëtte, & nous a dit qu’en monstrant la peinture que vous voyez, le premier venu nous apprendroit qui nous avions assisté. Cet Hostelier se servant du privilege de la populace, qui met son nez dans les plus grandes affaires, parle de tout sans prudence, & juge de tout sans cognoissance de cause, commença à l’entretenir de cette sorte. Il ne faut point douter que ce ne soit Tyribazus que vous avez rencontré, car il est vaillant, hardy, & homme qui faisant l’Amour en mille endroits, va ordinairement seul, & si je ne me trompe j’ay deviné d’où il venoit, & pourquoy, il a esté ainsi attaqué quand vous l’avez secouru. Le bois par lequel vous avez passé, est la garenne d’un Chasteau, qui n’en est pas fort esloigné. Il y a dedans une Damoiselle la plus belle qu’on puisse veoir, & ce n’est pas d’aujourd’huy qu’on tient que Tyribazus la veoid. Cette Amour ne s’est pû faire sans le consentement de trois freres qu’elle a, leur lascheté qui se couvre maintenant du nom de cette faulse prudence, par le moyen de laquelle on fait fortune, les a fait resoudre moyennant de grandes promesses d’estre les instrumens de leur propre infamie. Tyribazus à ce que dit le bruit commun, les a long-temps tenus le bec en l’eau, & soit que leur procedé les rende odieux à ce grand courage, soit qu’il ne vueille les payer que quand il ne se voudra plus servir d’eux à fin qu’ils soient tousjours par l’esperance seule necessairement obligez à le servir, tant y a qu’il ne leur a fait encor aucun bien. Ils se sont faschez de ces delais, & ont esté jusqu’à la Court menacer Tyribazus. Luy qui croit qu’un homme qui vend son honneur & celuy de toute sa race pour de l’argent ne peut-estre qu’un lasche & qu’un coquin, s’est tousjours mocqué d’eux. De sorte que pour revenir à vostre advanture, il faut que les freres l’ayant sceu cette nuit avec leur sœur, se soient resolus de le tuer lors qu’il reviendroit à la ville. Quelques-uns de leurs amis se sont offerts sans doute, ou plustost ont esté obligez par la coustume de les servir. Ils l’ont attaqué, mais à ce que vous dittes, ils ont trouvé forme à leur pied, car il y ont laissé le moule du pourpoint, & par une mort tragique conclu une vie pleine d’infamie. Ne croyez pas pour cela que j’en estime davantage Tyribazus. Quand il seroit encore cent fois aussi vaillant & aussi liberal qu’il est il ne laisseroit pas d’estre maudit de toute la Perse. Vrayment il est si facile d’estre liberal comme il est, que c’est plustost un vice qu’une vertu. Est-il pas cause des impositions, & des subsides, dont le peuple est deschiré jusqu’aux entrailles. N’est-ce pas pour satisfaire à ces prodigalitez, qu’on nous tire jusqu’à la derniere goutte de sang ? Et puis quand cela ne seroit point, il n’est que trop criminel puisqu’il perd l’esprit du Roy, & que le faisant ensevelir dans une vie pleine de honte, d’horreur & de volupté, pour avoir plus de liberté à gouverner & mettre tout s’en dessus dessous, il est cause que nous perdons l’amitié de nos voisins, & que tous les jours les Romains pied à pied, reprennent ce que durant le reigne de ses predecesseurs, les grands Ptolomées, & l’invincible Amadonte, avoient adjousté à cette Monarchie. Mais sans parler de loin, tout fraischement n’a-t’il pas envoyé des Ambassadeurs aux Roys des Palmireniens pour demander en mariage la Princesse Parisatis, & aujourd’huy qu’il veoid les Ambassadeurs de son maistre, où pour mieux dire de son compagnon, revenus sans avoir pû rien obtenir, menace-t’il pas le Ciel & la terre ? A-t’il pas eu l’insolence de dire tout haut qu’il en feroit repentir Amadonte & Timolas ? Et pour comble de folie se prepare-t’il pas à une guerre qui mal-gré toute son ambition, sera cause si les Dieux nous aiment que la Perse ne gemira plus sous la pesenteur de sa tyrannie ? Je vous laisse à penser si ces dernieres paroles adjousterent de l’impatience au desir qu’avoit Zenobias de se vanger de Tyribazus, toutesfois cognoissant l’humeur du peuple qui parle de tout à tort & à travers, & comme il est plein d’ignorance ne sçait ce qui luy est bon ou mauvais, il ne crût pas tout ce que luy disoit son hoste, mais recevant sa haine comme une partie de la publique, il se figura qu’il ne manqueroit pas de retraitte en cas qu’il en eust besoin contre Tyribazus. l’Hoste l’ayant quitté, il demeura seul avec le fidelle Polemandre, qui sçachant tous les interests & toutes les intentions de son maistre, entama le discours de l’assistance qu’il avoit donnée à son plus grand ennemy. Zenobias admira l’ordre que les Dieux semblent si bien garder en toutes choses, & declarant la façon dont il se vouloit faire cognoistre à ce favory pour l’obliger à luy faire raison, il se resolut de laisser tout ce qu’ils avoient d’armes, excepté leurs espées à leur Hoste, & s’en aller à Persepolis chercher l’occasion de parler à Tyribazus. Cette resolution prise, il fit appeller son Hoste, & gaignant son naturel quand il eust esté le plus mercenaire & le plus perfide du monde, par l’argent qu’il luy donna, ne luy fit autre priere que de garder les armes de son compagnon & de luy, & leur enseigner une hostellerie dans la ville, où ils peussent estre fidelement. Cet homme leur dit qu’il ne commenceroit point par eux à perdre la bonne opinion que chacun avoit de luy, qu’il s’y pouvoit absolument fier, & qu’avec un mot de lettre qu’il leur donneroit, ils trouveroient le meilleur hoste de la ville, qui estoit son fils. Cela resjoüit Zenobias. Aussi dés que le Soleil fut couché, ils monterent à cheval, & au petit pas acheverent leur voyage. Les habillemens que luy & Polemandre avoient à la Persienne, empescherent qu’ils ne fussent regardez parmy les ruës de ceste grande ville. Ils allerent donc descendre au logis que leur hoste leur avoit enseigné, & n’eurent pas plustost donné la lettre qu’ils avoient apportée, que leur nouvel hoste leur fit des complimens à sa mode, si grands & si reïterez, qu’ils eurent sujet d’en estre plus que satisfaits. Ils mirent pied à terre, & passerent la moitié de la nuict à faire achever par le fils les discours que le pere avoit commencez, & l’autre à se reposer. Zenobias se leva si matin, que tres-à-peine estoit-il jour : L’absence de sa maistresse, les inquietudes de son Amour, & le grand dessein dont il ne se laissoit divertir pour chose du monde, ne luy permettoient ny de dormir, ny d’estre en repos. Apres avoir resvé seul une heure ou deux dans le jardin de son hostelerie, il commanda à son Escuyer, qui cognoissoit l’humeur, & sçavoit la langue du peuple parmy lequel ils estoient, d’aller jusqu’au Palais, & s’informer sous main de la santé de Tyribazus. Polemandre obeït si exactement à ce qui luy estoit commandé, que deux heures apres qu’il fut party, il revint trouver Zenobias, & luy rendit compte de tout son voyage. Par là il sceut que le Roy estoit tombé malade du ressentiment qu’il avoit eu des playes de Tyribazus, qu’il s’estoit faict porter dans sa chambre, où il couchoit avec luy, & qu’on n’esperoit pas que d’un mois ce favory fust en estat de quit- rer le lict. Ces nouvelles furent si fascheuses à Zenobias, qu’il en estoit au desespoir, toutefois faisant de necessité vertu, il prit patience, & quinze jours durant n’eut autre divertissement que d’aller veoir son premier hoste, & luy faire dire ce qu’il sçavoit, & ne sçavoit pas. Ce temps expiré, Tyribazus commença de sortir de la chambre, & peu à peu reprenant les forces qu’il avoit perduës, fut tout à fait guery douze ou quinze jours apres. Zenobias ayant eu assez de pouvoir sur sa passion pour attendre que ce favory fust bien remis pour l’aller veoir, partit un matin avec son Escuyer, & se trouva au lever de son ennemy. Comme il fut à la porte de la chambre, il pria un Huissier de dire à son maistre que le Gentil homme auquel il avoit donné une boëtte de pourtraict couverte de perles & de diamans, le supplioit qu’il luy donnast la permission de luy faire la reverence. Tyribazus commanda en mesme temps qu’on le fist entrer, & forçant son naturel imperieux à recevoir Zenobias, comme il y estoit obligé, luy dit des paroles si obligeantes, & luy rendit des preuves d’amitié si particulieres, que tous les flatteurs, & ces infames que la honteuse passion d’estre quelque chose à quelque prix que ce soit, reduit à des bassesses, & des laschetez monstrueuses, desja le regardoient avec envie. Tyribazus admirant la bonne mine, & la jeunesse de Zenobias, ne sçavoit qu’en penser, & jugeant de ce qu’il estoit capable de faire, par ce qu’il en avoit veu, ne s’imaginoit pas qu’il y eust homme au monde vaillant comme Zenobias. Il le tira seul en la ruelle de son lict, & s’informa particulierement de son pays, de sa qualité, & de son nom. Tyribazus, luy respondit Zenobias, faites-moy l’honneur de ne me presser point là-dessus, je suis d’assez bonne maison pour n’estre point mesprisé : mais je ne suis pas d’assez grande pour estre cogneu de vous. Je suis Syrien, je m’appelle Atenagoras, & ne vous puis, pour ceste heure, dire plus particulierement le sujet de mon voyage, sinon que c’est pour tirer raison publiquement, d’un desplaisir qu’a commencé de me faire un Seigneur de ceste Cour. Vrayment, luy dit Tyribazus, voila une generosité qui n’a point d’exemple : mais je ne sçay comme quoy vous pouvez faire ce que vous pensez, sans que vous courriez fortune de la vie. Le Roy ayme les siens infiniment, & d’ailleurs la loy fondamentale de cet Estat, veut qu’on punisse toute personne, estranger ou autre, qui veut par les armes se rendre justice à soy-mesme. Ces difficultez, Tyribazus, luy respondit Zenobias, sont grandes, à la verité : mais si vous croyez que le petit service que je vous ay rendu, merite que vous descendiez du lieu où vous estes, pour m’obliger, je ne vous en demande autre recompense que celle de me faciliter mon affaire, & me donner le moyen que je me puisse veoir aux mains avec mon ennemy. Tyribazus regardant Zenobias plus fixement qu’il n’avoit point encore fait, ne sçavoit que penser de la grandeur de son courage, & voyant qu’honnestement il ne le pouvoit refuser, luy promit non seulement son appuy, mais qu’il feroit pour son contentement suspendre les loix, & les Edits du Roy. Promettez-moy cela solemnellement, s’il vous plaist, repliqua Zenobias, & me jurez, que quand je vous auray dit le nom de mon ennemy, vous ne laisserez pas de me tenir la parole que vous m’avez donnée. Je vous promets tout cela, luy respondit Tyribazus, & vous jure par le Soleil que nous adorons, & par le salut du Prince, qui m’est plus cher que le mien, que quand ce seroit contre mon propre frere, je vous assisteray, & ne croiray point estre desgagé, que je ne vous aye mis ensemble pour vous batre. Zenobias plus content qu’il n’osoit l’esperer, fit des compliments & remercia si bien Tyribazus, que ce favory, tout orgueilleux qu’il estoit, fut contraint d’advouër qu’un homme courtois & civil, ne pouvoit estre hay de personne. Deux ou trois jours se passerent, durant lesquels Tyribazus presenta Zenobias au Roy, & travailla si bien à son affaire, que le Roy luy permit le combat, & voulut qu’il se fist dans la place des joustes & des passe-temps ordinaires. Ceste grande place est en ovalle, environnée de grands bastimens de marbre & de jaspe, des fenestres desquels toute la Cour void les tournois & les jeux qui fort souvent se font en Perse. Le Roy ordonna que tout fut prest dans huict jours, & ne voulant point contraindre Zenobias à declarer son ennemy qu’il ne fut temps, commanda à Tyribazus de tenir la main à ceste action, & choisir des Juges pour rendre la justice à qui elle seroit deuë. Tyribazus hasta tellement toutes choses, que dans le temps ordonné par le Roy, la place fut en estat, les Juges preparez, & les gardes advertis de ce qu’ils avoient à faire. La veille du combat estant arrivée, Tyribazus tira Zenobias à part, & luy dit, qu’il ne falloit plus differer à luy dire le nom de son ennemy, & que s’il n’avoit luy-mesme envie de reculer, il le luy feroit veoir le lendemain, en estat de le contenter. Si j’avois moins bonne opinion de mon ennemy que je n’ay, luy dit Zenobias, je vous diroy son nom, afin qu’estant adverty de ce qui se prepare pour luy, il ne pût demain que je l’envoyeray appeller, inventer quelque excuse pour me refuser. Mais Tyribazus, mon ennemy est genereux, mon ennemy est tout prest, & en un mot, mon ennemy, encore que vous n’en ayez point ouy parler, n’a pas moins travaillé pour avancer nostre commun repos, que moy mesme. Demain je ne laisseray pas de vous le nommer, & cependant, je vous supplie de me prester des armes & un bon cheval : car ce que j’en ay avec moy, ne valent rien pour une si grande action Tyribazus se contenta de ceste honneste responce, & mena Zenobias dans le cabinet de ses armes, où il choisit parmy un nombre infiny des plus excellentes du monde, celles qu’il trouva les plus propres pour luy. Polemandre cependant avoit eu charge de son maistre d’aller à leur premiere hostelerie, & essayer de disposer l’hoste à leur servir en cas de necessité. Dés le soir mesme, il y fit conduire deux chevaux, qu’il avoit secrettement achettez & les leurs aussi : Et, selon le commandement qui luy avoit esté faict, revint toute nuict trouver son maistre. Tyribazus, à la priere de Zenobias, fut en mesme temps chez le Roy, & luy demanda à quelle heure il auroit agreable que ceux qui se devoient batre entrassent dans le camp. Sçavez-vous, luy dit le Roy, le nom de celuy qui se doit batre contre le Syrien ? Ouy, Seigneur, luy respondit Tyribazus, qui ne vouloit pas que cela peust acrocher l’affaire de son amy, je le sçay ; mais je suis de serment de ne le point dire qu’apres le combat. Je supplie donc tres-humblement V. M. non seulement de ne me point presser pour le sçavoir : car il importe infiniment que vous l’ignoriez, mais aussi que demain vous fassiez publier que les combattans vous sont incognus, & les croyans estrangers, vous n’avez point contrevenu aux loix de Perse de leur permettre le combat, puisque les loix ne vous defendent qu’en la personne de vos naturels subjets. Ces raisons contenterent le Roy. Il promit qu’a neuf heures du matin il feroit au camp avec ses gardes, & qu’au mesme temps le cry se feroit, & le combat apres. Dés le soir toutes les fenestres, les terracsses, & les echafaux furent pleins d’hommes & de femmes, tant de la Cour que de la ville, qui de peur de n’avoir point de place, y passerent toute la nuict. Les gardes y arriverent devant le jour, & cependant la foule estoit si grande, que tout ce qu’ils purent faire, fut d’aller jusqu’aux barrieres du camp, & empescher que la place reservée pour les combatans, ne fust occupée par le peuple. Aussi-tost qu’il fut jour, Zenobias se leva, & se mettant en la garde des Dieux, alla trouver Tyribazus. Il estoit desja levé, & l’explication qu’il cherchoit d’un songe, qui l’avoit toute la nuict mis en peine, le rendoit si chagrin & si pensif, que Zenobias luy avoit donné le bon-jour avant qu’il eust recueilly ses esprits. Atenagoras, luy dit-il, excusez-moy, s’il vous plaist, je ne vous puis dire sans rougir de honte, que j’ay tellement esté troublé d’un songe qui m’a embarrassé l’esprit en dormant, que je ne puis en sortir : toutefois j’y trouve tant de vray-semblance, que je le reçoy comme un presage de ce qui me doit arriver aujourd’huy plustost que comme un effect des vapeurs que m’ont envoyées au cerveau les choses que je mangeay hier. Seigneur, luy dit Atenagoras, si vous avez agreable de descendre à vostre jardin, & m’en dire quelque chose, possible que parmy ce que j’ay à vous faire sçavoir, y rencontrer quelque esclaircissement. Je le veux bien, luy respondit Tyribazus : Et en disant cela il prit son espée, & ne voulant estre suivy de personne, alla avec Atenagoras, sous une longue allée. Comme ils y furent entrez, Tyribazus luy dit ainsi ce qu’il avoit songé. Bien à peine estois-je endormy, qu’il m’a semblé qu’une main sortant d’une nuë, m’avoit arraché d’entre des espines, des feux, & des serpens, qui me deschiroient le corps. Aussi-tost que je me suis trouvé en estat de pouvoir cognoistre d’où ce secours m’estoit arrivé, ceste main a disparu : & apres l’avoir long-temps cherchée, comme j’estois desesperé de ne la pouvoir rencontrer, tout à coup elle est sortie d’un autre nuage, & d’une espée qu’elle tenoit m’en a donné dans le corps. Je voulois me plaindre de ceste trahison, quand une voix m’a dit cecy : Je t’ay secouru parce que je le dois. Je me suis esveille là-dessus, & cinq ou six fois que je me suis endormy depuis, j’ay tousjours faict le mesme songe. Tyribazus, luy dit Atenagoras comme il veid qu’il ne parloit plus, m’est-il permis de parler librement, & puis-je me fier en vostre parole ? Vous le pouvez, Atenagoras, luy respondit-il, dites-moy franche- ment ce que vous m’avez tant celé, quand vous auriez à demesler avec moy la querelle qui vous met l’espée à la main, je vous tiendray si exactement les promesses que je vous ay faites, que ma memoire en sera eternellement estimée. Puis qu’ainsi est, reprit Atenagoras, je ne vous cacheray rien. Je suis ceste main que vous avez songée. Quand je vous secourus dans le bois vous estiez blessé & attaqué par des assassins qui estoient pires que serpens. Depuis j’ay esté tousjours sans me declarer, jusques à ceste heure que je parle à vous comme à mon ennemy. Ne vous estonnez point de ce que j’ose parler ainsi, quand je vous auray dit qui je suis, vous trouverez que je ne fais rien que je ne doive. Je vous conjure donc de me tenir parole, & de me donner le contentement que je vous voye l’espée à la main. Vous m’avez offencé en une partie si sensible, que je n’ay peu moins faire que mettre à part ma naissance pour en avoir raison. Mais afin que tout vostre estonnement vienne & passe tout à la fois, je vous veux apprendre qui je suis : Je m’appelle Zenobias, mon pere est Amadonte, Roy des Palmireniens, & cousin de vostre Maistre : Ma Maistresse est Parysatis, que vous avez voulu avoir pour la vostre. Voila d’où naist mon ressentiment, & d’où arrivera, si vous estes homme de bien, le contentement de l’un, & la mort de l’autre. A quoy pensez-vous Tyribazus, dois-je craindre que le peril vous fasse manquer à vos paroles ? Ceste generosité que jusques icy j’ay recognuë en vous, pourroit-elle bien vous abandonner quand vous en avez le plus affaire ? Ne tachez-pas les bonnes actions de vostre vie passée, par une supercherie ? Nous sommes icy seuls, parlez hardiment, & ne croyez pas que nous-nous separions sans estre satisfaits. Tyribazus apres avoir changé cinq ou six fois de couleur, par admiration, plustost que par crainte, se monstra plus genereux que Zenobias ne le croyoit. Zenobias, luy dit-il, vous n’avez faict que me prevenir, je vous remercie de m’avoir osté la peine de vous aller chercher en Syrie. Parysatis est veritablement ma passion aussi bien que la vostre : mais puis qu’elle n’est que pour un seul, voyons auquel de nous deux l’Amour & Mars l’a reservée. Ne parlons pas davantage, s’il vous plaist, vostre procedé m’oblige. Si je meurs de vostre main, vous ne m’osterez rien que vous ne m’ayez donné, & si j’ay quelque advantage sur vous, j’essayeray de me revancher de ce que je vous doy. Allons nous armer, & ne perdons pas davantage de temps. Ils se retirerent chez eux apres cela, & Zenobias ayant pris les armes & le cheval que luy avoit prestez Tyribazus, fut conduit au camp, par ceux qui le devoient venir prendre chez luy pour l’y accompagner. Tyribazus s’estant deffaict de tout le monde, fut à cheval sans armes, trouver le Roy, qui estoit desja à la fenestre de son Palais. Il luy dit, que bien-tost les combattans arriveroient : mais qu’ils l’avoient envoyé pour obtenir de S. M. la grace que le vaincœur s’en pourroit aller apres le combat, sans estre tenu de dire qui il estoit. C’estoit une priere que Zenobias en le quittant luy avoit faite. Le Roy en de manda advis aux vieux Chevaliers qui estoient aupres de luy, & sçachant qu’il ne pouvoit refuser cette permission, y consentit, & commanda que le plustost qu’ils pourroient, les combattans arrivassent au camp. Tyribazus se retira aussi-tost, & estant au lieu où ses armes & son cheval estoient, il se fit armer, monta à cheval, se desroba par une porte de derriere, & avec ceux qu’il avoit fait attendre pour le conduire, sans le cognoistre, entra au camp. Il y avoit quelque temps que Zenobias y estoit arrivé, & par sa bonne mine & son adresse il attiroit sur luy les yeux, & les benedictions de tous les spectateurs. Quand Tyribazus incognu, eut pris sa place, il partagea les affections : car il estoit aussi grand que son ennemy, & n’estoit pas moins hardy, ny moins adroit que luy. Toutes choses prestes, & le cry faict, les Juges firent signe aux trompettes d’appeller les combattans. A ce commandement chacun demeura sans voix : Et les deux ennemis s’estans esloignez, ils receurent l’ordre & le temps de combattre. Aussi-tost ils picquerent l’un contre l’autre, & en passant jetterent leurs javelots si à propos, que celuy de Tyribazus entra bien avant dans le bouclier de Zenobias : & l’autre le prenant au defaut de la cuirasse, luy entra dans le costé, & luy fit une playe qui luy donna d’autant plus de peine, qu’il fut contraint de l’arracher, pour estre en liberté de combattre. Ils retournerent l’un sur l’autre l’espée à la main, & durant trois heures pour le moins, que sans prendre haleine ils eurent tousjours le bras levé, on ne vous sçauroit dire les grands coups qu’ils se donnerent, & le nombre des playes qu’ils se firent. A la fin tout le monde perdit le contentement qu’il receut d’abord, & voyant l’obstination avec laquelle ces ennemis recherchoient l’occasion de se faire mourir, ne sçavoit si la cruauté estoit plus grande aux Juges, de leur souffrir de passer outre, qu’en eux-mesmes de ne se point adoucir. On eust dit cependant à les voir plus forts & plus prompts que jamais, que leurs blesseures, au lieu d’estre des sorties par où leurs forces se devoient perdre avec leur sang, estoient des entrées par où la colere & le desir de vaincre leur en fournissoit de nouvelles. Zenobias qui estoit au desespoir de ne point venir à bout de son ennemy, voulut essayer par un coup de toute sa force, de finir ce long combat : mais son espée luy tourna dans la main, & Tyribazus ne perdant point l’occasion, luy en donna sur la teste un si furieux, que Zenobias courut fortune de tomber. Les yeux luy estincelerent, & il ne s’en fallut gue- res qu’il ne donnast du nez contre la pointe de sa selle. Je l’advouë, ceste tempeste m’espouventa, & jettant lors du feu par les yeux, & recueillant toutes mes forces en une, je laissay tomber mon espée sur la teste de Tyribazus avec une telle impetuosité, que son casque ayant esté enfoncé, on en veid sortir le sang de tous les costez, & en mesme temps Tyribazus, sans aucun sentiment, ouvrit les jambes, laissa choir les resnes de son cheval, avec son espée, & tomba luy-mesme comme mort sur la place. Le silence fut si grand & si universel, qu’on eust dit qu’avec le vaincu tous les spectateurs eussent perdu l’usage de parler & de se mouvoir. Les trompettes resveillerent tout le monde, & Zenobias luy-mesme, qui ayant remis son espée, sans vouloir descendre pour voir si Tiribazus estoit tout à fait expiré, fit la reverence au Juge, & sortit par une des portes du camp. Il ne fut suivy de personne, tant chacun estoit hors de soy. Il n’y eut que Polemandre qui courut apres luy, & l’ayant atteint, luy dit des choses, & luy exagera son combat avec des paroles que je ne vous repeteray point. Zenobias se trouvant fort blessé, se hasta le plus qui luy fut possible de sortir de Persepolis, & à travers champ, de peur d’estre descouvert, gaigner sa premiere hostelerie. Comme il y fut, son hoste ne le recognoissant point, eust fait difficulté de le loger, si Polemandre ne fust arrivé comme ils disputoient entr’eux. Ce bon homme sçachant que c’estoit Zenobias, ou pour le moins Atenagoras, (car il s’estoit tousjours faict nommer ainsi) luy demanda par quel accident il avoit esté si mal traitté ? Mon hoste, luy respondit Zenobias, il faut que je me fie en vous de ma vie, à plus forte raison m’y dois-je fier pour un combat que vous sçaurez dans deux heures, quand je ne voudrois pas vous le dire. Tyribazus m’avoit offencé, & pour en avoir la raison, j’estois venu de Syrie icy. Apres quelques difficul- tez, nous nous sommes batus ce matin devant toute la Cour. Il m’a mis en l’estat que vous me voyez, & je croy qu’il n’est gueres mieux que moy. Il est demeuré sur le champ, & pour moy j’ay encore eu la force de venir jusques icy. Si vous me voulez faire plaisir, il faut panser mes playes, & puis nous songerons à nostre seureté. Cet hostelier ravy de ce discours, fut long-temps immobile : mais à la fin pressé par Polemandre, il se remit, & pensa le mieux qu’il pût les playes de Zenobias. Apres qu’il les eut recogneuës : Courage, hardy Chevalier, luy dit-il, vous ne garderez-pas long-temps la chambre : vos blesseures sont grandes, mais elles ne sont pas dangereuses. Il faut toutefois que vous sortiez d’icy, & s’il vous plaist de vous fier en moy, je vous meineray en lieu, où non seulement vous serez mieux pansé, mais aussi mieux gardé qu’en lieu du monde. A cinq petites lieuës d’icy il y a entre des montagnes & des deserts, un Cha- steau presque imprenable, où demeure l’oncle de Rhodogune Reyne des Palmireniens, nommé Tizipharnez. Il s’y est retiré, depuis que le Roy, pour complaire à Tyribazus, osa, sans considerer qu’il estoit son oncle, luy oster le gouvernement de Babylone. Ce sage Prince n’a pas voulu se servir de l’occasion, ny de la bonne volonté des deux tiers de la Perse, qui vindrent s’offrir à luy pour ruïner Tyribazus : il s’est retiré dans sa maison, & par une charité digne de son courage, en fait plustost un hospital pour les malades, qu’une place de guerre pour se defendre. Les fontaines d’eau chaude qui sont au pied de la montagne sur laquelle son chasteau est basty, l’ont convié à tenir tousjours auprés de soy les meilleurs Chirurgiens du monde, de sorte que personne ne va là, blessé, ou malade, qui n’en revienne sain. Ceste occasion fut trouvée si bonne par Zenobias, qu’apres s’estre reposé jusques à la nuict, il se fit habiller le mieux qu’il pût, & quoy qu’il ne pust presque souffrir l’incommodité d’estre à cheval, toutefois il endura tant, qu’il vint au Chasteau de Tizipharnez, & y fut receu avec encore plus de courtoisie, & pensé avec plus de soin, que son hoste ne luy avoit faict esperer. Comme les Princes, quelques faschez qu’ils soient, tiennent tousjours des espions à la Cour, pour les advertir de ce qui se passe, Tizipharnez receut des nouvelles six heures apres l’arrivée de Zenobias : Que Tyribazus s’estoit battu contre un estranger qu’on ne cognoissoit point, & qui s’en estoit allé sans le vouloir estre : Que jamais on n’avoit veu personne vaillant comme luy : Que le Roy avoit envoyé des hommes apres pour le prendre, & l’amener mort ou vif, afin de tirer raison des playes de son favory. Qu’on ne sçavoit pas, toutefois, si Tyribazus mourroit, ou non : mais que depuis le combat, il avoit esté emporté dans le Palais, mis au lict, & pensé, sans qu’on eust peu ti- rer une parole de luy. Ces nouvelles surprindrent extraordinairement Tizipharnez, & luy faisant penser à des changemens infallibles, luy donnerent une tres-bonne nuict. Le lendemain matin il renvoya son Courrier, & selon la coustume qu’il faisoit garder, ses Chirurgiens le vinrent advertir qu’entre les malades arrivez depuis peu, il y avoit un jeune homme le plus beau qui se pouvoit veoir, qui avoit esté amené par Memnon, (ainsi estoit nommé l’hostelier de Zenobias) couvert de playes, & toutefois si genereux, qu’il sembloit au lieu de son corps, avoir celuy de quelqu’autre. Ce Prince s’alla aussi-tost mettre en l’esprit, que c’estoit l’ennemy de Tyribazus. Pour en sçavoir la verité, il envoya querir Memnon, qui ne trouvant point de finesse à celer une chose si agreable au Prince, luy conta toute l’affaire, comme il l’a sçavoit, & le laissa avec un extrême contentement. Il estoit toutefois en une peine incroyable, ne sçachant qui pouvoit estre cet Atenagoras Syrien, & ne se pouvoit assez émerveiller qu’il se fust trouvé un homme, qui sans craindre Tyribazus, avec tant de travaux, & par tant de perils, eust traversé un long espace de terre pour oster la tyrannie de la Perse. Il pensoit que quelque puissante consideration l’avoit fait entreprendre ce hazardeux voyage, & ne pouvant croire qu’un simple Chevalier eust osé prendre ceste hardiesse, jugeoit par ses propres conjectures, qu’infalliblement ce devoit estre quelque Prince extraordinairement genereux, qui pour se ressentir de quelque injure que Tyribazus luy pouvoit avoir faite, avoit preferé le desir de se vanger à sa grandeur & à sa vie. Avec ces pensées il fut veoir Zenobias, luy fit si bon visage, & luy tint des langages si obligeants, qu’il l’eust assurément disposé à tout ce qu’il eust desiré de luy, quand Zenobias n’y eust pas esté porté comme il estoit, par les considerations du sang & de l’alliance. Il luy fit donc promettre, apres avoir resisté trois jours à ses prieres, qu’il ne declareroit à qui que ce fust, ce qu’il luy apprendroit de sa fortune, & en mesme temps, luy dit qu’il avoit l’honneur de luy appartenir, & qu’il estoit fils d’Amadonte, & de Rhodogune. Si le Prince fut ayse & ravy d’une si incroyable adventure, imaginez-le, s’il vous plaist, mon pere, & vous figurez tout ce que Tizipharnez dit & faict pour n’oublier rien en une si fameuse occasion. Cependant je vous diray que Zenobias, apres avoir esté un mois au lict, fut guery de toutes ses blesseures, & durant ce temps là, traitté comme s’il eust esté à Palmyre mesme. Tizipharnez fit tout ce qu’il pût pour l’obliger à ne partir pas si tost : mais Zenobias ne pouvant vivre davantage sans veoir Parysatis, le supplia de ne le point retenir : Et ainsi se sentant assez fort pour souffrir le travail du cheval & du chemin, prit congé de son oncle, & accompagné de son Escuyer & de son hoste seule- ment, fut loger à une petite ville sur le chemin de Babylone. Là il prit le cheval de son hoste, luy donna le sien, qui estoit celuy que Tyribazus luy avoit presté, luy commanda de le luy rendre, avec ses armes, & de retenir les deux qu’il avoit laissez chez luy. Outre cela, il luy donna un diamant & deux chaisnes d’or, qui valoient plus de trois mille escus. Memnon s’en retourna riche, & ravy de la liberalité de son hoste, qui avec une haste la plus incroyable du monde, laissa tout ce grand Empire derriere luy Mais comme s’il se fust precipité pour estre vistement malheureux, il ne faisoit que d’entrer dans Seleucie, lors qu’il rencontra un des siens, qui le recognut, & de si loin qu’il se pût faire voir, ployant les bras, & se noyant en ses larmes. O Dieux ! s’escria-t’il, puis-je bien avoir le courage de porter à mon Prince de si mauvaises nouvelles ? Zenobias demeura tout court pour l’ouyr, & sçavoir la cause de sa tristesse : Mais ce funeste messager luy dit, que le mal-heur qu’il avoit à luy apprendre ne se pouvoit dire qu’à loisir. Quoy ! dit Zenobias, nostre infortune est si grande, que mesme il faudroit du temps pour sçavoir que nous sommes mal-heureux ? Mais dis moy comme se portent les Roys, & que faict la belle Parysatis ? Ce pauvre garçon ne pouvant ouvrir la bouche, se mit à pleurer plus que devant, & demeura immobile si long-temps, que pour le remettre Zenobias fut contraint de le prendre par le bras, & luy commander de luy faire entendre le sujet de son voyage, & de ses larmes. Pour oüyr plus aysément ces fascheuses nouvelles, il mit pied à terre dans une hostelerie qui estoit devant luy, & laissant Polemandre pour avoir soin de tout, entra dans une chambre avec ce messager. Ne me fais pas davantage languir, luy dit Zenobias, apprends-moy de quelle mort il faut que je meure ? De celle de Parysatis, Seigneur, luy respondit le garçon. Comment ! s’escria- t’il à ce mot, Parysatis est morte ? Helas ! Seigneur, continua ce garçon, elle ne l’est que trop pour nostre commun contentement. O Dieux jaloux ! m’escriay-je plus haut que la premiere fois, vous n’avez peu souffrir que Zenobias vescust sans avoir sujet de se plaindre de vous. Perfide Fortune, je me doutois bien qu’en fin tu te lasserois de m’obliger, & qu’apres m’avoir servy en tant d’occasions, tu m’abandonnerois en la plus importante. Parysatis est morte ! le dois-je croire. Dieux ! qui nous persuadez que vous estes justes ! Parysatis est morte ! Qui me fera desormais demeurer dans les sentimens que j’ay tousjours eûs pour des choses qui indubitablement ne sont point, puisque ma Princesse n’est plus ? Parysatis est morte, hé ! que fais-je donc au monde ? A quoy me sert mon courage ? Que ne crois-je mon Amour, & que ceste espée qui s’offre d’elle-mesme à me secourir, ne m’a-t’elle ouvert le chemin par où je dois trouver Parysatis ? A ce dernier mot cet Amant desesperé voulut tirer son espée, pour s’en donner dans le corps : mais la force l’avoit desja abandonné de telle sorte qu’il tomba esvanoüy, ne l’ayant qu’à demy tirée, & faisant voir qu’il ne tenoit pas à luy que la mort ne prevint cet esvanoüissement. Polemandre qui estoit accouru avec toute la maison, au secours de Zenobias, fut plus d’une heure sans pouvoir luy faire recueillir ses esprits. A la fin il revint, & tout foible & mourant qu’il estoit, commanda à son Messager de ne pas retarder le mal que luy devoient faire ces mauvaises nouvelles. Ce jeune homme n’osant desobeïr commença de ceste sorte. Vostre depart inopiné ayant faict long-temps songer les Roys, & soupirer les Reynes & la Princesse : En fin Amadonte se doutant de ce que vous pouviez avoir entrepris, imposa silence au peuple, par une harangue qu’il leur fit en pleine assemblée, & contenta Timolas & les Princesses par les asseurances qu’il leur donna que vous n’estiez pas loin. Cependant moy, qui avois l’honneur d’entretenir souvent & consoler Parysatis, pource que j’estois le seul que vous luy aviez laissé, je fus cinq ou six fois en pensée de la quitter, & vous venir chercher pour son contentement. Car, à n’en mentir point, comme l’Amour qu’elle avoit pour vous est incroyable, aussi estoit la grandeur des ennuys que luy donnoit vostre absence. Voyant que vous ne reveniez point au temps que vous luy aviez promis, elle s’en pleignit, secrettement toutefois, & peu à peu l’Amour la jettant dans la crainte, & la crainte dans d’eternelles inquietudes, il fallut que son corps cedast à la violence des persecutions que son esprit luy faisoit. Elle tomba malade : mais d’une langueur qui apres l’avoir faict trainer fort long-temps, infalliblement la menaçoit de mort. Pour la divertir Timolas se resolut de faire un voyage jusques aupres d’Antioche, & laisser en passant Statira & Parysatis à Daphné, se persuadant que la beauté du sejour, le changement d’air, & la commodité de la solitude, qu’avec toute la Cour, on ne laisse pas en tout temps de trouver dans ces jardins & dans ces bois, luy seroit un souverain remede. Amadonte approuva ce voyage, & sans les affaires qui l’obligeoient à demeurer à Palmyre, il n’eust pas esté long-temps sans estre de la partie. Parysatis fut plus d’un mois à Daphné sans quitter la chambre : mais pour avoir plus de moyen de se plaindre, elle sortit, & tous les soirs, accompagnée de Melibée, Steliane, & moy seulement, alloit sous les plus estroites allées de cyprez, afin qu’elle n’eust rien que de funeste autour d’elle, ou pour le moins de conforme à son humeur, pleurer vostre absence, & souspirer sa mauvaise fortune. Timolas arriva quelques jours apres, & pour resjouyr sa femme & sa fille, & celebrer la feste de sa naissance, fit faire des combats & des feux de joye huict jours durant. Le dernier jour, qui avoit esté le plus beau de tous fust suivy d’une nuit la plus tragique dont on ait jamais ouy parler. Aussi-tost que les feux de joye furent allumez, le Ciel sembla le trouver mauvais, car il tonna tout le soir, & fit un orage extraordinaire, mesme on remarqua que de tant de feux qui avoient esté allumez, il n’y en avoit eu pas un, qui n’eust esté esteint, où par le vent où par la pluye. Toute la Court se retira plustost que de coustume à cause du mauvais temps, & le Roy mesme qui tout à coup, avoit passé de son extreme joye, a je ne sçay quelle extraordinaire melancolie, donna le bon-soir à Statira, & Parisatis, & s’alla coucher en sa chambre. Bien à peine estoit-il endormy, que l’orage qui avoit cessé environ deux heures, redoubla avec tant d’esclairs, tant de coups de tonnerre, tant de vent que ce miserable Prince s’estant esveillé au bruit, sentit bransler sa chambre, ouyt tomber des murailles, & se vit à la fin luy-mesme accablé soubs le corps du logis où il estoit, qui incon- tinent apres fut renversé sur luy. O coup fatal de la fortune ! afin que je ne die point de l’injustice des Dieux, dit Zenobias en interrompant celuy qui parloit, à quel propos esperons-nous des recompenses en bien faisant, puis que la vertu mesme a souffert les tourments qui ne sont inventez que pour le vice. Mais, poursuis, Meronte, luy dit-il, qu’est devenuë Parisatis. Aussi-tost ceux qui estoient logez aux corps des logis separez du Chasteau, poursuivit ce Messager, n’ayant point esté touchez de cette tempeste s’esveillerent au bruit, & accoururent pour voir ce desastre. Moy-mesme à mon mal-heur estant eschappé, je fus l’un des premiers qui me trouvay au bord du fossé, pour tout à loisir considerer la perte generale de toute la Syrie. Tous les Officiers du Prince & des Princesses, tous ceux de la Court qui estoient logez hors de Daphné, & la moitié mesme comme je croy des peuples d’Antioche, furent avant qu’il fust jour auprés de ce Chasteau ruïné, où plustost auprés de ce funeste tombeau du sang Royal. Spiniante arriva incontinent apres, & s’estant cinq ou six fois voulu jetter sans consideration dans ces tragiques demolitions en fut arresté par les plus sages, qui luy remonstroient que sa perte ne feroit qu’augmenter celle qui estoit faitte. Ceux d’Antioche admiroient ce tremblement de terre, & advoüoient que depuis celuy qui arriva de leur ville mesme comme l’Empereur Traian y estoit, n’en avoient point vû de semblable. Spiniante, comme le seul qui pouvoit commander fit venir tout le peuple de la campagne & les maneuvres d’Antioche, & luy-mesme avec tous les Officiers du Roy, se mit à travailler pour veoir ce que leurs fatales ruïnes cachoient. Il faut advoüer, Seigneur, que le spectacle vous eust tiré des larmes des yeux, vous eussiez vû cette belle maison sans dessus dessous, & sans qu’au delà des fossez du principal logement, il y eust rien de gasté que ce qui l’avoit esté par la pesanteur des murailles & de plusieurs autres choses qui avoient esté emportées en l’air, par la violence du tremblement. On voyoit par une nouveauté jusques-là mesme incognuë à ceux d’Antioche, du feu & de la fumée qui sortoient d’entre les pierres, & les autres materiaux de ce Chasteau, & rendoient la peine de Spiniante d’autant plus grande, qu’on ne pouvoit advancer besogne. En fin apres une demy-journée d’assiduité à decombler, on trouva le corps du Roy, où plustost les restes effroyables d’une personne si sainte & si sacrée. Sa teste estoit tellement ecrazée, qu’il estoit impossible de le recognoistre qu’aux habillemens qui estoient sur luy, & aux emmeublemens parmy lesquels il fut trouvé. Ah ! Meronte que tu me fais languir. Prononce viste l’arrest de ma mort, luy dit Zenobias, qui estoit encor tout prest de s’esvanouïr. Seigneur, poursuivit Meronte, que vous puis-je dire davantage ? Depuis pour trouver les corps des Princesses on chercha trois jours durant, mais tout ayant esté osté piece à piece, en fin on veid la chambre de Statira, & celle de Parisatis, mais on ne les trouva ny l’une ny l’autre. Ce qui nous estonna le plus, fut que parmy ceux qui avoient esté assommez, on veid des Gardes, & des Huissiers & quelques autres domestiques qui sembloient avoir esté tuez à coups d’espée, plustost que par la cheute du Chasteau. Apres diverses conjectures on se figura que les miserables se voyans pris dans ses ruïnes sans espoir de secours, avoient aimé mieux se tuer, que de languir davantage. On nous a dit depuis que la nuict mesme de ce malheur, il avoit paru cinq ou six vaisseaux au costé de Seleucie, & que mesme on avoit eu peur d’une surprise, pource que toute cette abominable nuict, plusieurs compagnies de gens de cheval par terre, & plusieurs hommes armez estoient descendus par le fleuve Orente jusqu’au dessus de Seleucie. Qu’on avoit ouy crier des personnes qui estoient enlevées par force : Mais, Seigneur, que vous sert ce recit puis qu’il n’a fait que vous importuner, & augmenter vostre ennuy. Meronte eust long-temps parlé sans estre interrompu, pource que Zenobias s’estoit esvanouy, sans qu’on y eust pris garde, aussi-tost qu’il luy eust dit que Parisatis n’avoit point esté trouvée. Polemandre fut le premier qui s’advisa de veoir ce que son maistre faisoit, mais le voyant plus mort que vif, ses plaintes & ses soins renouvellerent. Il essaya mille sorte de remedes, avant que ny luy, ny les Medecins qu’il avoit envoyé querir, pussent luy faire reprendre les sens. Il revint apres une deffaillance de trois heures, & quand il fut revenu, il s’escria tant qu’il pût. Injustes Dieux ! Puissances imaginaires qui n’avez providence quelconque, & qui n’estes grands ou petits, veritables ou faux qu’autant que les hommes se le figurent ! Quoy ! je croiray que vous estes apres cette sanglante Tragedie ! Non, je ne le puis faire, c’est offencer le sens commun : c’est vous offencer vous mesmes, s’il estoit vray que vous fussiez, de figurer que vous ayez soin du monde, puisque vous en avez laissé perdre tout ce qu’il y avoit de beau. Parisatis vous estes morte ? Ouy vous l’estes & je n’en doute point : Orsus vous autres, dit-il se tournant vers les siens, ne me parlez plus de vivre, je veux mourir, & je jure par Parisatis morte, que quiconque m’empeschera de la suivre, sentira combien pese un bras poussé d’une juste colere. Il eust beau faire & beau dire on ne laissa pas pour ses menaces de le servir si bien contre son intention qu’en depit de luy, il fut contraint de vivre, & recevoir quelque espece de soulagement. Figurez vous mon pere, comme quoy il en devoit estre au desespoir. Il pensa mourir plusieurs fois. Et en fin apres estre sorty de tres longues maladies. Au lieu d’aller en Syrie il passa en Ionie par le conseil de Polemandre, & fut à six ou sept lieuës d’Ephese pour consulter un Oracle de Diane, qui encore aujourd’huy a par toute l’Asie une grande reputation. Apres plusieurs sacrifices, il receut cette responce.